Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Biblia willakunqampita shumaq yachatsikïkuna

 64 KAQ WILLAKÏ

Leonkunamanmi Danielta jitarkuyarqan

Leonkunamanmi Danielta jitarkuyarqan

Tsëpitaqa Media ëwëpita Darïunam Babiloniata gobernarqan. Y cuentatam qokurqan Danielqa yachaq nuna kanqanta, tsëmi mas precisaq kaq nunakunata pëpa cargunman churarqan. Peru tsë nunakunaqa chikiparmi wanutsita munayarqan. Cada junaq Jehoväman kima kuti mañakunqanta musyarirmi Darïuta kënö niyarqan: “Reylläkuna, juk leyta patsëkatsi llapan nunakuna qamllaman mañakayämunampaq. Y tsë leyta mana respetaq kaqqa, leonkuna këkäyanqan uchkuman jitashqa katsun”. Darïuqa allitanömi tsëta rikarqan, tsëmi tsë leyta patsäratsirqan.

Danielqa tsëta musyarirllam wayinman ëwarqan, y ventänanta kichëkurmi qonqurikïkur Jehoväman mañakurqan. Peru chikipaqnin nunakunaqa illaqpita yëkïkurmi mañakïkaqta taririyarqan. Tsëmi reyman ëwëkur kënö willariyarqan: “Danielqa manam cäsushurqunkitsu. Cada junaqmi Diosninman kima kuti mañakun”. Darïuqa amïguntanömi Danielta rikaq y manam munarqantsu wanutsiyänanta. Tsëmi imanö salvanampaq kaqman entëru junaq pensarqan. Peru rey karpis manam puëdeqtsu patsätsishqa leyta cambiëta. Tsëmi llakishqa këkarpis mandakurqan leonkuna këkaqman Danielta jitarkuyänampaq.

 Darïuqa Danielpaq yarpakacharmi tsë paqasqa punïtapis tarirqantsu. Waränin junaqqa jitarkuyanqan uchkuman ëqillapa ëwëkurmi kënö nirqan: “¡Daniel! ¿Diosniki salvashurqunkiku?”.

Danielqa kënö nirmi Darïuta contestarqan: “Jehoväpa angelninmi leonkunapa shiminta tsapashqa, tsëmi imanäyämashqatsu”. Darïuqa alläpa kushikurmi jorqayänampaq mandakurqan. Danielqa mana juk ashpishqam yarqamurqan. Tsënam reyqa kënö mandakurqan: “¡Danielta tumpaq nunakunata tsë uchkuman jitarkuyë!”. Y jitarkuyaptinmi leonkuna mikukurkuyarqan.

Darïuqa jina kënömi mandakurqan: “Llapan nunakunam Danielpa Diosninta respetayänan. Porqui pëmi leonkunapita salvashqa”.

¿Y qamqa? ¿Danielnöku llapan junaqkuna Jehoväman mañakunki?

“Jehoväqa llapan shonqunwan sirweq nunakunata pruëbakunapita salvëta yachanmi” (2 Pëdru 2:9).