Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Biblia willakunqampita shumaq yachatsikïkuna

 62 KAQ WILLAKÏ

Jatun montinö gobiernu

Jatun montinö gobiernu

Nabucodonosormi juk kuti montita (qeruta) suëñïkurnin alläpa mantsakarqan. Tsëmi tantiyëta yachaq nunakunata qayaratsir imapaq tsëta suëñunqanta tapurqan. Peru manam mëqampis tantiyëta puëdirqantsu, tsëmi Danielta qayatsirqan.

Nïkurmi Danielta kënö nirqan: “Juk montitam suëñurqö ciëlukamayaq winaqta. Y entëru patsapitam rikakaq. Shumaq raprakunayoq y atska frütayoqmi karqan. Tsëpa jawanchömi animalkuna punurpäkuyaq, y pishqukunam rämankunachö qeshunkuna rurayaq. Tsënam, ciëlupita juk angel uräramur sinchipa kënö nirqan: ‘¡Tsë montita walluyë y rämankunata llümayë! Peru troncuntawan watsintaqa (matsuntaqa) jaqïkuyë. Nïkurnin fiërrupita y cobripita rurashqa jatun anïllukunata churapuyë. Tsë montipa shonqunqa jukläyam tikranqa, y manam nunapa shonqunnatsu kanqa, sinöqa chukaru animalpanam. Y qanchis tiempukunam tsënö kanqa. Tsënöpam llapankuna cuentata qokuyanqa Diosqa llapanta gobernanqanta, y munanqanta gobiernuta qonqanta’”.

Jehovämi Danielta musyatsirqan tsë suëñu imata rikätsikunqanta. Y musyarirqa mantsakarqanmi. Tsëmi kënö nirqan: “Reyllä, tsë suëñunqëki chikishoqnikikunata pasanan kaptinqa ima alliraq këkunman, peru qamtam pasashunki. Tsë walluyanqan montiqa qammi kanki. Rey kënikitam oqranki y chukaru animalkunanömi qorata mikunki. Peru tsë angelqa nirqan tsë montipa troncunta y watsinta jaqïkuyänampaqmi. Tsëmi rikätsikun yapë rey kanëkipaq kaqta”.

Juk wata pasariptinmi Nabucodonosorqa gobernanan wayipa altusnimpita entëru Babilonia markata rikëkarqan. Y kënömi nirqan: “¡Imanö shumaq markatam ruratsirqö! ¡Noqanöqa manam pipis kantsu!”. Y tsënö nikaptinmi, ciëlupita kënö neq wiyakarqan: “¡Nabucodonosor! Kanan höram gobiernïkita oqrarirqunki”.

Tsë höram Nabucodonosorqa juiciunta oqrarirqan, y chukaru animalnömi tikrakurirqan. Tsëmi gobernanan wayipita qarquriyarqan, y chukaru animalkunawanmi juntararqan. Aqtsampis winar winarmi äguilapa plümannö tikrakurirqan, y shillunkunapis pishqukunapa shillunkunanömi winarirqan.

 Qanchis wata rurintam Nabucodonosorqa kachakärirqan, y Jehovä permitiptinmi yapë Babiloniapa reynin karqan. Tsëmi kënö nirqan: “Ciëluchö këkaq Rey Jehovätam alabä. Orgullösu kaqkunataqa pëqa sitiunmanmi churan. Kananqa alleqmi musyä Jehovä Gobernaq kanqanta, y munanqanta gobiernuta qonqanta”.

“Orgullösu këqa mana allimanmi chätsikun; y alli tukoq këqa imëkamanmi ishkitsikun” (Proverbius 16:18).