Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Kutikamunëkitam Jehoväqa munan

 2 KAQ

¿Yarpachakïyoqku karqunki?​—Imëka problëmakunapam pasantsik

¿Yarpachakïyoqku karqunki?​—Imëka problëmakunapam pasantsik

“25 watapa casädu këkarmi qowäwan divorciakuriyarqä. Wamräkunanam Jehoväta jaqiriyarqan y noqanam qeshyar qallëkurqä. Tsënam alläpa yarpachakïwanna mas qeshyarirqä. Llapan kawënï ushakärishqa kanqantam sientirirqä y imatapis ruranäpaqqa kallpäpis mananam karqannatsu. Tsëmi noqapis reunionkunaman y yachatsikoq ëwëta jaqirirqä.” (June)

LLAPAN nunakunam yarpachakïyoq kayan, hasta Diospa sirweqninkunapis. Tsëmi Salmu qellqaq kënö nirqan: “Imëkapaq yarpachakïnïkuna noqachö alläpa kaptinmi, shoqakïniki almäta shullpapar qallëkurqan” (Salmu 94:19). Y Jesusnam nirqan ‘que bidacho imecapaqpis yarpacachecuna’ kaptin kë ushanan junaqkunachö Jehoväta sirwinan sasa (aja) kanampaq kaqtam (Lücas 21:34). ¿Qellëniki pishiptinku, familiëkichö problëma kaptinku o qeshyapäkurninku alläpa yarpachakïyoq këkanki? ¿Imanötaq Jehovä yanapashunkiman?

‘Teyta Diospa podernin’

Yarpachakïkunata vencinapaqqa jukpa yanapakïnintaran wanantsik. Apostol Pablupis Jehoväpa yanapakïnintaran wanarqan, tsëmi kënö nirqan: “Ima eca pasayämaptinpis [manam] ishquiyäraqtsu. Llaquiquicuna chämuptinpis tsaraquicäyamï”. Awmi, Jehovämi poderninwan yanaparqan (2 Corintius 4:7-9).

¿Yarpankiku Jehovä poderninwan imanö yanapashunqëkita? Itsa juk shumaq discursuwan rikätsishurqëki alläpa kuyashunqëkita. O itsa yarpanki juk paraïsu kanampaq kaqta nunakunata yacharatsiptiki markäkïniki mas sinchiyanqanta. Reunionkunaman ëwanqantsik y yachatsikoq yarqunqantsikqa yarpachakïkunata vencinapaq y Jehoväta kushishqa sirwinapaqmi yanapamantsik.

“Jehovä alli kanqanta rikäyë y kushikuyë”

Rasunmi, Jehoväqa Gobiernunta puntata ashinata y pëpa rurëninchö imëpis këkänata shuyaran (Mateu 6:33, NM; Lücas 13:24). Peru itsa qeshyapäkunqëki, familiëkichö problëma kanqa o kastëkikuna y amïguïkikuna Jehoväta sirwinëkita michäkuyanqan kallpannaqta jaqirishurqunki. O itsa trabäjurëkur reunionkunaman ëwëta puëdinkitsu. Tsëqa itsa atska rurënikikunata ruranëkipaq tiempu mana tinkuptin y kallpëki mana kaptin alläpa utishqa sientikunki. Tsëqa hasta pensarqunkichi Jehovä alläpa mañëkäshunqëkita.

Peru Jehoväqa musyanmi imanö sientikunqëkita, y rurëta mana puëdinqëkitaqa manam mañashunkitsu. Entiendinmi alläpa utishqa këkanqëkipita alliyänëkipaqqa, tiemputaraq wananqëkita (Salmu 103:13, 14).

Elïasta Jehovä imanö cuidanqanman pensari. Juk kutim alläpa mantsapakurir rurëkanqanta jaqirir tsunyaq jirkata ëwakurqan. ¿Peru imatataq Jehovä rurarqan? ¿Culpayoq kanqantaku  rikätsirqan? ¿“Ruranëkipaq kaqman ras kuti” nirku mandarqan? Manam. Tsëpa rantinqa, ishkë kutipam juk angelta mandarqan shumaq riyarkatsir (rikcharkatsir) mikïnin qaranampaq. Peru tsëpita 40 junaqkunana pasashqa këkaptimpis Elïasqa llakishqallaraqmi këkarqan. ¿Ima mastataq Jehovä rurarqan yanapanampaq? Puntataqa, imëkapita tsapänampaq kaqtam rikätsirqan. Tsëpitanam, shumaq kuyëllapa parlapar shoqarqan. Jina japallanlla mana sientikunampaqmi, adoraqninkuna mëtsikaqraq kayanqanta rikätsirqan. Tsënam Elïasqa yapë kallpayoq tikrarirqan kushishqa sirwir sïguinampaq (1 Rëyes 19:1-19). ¿Tantiyarqunkiku? Elïas alläpa yarpachakïyoq kar llakishqa këkaptinmi, Jehoväqa pacienciawan y kuyëpa yanaparqan. Jehoväqa punta kanqannöllam. ¡Qamtapis Elïastanömi precisaqpaq churashunki!

Ama punta ruranqëkiwan kanan ruranqëkita igualatsitsu. Yarpanëkim, hasta juk cörreqpis atska tiempupa cörrita jaqirirqa puntatanöna cörrita mana puëdinqanta. Tsëmi qampis rurëta puëdinëkipaq kaqkunata ichikllapa ichikllapa rurëta qallanëki hasta yachakanqëkiyaq. Cristiänukunaqa imëka cörreqkunanömi kantsik, tsëmi imatapis logranapaqqa mana jaqita ruranantsik (1 Corintius 9:24-27). ¿Pensarqunkiku imakunata rurar qallanëkipaq kaqta? Itsa mëqan reunionllamampis ëwanëkipaq churakankiman y yanapashunëkipaqna Jehoväta mañakunkiman. Ichikllapa ichikllapa masta ruranqëkimannömi “Jehovä alli kanqanta” rikärinki (Salmu 34:8). Y yarpanëkim Jehoväta kuyanqëkirëkur imëkallatapis ruranqëkita alläpa valuranqanta (Lücas 21:1-4).

Jehoväqa rurëta mana puëdinqëkitaqa manam mañashunkitsu

‘Wanëkanqä yanapakïmi karqan’

¿Imanötaq Jehovä yanaparqan qallananchö parlanqantsik June panita? Kikinmi kënö willakun: “Jehovämanmi mana jaqipa mañakurqä yanapëkamänampaq. Juk kutin llumtsïnï nimarqan markächö asamblëa kanampaq kaqta, tsëmi mëqan junaqllamampis ëwanapaq decidirirqä. ¡Alläpa shumaqmi karqan Jehoväpa markanchö yapë këqa! Kë asamblëam wanëkanqä yanapakï karqan. Kananqa yapëmi Jehoväta sirwikä y alläpa kushishqam sientikö. Yachakurqömi cristiänu mayïkunapita rakikëqa mana alli kanqanta y pëkunapa yanapakïninkunata wananqäta. Jehoväpa piñakïnin manaraq chämuptin markanman kutinqätaqa alläpam kushikö”.