Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Kutikamunëkitam Jehoväqa munan

Jehoväpa Testïgunkunata Pushaqkunapa cartan

Jehoväpa Testïgunkunata Pushaqkunapa cartan

Kuyashqa wawqi (pani):

Musyanqëkinöpis, Bibliaqa parlan noqantsiknölla sentimientuyoq y problëmakunapa pasashqa ollqukunapaq y warmikunapaqmi (Santiägu 5:17). Wakinkunaqa problëmapa pasarmi alläpa yarpachakuyarqan o Diosta sirweq mayinkuna lluta tratayaptinmi llakikuyarqan. Y mëtsikaqmi jutsata rurayanqankunapita mana alli sientikuyarqan.

Peru ¿kë markäkïyoq nunakunaqa chipyëpaku Jehoväta jaqiriyarqan? Manam. Mëtsikaqmi Salmu libruta qellqaq nunanö kayarqan, pëmi mañakïninchö kënö nirqan: “Oqrakashqa üshanömi purirqö. Sirweqnikita asheq shamïkullë, porqui leynikikunataqa manam qonqarqötsu” (Salmu 119:176). ¿Imëllapis tsënö sientikurqunkiku?

Jehoväqa markampita rakikaq üshankunataqa manam imëpis qonqantsu. Antis asheqmi ëwan; hörataqa congregacionchö wawqikunawanmi ashitsin. Yarpäshun Jobta Jehovä imanö yanapanqanman. Kë nunaqa alläpa desgraciakunapam pasarqan, llapan kapunqanmi ushakarqan, kuyashqa tsurinkunam wanuyarqan y alläpa feyupam qeshyarqan. Jina markäkunqan nunakunam, mana alli tratayarqan. Jehoväpa contran mana churakashqa karpis, juk tiempuqa tsë desgraciankuna Jehoväpita shamunqantam pensarqan (Job 1:22; 2:10). ¿Imanötaq Jehovä yanaparqan pensanqan mana alli kanqanta cuentata qokunampaq?

Juknöpaqa yanaparqan, sirweqnin Elihü nunawanmi. Elihüqa Job llapan llakikïninkunapita willaptinmi, puntataqa alleq wiyarqan tsëpitanam parlapärirqan. Peru ¿imataraq ninman karqan? ¿Juzganmantsuraq karqan? ¿Penqakatsirtsuraq culpayoq kanqanta sientikatsir piñapanman karqan? ¿O pëpita mas yachaq kanqantatsuraq ninman karqan? Manam. Jehoväpa santu espïritun yanapaptinmi Elihüqa kënö nirqan: “Qampis y noqapis Diospa rikënimpaqqa igual-llam kantsik, noqapis mitullapita rurashqam kä”. Tsëpitanam ninampaq kaqpita mana mantsakunampaq nirqan (Job 33:6, 7). Jobta mas llakitsinampa rantinmi, kuyëllapa shumaq consejarirqan y kallpata qorqan.

Tsënöllam noqakunapis yanapënikita munar kë publicacionta rurayämurqö. Puntataqa, congregacionpita rakikashqa wawqikunata y panikunatam shumaq wiyayarqö y imakunapa pasayanqanmanmi yarpachakuyarqö (Proverbius 18:13). Tsëpitanam, tsënöpa pasaq sirweqninkunata Jehovä imanö yanapanqampita Bibliachö willakïkunata ashiyarqö, tsëpaqqa Jehovätam mañakuyarqö. Y tsëpitanam, kë follëtuta jorqayämunäpaq, Bibliachö tariyanqa willakïninkunata igualatsiyarqö kanan witsan pasakïkanqankunatawan. Tsëmi kuyashqa wawqi o pani, kë follëtuta leyirinëkita alläpa munëkuyä.

Jehoväpa Testïgunkunata Pushaqkuna