Llapan kanqanman ëwari

Qateqnin kaqman ëwë

Jehoväpa testïgunkuna

Quechua (Ancash)

¿Rasumpa kaqta musyëta munankimantsuraq?

¿Rasumpa kaqta musyëta munankimantsuraq?

¿IMA RASUMPA kaqta? Kë witsanchö nunakuna tapukuyanqampita. Itsa qampis kënö tapukushqanki:

  • ¿Diosnintsik kuyakuyamantsiktsuraq?

  • ¿Imëllapis ushakärenqatsuraq wanutsinakïkunawan hipakïkuna?

  • ¿Imaraq pasamantsik wanurishqa?

  • ¿Imataq wanushqakunata shuyaran?

  • ¿Imanöraq mañakushwan Diosnintsik wiyamänantsikpaq?

  • ¿Imanötaq kushikïta tarishun?

¿Kë tapukïkunapita musyanëkipaq imachöraq yachakunkiman? Atska waranqa librokunam kan kë tapukïkunapita yachatsikoqno. Nunakunapa libronkunaqa manam rasumpa kaqta yachatsikuyantsu. Wakin librokunata tsëraq horqarayämuptenqa allitanömi yachatsikuyan, tsëpitaqa mananam välinnatsu, y wakintanam altsapärirllana mushoqtano horqarayämun.

Tsënö kaptimpis, kanmi huk libro rasumpa kaqta y alli kaqta yachatsikoq. Jesucristum mañakurnin kënö nerqan: “Gampa Palabrayquiga rasumpacagmi” (Juan 17:17, Señor Jesucristopa alli willacuynin Nuevo Testamento Conchucos Quechua - Norte). Tsë Palabratam kanan reqintsik Santa Biblia nirnin. Biblia nimanqantsikman confiakunapaqqa, qallananchö këkaq tapukïkunapitam qateqninkunachö yacharatsimäshun.

 ¿Diosnintsik kuyamantsiktsuraq?

¿IMANIRTAQ KËNÖ TAPUKUNTSIK? Nunapura alläpa hipatsinakur, waqatsinakur, llakitsinakur kayanqan witsanchömi kawantsik. Dios munanqanmi kë hipakïkuna nirmi yachatsikuyan wakin religionkunaqa.

BIBLIA YACHATSIKONQAN. Manam Diosqa ni imëpis hipatsikuntsu. Job 34:10 textochömi kënö nin: ‘¡Mana alli rurë, y mana kaqpita hipatsikïpis, Llapan Puëdeq rasumpëpa Diospitaqa karuchömi këkan!’. Kuyakoq karmi Diosnintsikqa munan nunakuna shumaq kawakuyänanta, tsërëkurmi Jesuspis yachatsimarqantsik kënö mañakunapaq: “Sielucho quecaq Dios Yayalläcuna [...]. Llapan nuna mandadiquicho catsun. ¡Sielucho caqcuna qam mandaconqequita rurayanqannolla, que patsachopis nunacuna rurayätsun!” (Mateo 6:9, 10.) Diosnintsikqa rasumpam kuyamantsik, tsërëkurmi imëkata rurashqa llapan munënin rurakänampaq (Juan 3:16).

Hina rikäri Génesis 1:26-28; Santiagu 1:13, y 1 Pedru 5:6, 7.

¿Imëllapis ushakanqatsuraq wanutsinakïkunawan hipakïkuna?

¿IMANIRTAQ KËNÖ TAPUKUNTSIK? Atska nunakunam guerrachö wanuyan. Tukï mana allikuna pasaptinmi alläpa llakikuntsik y waqantsik.

BIBLIA YACHATSIKONQAN. Diosnintsikqa änikushqa Patsachö yamë kawakunapaqmi. Pë ciëlopita gobernar qallëkamuptenqa nunakuna mananam “guërratapis yachakuyanqanatsu y takllapa puntanmanmi espädankunatapis” tikraratsiyanqa (Isaías 2:4). Hinamampis, paqwëmi Diosqa ushakäratsenqa llapan hipakïkunata. Nunakupaq kënömi Biblia nimantsik: “Mananam waqayanqanatsu ni llaquiyanqanatsu, mananam imancunapis nananqanatsu, ni wanuyanqanatsu. Porqui tse [llakikïkuna y hipakïkuna] sufrimientucunaqa ushacärishqanam” (Apocalipsis 21:3, 4).

Hina rikäri Salmo 37:10, 11; 46:9, y Miqueas 4:1-4.

¿Imaraq pasamantsik wanurishqa?

¿IMANIRTAQ KËNÖ TAPUKUNTSIK? Nuna wanuriptin alman kawëkanqantam wakin religionkunachö yachatsikuyan. Wanushqakunaqa mantsakätsimantsik o imatapis rurëkamantsikmi niyanmi wakinkunaqa, y mana alli ruraqkunatam infiernochö Dios imëyaqpis hipatsenqa niyanmi.

BIBLIA YACHATSIKONQAN. Wanorqa paqwëmi ushakärintsik. Eclesiastés 9:5 textochömi kënö nin: “Wanushqakunaqa manam imatapis musyayannatsu”. Manam nï imata musyayannatsu, ni mäkuyannatsu, ima rurëta puëdeyannatsu, y kawëkaqkunata yanapayantsu ni imanayantsu (Salmo 146:3, 4).

Hina rikäri Génesis 3:19 y Eclesiastés 9:6, 10.

 ¿Imataq wanushqakunata shuyaran?

