Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Biblia willakunqampita shumaq yachatsikïkuna

 67 KAQ WILLAKÏ

Jerusalenpa perqankuna

Jerusalenpa perqankuna

Jerusalenpa perqankunata altsayanqan witsampaq yapë parlarishun. Tsë witsanqa Persia nacionpa Süsa markanchömi Nehemïas jutiyoq israelïta täraq. Pëqa rey Artajerjespa sirweqninmi karqan. Juk kutim Judäpita wawqin chärir kënö nirqan: “Jerusalenman kuteq israelïtakunaqa peligruchömi këkäyan. Babilonia soldädukuna ushakätsiyanqan perqakunata y punkukunatam altsayanraqtsu”. Tsënam Nehemïasqa llakishqa sientikurqan. Y yanapakïta munarmi Jerusalenman ëwananta rey jaqinampaq Diosman mañakurqan.

Tsëpita juk tiemputam reyqa Nehemïasta llakishqata rikärir kënö nirqan: “¿Imataq pasashurqunki? Llakishqanötaq kanki”. Tsënam Nehemïasqa, “markä Jerusalenmi chipyëpa ushakashqa këkan, tsëmi alläpa llakishqa këkä” nirqan. Y reynam, “¿imanötaq yanapareqman?” nishpa tapurirqan. Nehemïasqa jinan höram shonqunllachö Diosman mañakurirqan. Nïkurmi, “permitïkallämë Jerusalenman kutirir perqankunata yapë sharkatsinäta” nirqan. Y rey Artajerjesqa “ëwëlla” nirqanmi. Y llapan wananqantam qorqan nänichö imapis mana pasanampaq. Jinamampis Judächö gobernador kanampaqmi churarqan, y Jerusalenpa punkunkunata ruratsinampaqmi qeruta qorqan.

Nehemïasqa Jerusalenman chärirllam perqakunata rikaq ëwarqan. Y sacerdötikunata y gobernadorkunatam kënö nirqan: “Llapanmi mana alli këkan. Trabajaqmi churakänantsik”. Llapan israelïtakunam acuerdu kayarqan, y trabajarmi qallëkuyarqan.

Tsënam israelïtakunata chikeqkunaqa, “tsë rurëkäyanqëki perqataqa atoqllapis juchuratsinmanmi” nishpa burlakuyarqan. Peru israelïtakunaqa mana cäsushpam trabajar sïguiyarqan. Jatunta y anchutam rurayarqan.

Tsëmi më tsëpita chikikoqkuna Jerusalenta illaqpita ushakätsita munayarqan. Judïukunaqa alläpam mantsakäyarqan. Peru Nehemïasqa kënömi nirqan: “Ama mantsakäyëtsu. Jehovämi noqantsikwan këkan”. Nïkurmi trabajaqkunata cuidayänampaq guardiakunata churarqan. Tsëmi chikeqninkunaqa ni imatapis rurayarqannatsu.

 Y 52 junaqllachömi perqata y punkukunata rurar ushariyarqan. Y celebrayänampaqmi Nehemïasqa levïtakunata Jerusalenman pusharqan. Cantayänampaqmi ishkë grüpuman rakirqan. Juk kaq grüputam Esdras pusharqan, y juknintanam Nehemïas. Y Kita Punku nishqanchö këkaq escalonkunapam witsäyarqan. Nïkurmi ishkan lädupa ëwaq perqa janampa cada grüpu ëwayarqan markapa jiruroqnin tumareq. Trompëtakunata, platïllukunata y arpakunata tocar, y Jehoväpaq cantarmi ëwayarqan, y templuchömi llapankuna tinkuyarqan. Ollqukuna, warmikuna y wamrakunam pishtashqa ofrendata Jehoväpaq apayarqan y fiestata rurayarqan. Kushikïpita büllayanqanqa karu karuyaqmi wiyakaq.

“Imëka armapis contrëki churakaqqa manam imanäshunkitsu” (Isaïas 54:17).