Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Biblia willakunqampita shumaq yachatsikïkuna

 63 KAQ WILLAKÏ

Perqachö qellqashqa palabrakuna

Perqachö qellqashqa palabrakuna

Tiempu pasariptinqa Belsasarnam Babiloniata gobernarqan. Juk kutim waranqa nunakunapaq ampipa fiestata ruratsirqan. Y tsë nacionchö mas precisaq nunakunatam convidarqan. Nïkurmi sirweqninkunata mandarqan Jehoväpa templumpita Nabucodonosor apakunqan örupita väsukunata jorqayänampaq. Y tsëkunawan upyar y diosninkunata alabarmi kayarqan. Peru illaqpitam juk maki yuririr ëllurëkäyanqan sitiupa perqanchö qellqar qallëkurqan.

Belsasarqa alläpam mantsakarqan. Y magia ruraqkunata qayëkatsirmi kënö nirqan: “Taqë palabrakuna ima ninan kanqanta willamaq kaqmi, Babiloniachö kima kaq mas precisaq nuna këman chanqa”. Peru manam ni mëqampis tantiyëta puëdirqantsu. Tsënam reypa warmin chärir kënö nirqan: “Daniel jutiyoq nunam Nabucodonosorta willaq suëñunqankuna imata rikätsikunqanta. Pëmi willashïnikita puëdin tsë palabrakuna ima ninan kanqanta”.

Daniel chäriptinmi Belsasar kënö nirqan: “Taqë palabrakunata leyita y ima ninan kanqanta willamëta puëdiptikiqa, örupita wallqatam qoshqëki y Babiloniachö kima kaq mas precisaq nuna këmanmi chanki”. Danielqa kënömi nirqan: “Manam munätsu imatapis qomänëkita. Peru willashqëkim taqë palabrakuna ima ninan kanqanta. Teytëki Nabucodonosorqa alläpa orgullösum karqan, tsëmi humildi këta Jehovä yachatsirqan. Qamqa musyarqëkinam pëta ima pasanqanta, peru manam Jehoväta respetarqunkitsu. Templumpita apayämunqan väsukunawanmi vïnuta upyarqunki. Tsëmi Diosqa MENË, MENË, TEQUEL PARSIN neq palabrakunata qellqashqa. Tsëqa rikätsikun Media y Persia nunakuna Babiloniata ushakätsiyänampaq kaqtam. Y qamqa rey kënikitam oqranki”.

Babiloniata ushakätsiyänampaqqa sasanömi karqan. Jatun perqakunayoqmi kaq y jiruroqnimpam jatun mayu  pasaq. Peru tsë paqasllam Media y Persia soldädukuna Babiloniaman chäriyarqan. Persiata gobernaq Cïruwan tröpankunam pasayänampaq mayuta juk lädupa yaqaratsiyarqan. ¡Y Babiloniapa punkunkunaqa kichëllam këkarqan! Tsëmi yëkïkur llapankunata wanutsiyarqan, entëru markata kayëkuyarqan y reynintapis wanuratsiyarqan. Tsëpita patsëqa Cïrunam Babiloniata gobernarqan.

Gobernar qallanqan watam Cïruqa kënö nirqan: “Jehovämi nimashqa Jerusalenchö templunta yapë sharkatsinäpaq. Yanapakïta munaq judïukuna ëwayätsun”. Tsëmi Jerusalenta ushakätsiyanqampita 70 wata rurinta mëtsikaq judïukuna kutikuyarqan. Tsënömi Jehovä ninqan cumplikarqan. Jinamampis Cïruqa templupita Nabucodonosor apakunqan örupita y pläta metalpita väsukunata y maskunatam kutitsirqan. ¿Cuentata qokurqunkiku markanta yanapanampaq Cïruta Jehovä mandanqanta?

“¡Ishkirishqam! ¡Alläpa Puëdeq Babiloniam ishkirishqa, y supëkuna täräyänan sitiuman[mi] [...] tikrarishqa!” (Revelacion 18:2).