Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Kutikamunëkitam Jehoväqa munan

 1 KAQ

“Oqrakashqa kaqtaqa ashishaqmi”

“Oqrakashqa kaqtaqa ashishaqmi”

Juk üsham, kastankunawan mikïkarnin cuentata mana qokushpa kastankunapita rakikärin. Mananam rikannatsu üsha mayinkunata ni mitseqnintapis. Ëtsa mikoq animalkuna kayanqan sitiuchömi japallanlla tikrarin y tardiyärishqanam. ¡Pasëpa oqrakashqam këkan! Peru tsënö këkarmi, ¡mitseqnimpa vozninta wiyarin! Mitseqninqa cörripa ëwarmi kushishqa mellqakurkun y röpanwan shumaq piturkur wayinta apakun.

JEHOVÄQA kutin kutinmi juk kuyakoq mitsikoqnö kanqanta nimantsik. Y Palabranchömi kënö nimantsik: “Rasumpëpam, üshäkunata ashishaq y cuidashaq” (Ezequiel 34:11, 12).

“Üshäkunataqa cuidashaqmi”

¿Pikunataq kayan Jehoväpa üshankuna? Pëta kuyaq y adoraq nunakunam. Tsëmi Biblia kënö nin: “Yëkayämï, adorashun y puktishun, qonqurikushun Kamamaqnintsik Jehoväpa puntanman. Porqui pëmi Diosnintsik. Noqantsiknam akrashqan nunakuna y makinchö këkaq üshakuna kantsik” (Salmu 95:6, 7). Jehoväta adoraqkunaqa, imëka üshanömi mitseqnimpa qepanta ëwëta munayan, peru höraqa manam puëdiyantsu. Tsëmi, üshanöpis witsikashqa, rakikashqa o oqrakashqa këkäyan (Ezequiel 34:12; Mateu 15:24; 1 Pëdru 2:25). Tsënö kaptimpis, pillapis rakikäkuriptinqa manam jaqirintsu ni chipyëpa oqrakashqatanönatsu rikan.

 ¿Qamqa sientinkiku juk mitsikoqnö Jehovä cuidëkäshunqëkita? ¿Imanötaq kanan witsan juk mitsikoqnö cuidamantsik?

Kuyëpam yachatsimantsik. Jehovämi nin: “Alli qewakunachömi mitsishaq”. Y “tsëchömi alli kaq qewakunachö jamayanqa y mishkeq qewakunatam mikuyanqa” (Ezequiel 34:14). Jehoväqa imëpis wananqantsik hörachömi, imëka mikï cuentata shumaq yachatsikïkunata qomantsik. ¿Yarpankiku mañakïnikita Jehovä imanö contestamunqanta? ¿Revistapa juk yachatsikïninwanku, juk discursuwanku o juk vidëuwanku yanapashurqëki? ¿Manaku Jehovä qamman yarparëkanqanta cuentata qokurirqëki?

Yanapamantsik y mana allikunapitam tsapämantsik. Jehovämi kënö änimantsik: “Witsikashqa kaqtam yapë kutitsimushaq, y pakikushqa kaqpatam herïdanta watapushaq y nanatsikoq kaqtanam sinchiyätsishaq” (Ezequiel 34:16). Jehoväqa dëbil kaqta y alläpa yarpachakïyoq kar llakishqa sirweqninkunatam kallpata qon. Y pipis mana allita rurashqa kaptin o cristiänu mayin mana allita rurashqa kaptinqa, herïdanta watapoq cuentam yanapan. Jina jutsata rurayanqanrëkur mana alli sientikoqkunatam congregacionman kutiyämunampaq yanapan.

Oqrakashqa këkashqapis ashimantsikmi. Jehovämi nin: “Witsikar ëwakuyanqan sitiukunapitam salvamushaq” y “oqrakashqa kaqtam ashimushaq” (Ezequiel 34:12, 16). Oqrakashqa kaqkunataqa, Jehoväqa manam chipyëpa oqrakashqatanönatsu rikan. Pëqa cuentata qokunmi mëqan sirweqnimpis oqrakaptin, tsëmi ashin y taririrninqa alläpam kushikun (Mateu 18:12-14). Tsëmi sirweqninkunataqa, “cuidanqä üshäkuna” nir qayan (Ezequiel 34:31). ¡Qampis tsë cuidanqan üshanmi kanki!

Oqrakashqa kaqkunataqa, Jehoväqa manam, chipyëpa oqrakashqatanönatsu rikan. Taririrninqa alläpam kushikun

“Unë kayanqänölla kayänäpaq yanapëkayämë”

¿Musyankiku pëman kutinëkipaq Jehovä imanir invitëkäshunqëkita? Kushishqa kanëkita munarmi. Pëqa änikun üshankunata bendicinampaqmi (Ezequiel 34:26). Y qamqa alleqmi musyanki änikunqanta cumpleq kanqanta.

¿Yarpankiku yachakunqëkimannö Jehoväta mas reqir imanö sientikunqëkita? Pensari, ¿imanötaq sientikurqëki Diospa jutinta musyarirnin y nunakuna alli kawakuyänampaq imakunata ruramunampaq kaqta musyarirnin? ¿Yarpankiku asamblëakunachö cristiänu mayikikunawan juntu kanqëki imanö yanapashunqëkita? ¿Jina yarpankiku nunakunata Bibliapa shumaq willakïninkunata willarirnin wayikita alläpa kushishqa kutirinqëkita?

Tsënöqa yapëpis sientikunkimanmi. Tsënö sientikïta munarninmi Jehoväpa unë sirweqninkunapis kënö mañakuyarqan: “Qam kaqman kutiyämunäpaq yanapëkayämë [...], y kutikayämushaqmi; unë kayanqänölla kayänäpaq yanapëkayämë” (Lamentaciones 5:21). Tsë mañakïninkunataqa Jehovä contestarqanmi y yapëmi kushishqa sirwiyarqan (Nehemïas 8:17). ¡Qamtapis tsënöllam yanapashunki!

Tsënö kaptimpis, Jehoväman kutita munaqkunapaqqa manam fäciltsu kanqa. Qateqnin kaqchömi rikäshun imakuna kanqanta y imanö venciyänampaq kaqta.