¿IMANIRTAQ KËNÖ TAPUKUNTSIK? Llapan kuyanqantsikkunawanmi shumaq kawakïta munantsik. Tsëmi wanushqa kastantsikkuna kawariyämunanta munantsik.

BIBLIA YACHATSIKONQAN. Atskaq wanushqakunam kawariyämonqa. Tsëmi Jesus änikorqan, “chämonqam junaqcuna parlashqäcunata wanushqacuna wiyarirnin, cawariyämunan” (Juan 5:28, 29). Llapan kawarimoqkunaqa kë Patsachömi täräyanqa y shumaq huertaman tikrareqtam rikäyanqa, puntata Diosnintsik munanqannö (Isaías 65:21-25). Tsë shamoq kawëchöqa, Diosta kuyaq nunakuna mana qeshyashpa y mana wanushpam kawakuyanqa. Bibliachömi kënö nin: “Patsachöqa alli nunakunallam täräyänqa, y wiñeypaqmi tsëchö kawayanqa” (Salmo 37:29).

Hina rikäri Job 14:14, 15; Lucas 7:11-17, y Hechos 24:15.

¿Imanötaq mañakushwan Diosnintsik wiyamänapaq?

¿IMANIRTAQ KËNÖ TAPUKUNTSIK? Llapan religionkunachönömi nunakuna mañakuyan. Tsënö kaptimpis llapanmi niyan, Dios wiyantsuraq o manatsuraq mañakonqäta.

BIBLIA YACHATSIKONQAN. Jesusqa yachatsikorqan huk nenqantsikllata kutin kutin mana mañakunapaqmi. Kënömi nerqan: “Ama mañacuyanquitsu Diosta mana cäsucoq nunacunanoqa. Pecunaqa mañacurnin, juc parlayashqanllatam cutïcuryan ushepa ushar parlacuyan” (Mateo 6:7). Diosnintsik wiyamänantsikta munarqa, Pë munanqanmannömi mañakunantsik. Tsëpaqqa Dios munanqampitam yachakunantsik, munanqanmannö mañakunapaq. Y 1 Juan 5:14 textochömi nimantsik: “Sitsun pe munashqanno imatapis mañacushun, wiyamäshunmi”.

Hina rikäri Salmo 65:2; Juan 14:6, y 1 Juan 3:22.

¿Imanötaq kushikïta tarishun?

¿IMANIRTAQ KËNÖ TAPUKUNTSIK? Atska qellëyoq këta, reqishqa këta, o alläpa shumaqllan këta asherqa, kushishqam kakushaq niyanmi wakinqa, tsëmi tsëllata ashikuyan. Mëlaya tsëkunata ashirpis manam kushishqallaqa kawayantsu.

BIBLIA YACHATSIKONQAN. Kushikïta imanö tarinapaqpis Jesusqa kënömi nerqan: “Kushishqam kayan Diosta wanaqkunaqa” (Mateo 5:3, NM). Rasumpa kushishqaqa kashun, këkunata rurarmi: Diospita rasumpa kaqta yachakurnin y noqantsikpaq munanqampitawan yachakurnin. Tsë rasumpa kaq yachatsikïqa Bibliachömi këkan, y yachakonqantsikqa yanapamäshun ima alli kanqanta y ima mana alli kanqanta reqinapaqmi. Biblia nenqannö imatapis rurashqaqa, kawënintsik más allim kanqa (Lucas 11:28).

Hina rikäri Proverbios 3:5, 6, 13-18 y 1 Timoteu 6:10.

 Biblia contestanqan hoqta tapukïkunallatam yachakurerqontsik. ¿Más yachakurita munankimantsuraq? Wakinkunanö qampis ‘Diosta wanarqa’, maschi yachakïta munëkanki. Itsa kënöpis tapukunki: “Dios kuyëkämarnintsikqa, ¿imanirtaq kananyaq haqishqa hipakïkuna, y tukïläya mana allikuna kananta?”. Itsa yachakïta munanki familiëkiwan más alli kawayänëkipaq. Llapan tapukïkunatam Bibliaqa paqwe yachatsimäshun.

Tsënö kaptimpis, atskaq nunakunam Bibliapita yachakïta munayantsu. Leinapaq alläpa atska kanqanta y mana yachakunapaqtanömi rikäyan. Bibliapita maslla yachakunëkipaq, ¿yanapayäshunëkita munankimantsuraq? Jehovapa testigonkunam kënöpa yanapayäshunki:

Hukmi, Rasumpëpaqa, ¿imatataq Biblia yachatsikun? libro, këtaqa rurayämushqa —atska rurakïyoq nunakunata yanapanampaq— imatapis tapukuyanqanta Bibliapita yachakuyänampaqmi. Y huknin kaqnam, Bibliapita devaldilla wayichö yachatsikï. Jehovapa testigonmi wayikiman shamonqa o mëmampis yachakïta munanqëkiman, tsënöpa llapan semänakuna Bibliapita shumaq yachatsishunëkipaq. Atska nunakunatam kë yachatsikï yanapashqa, y kananqa rasumpa kaqta tarishqa karmi alläpa kushishqa kayan.

Qampis yachakunkim Biblia rasumpa kaqta yachatsikonqan, imapitapis más väleq kanqanta. Mana alli creenciakunallapitatsu, ni pantashqa, ni mantsakashqa kakïllapitatsu horqamantsik, hina yachatsimantsikmi shamoq kawëchö kushishqa kawakunapaqpis. Kikin Jesusmi kënö nerqan: “Tsenam rason caqta musyariyaptiqui, tse rason caq librariyäshunqui” (Juan 8:32).