Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Biblia willakunqampita shumaq yachatsikïkuna

 72 KAQ WILLAKÏ

Jesus jövin kanqan witsan

Jesus jövin kanqan witsan

Josëwan Marïaqa Nazaretchömi Jesusta y wakin kaq ollqu y warmi wamrankunata wätayarqan. Josëqa carpinterïachö trabajarmi familianta manteneq, y Jehoväpita y leyninkunapitam yachatseq. Llapankunam Diosta adorayänan wayiman ëwaräyaq. Y Jerusalentapis wata watam Pascua fiestapaq ëwayaq.

Wata wata rurayanqannöllam Jesus 12 watayoq këkaptimpis Jerusalenta ëwayarqan. Pascua fiesta kaptinmi Jerusalenchöqa më tsëpita nunakuna junta kayarqan. Y fiesta pasariptinmi Josëwan Marïaqa wayinkunata kutikuyarqan, y Jesusqa mëqan familianwampis këkanqantam pensayarqan. Peru ashirirqa manam tariyarqantsu.

Tsëmi Jesusta asheq Jerusalenta kutiyarqan, y kima (kimsa) junaqmi ashiyarqan. ¿Y mëchö këkaqtataq tariyarqan? Templuchö këkaqtam. Tsëchömi alli yachaq nunakunata wiyar y tapupar chowpinkunachö tëkänaq. Tsë nunakunaqa Jesus imanö parlanqampitam espantakuyarqan, y tapuparmi qallëkuyarqan.  Y imanö contestanqampitam äyakashqa quedariyarqan. Jehoväpa leyninkunata alleq entiendinqantam cuentata qokuyarqan.

Josëwan Marïaqa mantsakashqam ashiyarqan. Tsëmi Marïaqa, “hïju, më tsëtam ashiyarqoq. ¿Mëchötaq karqunki?” nirqan. Y Jesusqa kënömi nirqan: “¿Manaku musyayarqëki Teytäpa wayinchö kanäpaq kaqta?”.

Jesusqa teytankunawanmi Nazaret-ta kutikurqan. Tsëchömi teytan Josë carpinterïachö trabajëta yachatsirqan. Pensari, ¿imanöraq jövin këninchö Jesus karqan? Jesusqa jatunyanqanmannömi mas yachaq tikrarqan. Tsëmi Diospaq y nunakunapaqpis alläpa kuyë karqan.

“Diosllä, munanqëkita rurarmi alläpa kushishqa sientikü, y leynikikunaqa shonqüchömi këkan” (Salmus 40:8).