Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Biblia willakunqampita shumaq yachatsikïkuna

 80 KAQ WILLAKÏ

Jesusqa 12 apostolkunatam akrarqan

Jesusqa 12 apostolkunatam akrarqan

Jesusqa juk wata pullannam yachatsikïkarqan, peru juk precisaq asuntutam decidinan karqan. Awmi, pëwan juntu trabajayänampaq kaqkunata y ciëluta kutikuptin creikoqkunata cuidayänampaq kaqkunatam akranan karqan. Peru puntataqa Jehoväpa yanapakïnintaran ashirqan. Tsëmi juk jirkaman japallan ëwarqan y Diosman mañakïkar wararqan. Y waränin junaqqa, qateqninkunata juntarirmi pëkunapita 12 apostolninkunata akrarqan. ¿Musyankiku jutinkunata? Jutinkunaqa karqan Pëdru, Andres, Santiägu, Juan, Felïpi, Bartolomë, Tomas, Mateu, Alfeupa tsurin Santiägu, Tadeu, Simon y Jüdas Iscariötim.

Andres, Pëdru, Felïpi, Santiägu

Tsë 12 apostolninkunam më tsëpa Jesuswan viajayaq. Y imanö yachatsikuyänampaq kaqtam Jesusqa yachatsirqan, nïkurmi japallankunata kacharqan. Jinamampis Jehoväqa nunakunapita supëkunata qarquyänampaq y qeshyëkaqkunata kachakätsiyänampaqmi pëkunata poderta qorqan.

Juan, Mateu, Bartolomë, Tomas

Jesusqa llapan apostolninkunatam amïgunkunatanö rikaq, y alläpam pëkunaman confiakoq. Y fariseukuna imatapis mana  yachaq lluta nunakunatanö rikäyaptimpis, Jesusqa manam tsënötsu pëkunata rikaq. Tsëpa rantinqa cargunkunata shumaq cumpliyänampaqmi alleq yachatsirqan. Y pëkunaqa mas precisanqan tiempukunachömi Jesuspa lädunchö kayarqan. Awmi, manaraq wanutsiyaptimpis y kawariramuptimpis pëkunaqa lädunchömi kayarqan. Cäsi llapanmi Jesusnöpis Galilëapita kayaq, y wakinqa warmiyoqmi kayarqan.

Alfeupa tsurin Santiägu, Jüdas Iscariöti, Tadeu, Simon

Tsë apostolkunaqa jutsasapa karmi imallachöpis pantariyaq. Höraqa manaraq shumaq pensarmi imatapis parlariyaq, y höranam, mana allita decidiyaq. Y höraqa rasllam pacienciankuna ushakäreq. Hasta mëqan mas precisaq kanqampaqmi discutiyaq. Peru tsënö karpis alli nunakunam kayaq, porqui Jehovätam kuyayaq. Y ciëluta Jesus kutikuptinqa pëkunanam llapan creikoqkunata rikäyänan karqan.

“Qamkunataqa amïgükuna nirmi qayayarqoq, porqui Teytäpita llapan wiyanqätam qamkunataqa musyatsiyarqoq” (Juan 15:15).