Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Biblia willakunqampita shumaq yachatsikïkuna

 78 KAQ WILLAKÏ

Diospa Gobiernumpitam Jesusqa parlaq

Diospa Gobiernumpitam Jesusqa parlaq

Bautizakurirllam Jesusqa, “Diospa Gobiernunqa këllachönam” nishpa yachatsikur qallëkurqan. Y qateqninkunapis pëwanmi entëru Galilëachö y Judëachö puriyarqan. Tsëpitaqa Nazaret markanman kutirirmi Jesusqa Diosta adorayänan wayiman ëwarqan, y Isaïas qellqanqan rölluta kicharirmi kënö nishpa leyirqan: “Alli willakïninkunata willakunäpaqmi santu espïritunta Jehovä qomashqa”. ¿Y imanirtaq tsëta leyirqan? Porqui nunakunaqa milagrukunata ruranantam munayarqan. Peru Jesusqa manam milagrukunata rurananllapaqtsu santu espïrituta chaskishqa karqan. Pëqa Diospa Gobiernumpita yachatsikïtam imëkapitapis mas precisatsirqan. Tsëmi wiyakïkaqkunata kënö nirqan: “Kananmi kë willakï cumplikärin”.

Tsëpitaqa Galilëa qochamanmi ëwarqan. Tsëchömi pescäduta tsarir trabajaq chusku qateqninkunata tarirqan, y kënömi nirqan: “Qepäta shayämï, nunakunata pesquëtam yachatsiyashqëki”. Tsë qateqninkunapa jutinkunaqa Pëdru, Andres, Santiägu y Juanmi karqan. Pëkunaqa trabäjunkunata jaqirïkurmi qepanta ëwayarqan. Y entëru Galilëachömi Jehoväpa Gobiernumpita yachatsikur puriyarqan. Diosta adorayänan wayikunachö, mercädukunachö y cällikunachömi yachatsikuyarqan. Y mëtsikaq nunakunam qatiräyarqan. Jesuspita parlayanqanqa më tsëmanmi chärirqan, hasta Siria ëwëkunayaqpis.

Tiempu pasariptinqa, qeshyëkaqkunata kachakätsiyänampaq y nunakunapita supëkunata qarquyänampaqmi Jesusqa qateqninkunata poderta qorqan. Y wakinqa markan markan y caserïun caserïunmi yanaqäyarqan. Jina juk grüpu warmikunapis pëta y qateqninkunata atiendirmi pëkunawan puriyaq. Wakinmi kayarqan Marïa Magdalëna, Juäna, Susäna y jukkunapis.

Alleq yacharatsirmi Jesusqa qateqninkunata yachatsikoq kacharqan. Galilëachö puriyanqan witsanqa mëtsikaqmi Jesuspa qateqnin këman chäyarqan y bautizakuyarqan. Y mas nunakunam Jesusta qatita munayarqan, tsëmi Jesusqa nirqan cosëchapaq listu këkaq chakrakunanö kayanqanta. Nïkurmi kënö nirqan: “Cosëchaman mas trabajadorkunata kachamunampaq Jehoväta mañakuyë”. Tsëpita juk  tiemputam 70 qateqninkunata akrarir ishkëpayan kacharqan entëru Judëachö yachatsikuyänampaq. Y pëkunaqa pï mëtam Diospa Gobiernumpita parlapäyarqan. Y kutirirqa llapan pasakunqantam Jesusta kushishqa willayarqan. Diabluqa manam ni imanöpapis yachatsikuyänanta michëta puëdirqantsu.

Jesusqa llapantam listuta jaqirqan ciëluta kutikuptin tsë precisaq trabäjuta qateqninkuna rurar sïguiyänampaq. Nïkurmi kënö nirqan: “Diospa Gobiernumpita alli willakïkunata entëru patsachö willakuyë. Diospa Palabrampita nunakunata yachatsiyë y bautizatsiyë”.

“Jina Diospa Gobiernumpita alli willakïkunataqa juk markakunachöpis willakunämi, porqui tsëpaqmi kachamushqa karqö” (Lücas 4:43).