Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Biblia willakunqampita shumaq yachatsikïkuna

 57 KAQ WILLAKÏ

Jehoväpa willakoqnin Jeremïas

Jehoväpa willakoqnin Jeremïas

Judä nacionchö willakunampaqmi Jehoväqa Jeremïasta akrarqan. Yachatsikunampaq y mana alli rurëninkunata mana jaqirqa castïguta chaskiyänampaq kaqta willakunampaqmi mandarqan. Peru Jeremïasqa kënömi nirqan: “Noqaqa jövinllaran kä, manam yachätsu nunakuna jananchö parlëta”. Tsënam Jehoväqa kënö nirqan: “Ama mantsakïtsu, noqam yanapashqëki y parlanëkipaq kaqta nishqëki”.

Nïkurmi Jehoväqa Jeremïasta mandarqan respetashqa nunakunata qayatsinampaq y puntankunachö juk kuntuta ushakäratsir, “kënömi Jerusalen ushakanqa” ninampaq. Y tsëtam Jeremïasqa rurarqan, peru tsë respetashqa nunakunaqa alläpam piñakuyarqan. Pasjur jutiyoq sacerdötinäqa maqarmi usharqan, nïkurmi cëpu nishqanwan ishkan chakinta y ishkan makinta amutsirqan. Y juk paqasmi tsënö katsirqan. Y waränin junaqran libri jaqirirqan. Tsëmi Jeremïasqa kënö nirqan: “Manam aguantëta puëdïnatsu. Mananam willakushaqnatsu”. Peru ¿tsënöku rurarqan? Manam. Alleq pensarirmi kënö nirqan: “Jehoväpa willakïninqa ninanömi noqachö këkan. Manam puëditsu willakïta jaqirita”. Tsëmi Jeremïasqa willakur sïguirqan.

Atska watakuna pasariptinqa juknam Judä nacionpa reynin karqan. Y sacerdötikunawan Diospa willakoqnin tukoqkunaqa Jeremïasta alläpam chikiyaq. Tsëmi dirigentikunata kënö niyarqan: “Kë nunataqa jukllam wanuratsinantsik”. Tsënam Jeremïasqa kënö nirqan: “Wanutsimarqa, mana allitam rurayanki, porqui manam ima jutsatapis rurarqötsu. Noqaqa Jehovä mandamanqanllatam rurä, manam kikïpa munënïtatsu”. Tsënam dirigentikunaqa, “wanutsirqa mana allitam rurashun” niyarqan.

 Jeremïasqa willakurmi sïguirqan, tsëmi sïqa dirigentikuna alläpa piñakuyarqan, y reytam, “wanuratsi” niyarqan. Y reyqa, “imatapis rurakuyë” nirqanmi. Tsëmi tsarïkurnin apakuyarqan y wanunampaqmi leqitäkïkaq pözu rurinman jitarkuyarqan. Y Jeremïasqa hundikarmi qallëkurqan.

Ëbed-Mëlec jutiyoq mandakoq guardiam reyta kënö nirqan: “Dirigentikunaqa juk pözumanmi Jeremïasta jitarkuyashqa. Tsëchö jaqïkushqaqa wanunqam”. Tsënam reyqa mandarqan 30 nunakunata pusharkur Jeremïasta jorqaq ëwanampaq. Jeremïasqa manam ni imanöpapis willakïta jaqirqantsu. ¿Qampis pënö këtaku munanki?

“Jutïrëkurmi qamkunataqa llapan nunakuna chikiyäshunki, peru ushananyaq alli tsarakushqa kaqmi salvakunqa” (Mateu 10:22).