Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Biblia willakunqampita shumaq yachatsikïkuna

 71 KAQ WILLAKÏ

Jehovämi Jesusta salvarqan

Jehovämi Jesusta salvarqan

Israelpita inti yarqamunan lädupa këkaq markachömi estrëllakuna pushakoq kayanqanta creiyaq. Juk ampim tsë markachö täraq nunakuna ciëluchö pureq estrëlla niraqta rikäriyarqan, y qatirmi ëwayarqan. Tsë estrëlla niraqqa Jerusalenmanmi pusharqan. Tsëman chärirmi, “¿mëchötaq tariyäman judïukunapa reynin kanampaq kaq wamrata? Respetarmi pëpa puntanman qonqurikïta munayä” nishpa tapukuyarqan.

Jerusalenpa reynin Herödismi rey kanampaq kaq yurikushqa kanqanta wiyarirqan. Tsëmi alläpa yarpachakur mas precisaq kaq sacerdötikunata tapurqan, “¿mëchötaq tsë reyqa yurikunan karqan?” nishpa. Tsënam, “Diospa willakoqninkunaqa niyarqan Belenchö yurikunampaq kaqtam” niyarqan. Tsëmi Herödisqa tsë viajëru nunakunata kënö engañarqan: “Belenta ëwar tsë wamrata ashiyämï. Taririrqa mëchö këkanqanta willayämänëkipaq kutiyämunki, porqui noqapis puntaman qonqurikoqmi ëwëta munä” nishpa.

Tsë estrëlla niraqqa yapëmi ëwar qallëkurqan, y Belenmanmi tsë viajërukunata pusharqan. Nïkurmi juk wayi jananchö pärarirqan. Tsë wayichömi tariyarqan Jesusta y mamänin Marïata. Tsëmi Jesuspa puntanman qonqurikuyarqan, y qarayarqan öruta, inciensuta y mïrrata. Peru ¿Jehoväku tsë nunakunataqa Jesusman kacharqan? Manam.

Tsë paqasmi Jehoväqa Josëta suëñïninchö kënö nirqan: “Herödismi Jesusta wanutsita munan. Warmikita y wamrëkita pusharkur Egiptuman escapakï. Ama kutiyämunkitsu, kutiyämunëkipaq allina kanqanta willayanqaqyaq”. Tsëmi Josëqa familianwan tsë höra Egiptuta ëwakuyarqan.

Jinamampis tsë viajërukunataqa Herödisman manana kutiyänampaqmi Jehoväqa nirqan. Y manana kutiyänampaq kaqta cuentata qokurirmi Herödisqa alläpa piñakurqan. Y Jesusta mana tarïkurmi mandakurqan tsë edä wamrakunata Belenchö chipyëpa wanutsiyänampaq. Peru Jesusqa Egiptuchönam këkarqan, tsëmi salvakurqan.

 Tsëpita juk tiemputam Herödis wanukurqan. Tsëmi Jehoväqa Josëta kënö nirqan: “Kananqa allinam kutikunëkipaq”. Tsëmi Marïata y Jesusta pusharkur Israelman kutikurqan, y Nazaretchömi patsakäyarqan.

“Tsënöllam noqa parlanqäwampis pasakunqa. [...] Munanqänöllam rurakanqa” (Isaïas 55:11).