Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Biblia willakunqampita shumaq yachatsikïkuna

 77 KAQ WILLAKÏ

Samariapita warmitam Jesus parlaparqan

Samariapita warmitam Jesus parlaparqan

Pascua fiesta pasarinqampita juk tiemputam Jesuswan qateqninkuna Galilëata kutiyarqan. Y Samariapa pasëkarmi Sicar markapa washaninchö jamariyarqan, tsëchömi Jacob ruratsinqan pözu këkarqan. Y tsë markaman qateqninkuna mikï ranteq ëwayanqanyaqmi Jesusqa tsëchö jamëkarqan.

Tsëmanmi juk warmi yaku jorqaq chärirqan, tsëmi Jesusqa, “yakü qararamë” nirqan. Peru tsë warmiqa kënömi nirqan: “¿Imanirtaq parlapämanki Samariapita këkaptï? Judïukunaqa manataq Samaria nunakunawan parlapänakuyantsu”. Jesusnam kënö nirqan: “Pï kanqäta musyarqa, qammi yakuta mañakamankiman karqan, y kawatsikoq yakutam qoqman karqan”. Tsënam, “¿ima nimëtataq munanki? Manataq chaqanëkillapis kapushunkitsu” nirqan. Jesusnam, “noqa qonqä yakuta upoq kaqqa mananam ni imëpis yakunanqanatsu” nirqan. Tsënam, “tsë yakuta qoykallämë teytë” nirqan.

Jesusqa, “qowëkita qayamï” nirqanmi. Tsënam, “noqapaqa manam qowä kantsu” nirqan. Y Jesusqa kënömi nirqan: “Rasuntam ninki, qamqa pitsqa kutim casakurqunki, y kanan yachëkäyanqëki nunaqa manam qowëkitsu”. Tsënam tsë warmiqa kënö nirqan: “Qamqa profëtataq kanki. Marka mayïkunaqa creiyan kë jirkachö Diosta adorana kanqantam, peru judïukunaqa niyan Jerusalenllachö adorana kanqantam. Noqaqa pensä Mesïas chäramur-raq Diosta imanö adorana kanqanta yachatsimänapaq kaqtam”. Tsënam Jesusqa, “noqam Mesïas kä” nirqan, y tsëtaqa manaran pitapis nishqaraqtsu karqan.

 Tsënam tsë warmiqa ëqillapa markanman kutïkur marka mayinkunata kënö nirqan: “Mesïastatsun taririrqö. Llapan vïdätam musyan. Shayämï rikäyänëkipaq”. Tsënö niptinmi pëta qatirkur Jesus yachatsikunqanta wiyaq pözuman ëwayarqan.

Tsënam Samaria nunakunaqa markankunachö quedakunampaq niyarqan. Y ishkë junaqmi Jesusqa tsëchö quedakurqan pëkunata tukïta yachatsir, tsëmi pëman creikuyarqan. Y kënömi tsë warmita niyarqan: “Kë nuna ninqankunaqa clärum rikätsikun nunakunapa salvaqnin kanqanta”.

“Pipis yakunaq kaqqa, shamutsun; pipis munaq kaqqa, kawëta qokoq yakuta debaldi uputsun” (Revelacion 22:17).