LÜCAS 2:1-20

  • BELENCHÖ JESUS YURIN

  • JESUS YURIRIPTINLLA MITSIKOQKUNA RIKAQ ËWAYAN

Römata gobernaq Cësar Augustum, llapan nunakuna inscribikuyänampaq mandakurqan. Belenchö Josë yurikushqa kaptinmi, Marïawan tsëman inscribikoq ëwayarqan, tsë markaqa Jerusalenpa ura kaq lädunchömi këkarqan.

Inscribikoq ëwaq nunakunawanmi Belenqa junta këkarqan. Tsëmi posadakuyänampaq sitiu manana kaptin, Josëwan Marïaqa animalkuna punuyänan wayillachö quedakuyarqan. Tsëchömi Jesusqa yurikurqan. Marïaqa, animalkunata mikïninkuna qarayänan cäjallamanmi ratashkunawan wankurir punuratsirqan.

Nunakuna inscribikoq ëwayänampaq Cësar Augustu mandakunqanqa Diospitam karqan. ¿Imanirtaq tsënö nintsik? Porqui Diospa Palabranqa willakushqanam karqan Dios änikunqan reyqa Belenchö yurinampaq kaqta (Miquëas 5:2). Inscribikuyänampaq Cësar Augustu mandakunqanrëkurmi, unë kastan rey Davidpa Belen markanchö Jesusqa yurikurqan.

Tsë paqasqa alläpa espantakïpaqkunam pasakurqan. Mitsikoqkuna sächikïkäyaptinmi alläpa chipapaq aktsi atsikyëkurqan. ¡Tsëqa Jehoväpa aktsinmi karqan! Juk angelmi pëkunata kënö nirqan: “Ama mantsakäyëtsu, porqui ¡rikäyë!, llapan nunakunata kushitsinampaq kaq alli willakïkunatam qamkunata willayaq. Porqui kananmi Davidpa markanchö salvayäshoqnikikuna yurikushqa, pëqa Señor Cristum. Y kë señalmi reqiyänëkipaq yanapayäshunki: juk llullutam tariyanki vendanö ratashkunawan wankushqata y animalkunata mikï qarayänanchö iskarëkaqta”. Tsëpitanam, mëtsikaq angelkuna yurirkuyarqan y kënö niyarqan: “Ciëluchö Dios alabashqa katsun, y pëpa rikëninchö alli këkaqkunapaq patsachö yamë kë katsun” (Lücas 2:10-14).

Angelkuna ëwakuyaptinnam, mitsikoqkunaqa kënö ninakuyarqan: “Jinan höra aku Belenta ëwashun, y Jehovä musyatsimanqantsiknö ima pasakushqa kanqanta rikämushun” (Lücas 2:15). Llulluta rikaqmi ras ëwayarqan y angel willakunqannöllam taririyarqan. Angel ninqanta mitsikoqkuna willakuyaptinmi nunakunaqa alläpa espantakuyarqan. Peru Marïaqa niyanqantam yarpararqan, y shonqunchömi tsëkunapaq yarpachakur karqan.

Kanan witsanqa mëtsikaq nunakunam 25 de diciembri Jesus yurinqanta creiyan. Peru Belenchöqa, diciembri killa witsanqa alläpam alalan y tamyanmi. Y höraqa rashtanmi. Mitsikoqkunaqa manachi tsë killa witsankunaqa paqasnimpi sächikur këkäyanmantsu karqan. Jina Cësar Augustupis manachi tsë alalë tiempuchö nunakuna contran churakëta munëkäyaptinqa, inscribikoq ëwayänampaqqa mandakunmantsu karqan. Tsëmi cläru rikätsimantsik Jesusqa juk killachö yurikushqa kanqanta, itsa octubri killachö.