MATEU 20:17-28 MARCUS 10:32-45 LÜCAS 18:31-34

  • WANUNAMPAQ KAQTA JESUS YAPË MUSYATSIKUN

  • PRECISAQ KËTA MUNAYANQAMPITA APOSTOLNINKUNATA YAPË PARLAPAN

Jesuswan qateqninkunaqa Perëapa viajarninmi sïguiyarqan, Jordan mayuta tsimparirmi Jericöpa amänunman chäriyarqan. Jerusalenmanqa ichikllachönam chäriyänan karqan. 33 wata Pascua fiestapaqmi atskaq nunakuna pëkunawan ëwëkäyarqan.

Jesusqa, Pascua fiesta manaraq qallaptin chëta munarmi, qateqninkunapa puntanta ëwarqan. Peru qateqninkunaqa tsëman ëwëta mantsayarqanmi, porqui Läzaru wanuriptin y Perëapita Judëaman ëwanampaq Jesus niptinmi, Tomasqa, “noqantsikpis ëwashun pëwan juntu wanunapaq” nishqa karqan (Juan 11:16, 47-53). Tsëmi Jerusalenman ëwëtaqa alläpa mantsayarqan.

Jerusalenchö pëkunata ima pasanampaq kaqta entienditsita munarmi, apostolninkunata Jesus kënö nirqan: “Jerusalenmanmi witsëkantsik, y nunapa Tsurinqa precisaq sacerdötikunapa y Ley qellqaqkunapa makinmanmi entregashqa kanqa. Pëkunam wanutsiyänampaq condenayanqa y juk nacion nunakunatam entregayanqa pëpita burlakuyänampaq, astayänampaq y qeruchö wanutsiyänampaq, y kima junaqtam sharkatsishqa kanqa” (Mateu 20:18, 19).

Këwanqa kima kutinam wanunampaq y kawarimunampaq kaqta qateqninkunata nishqa karqan (Mateu 16:21; 17:22, 23). Peru tsë kutiqa, qeruchö wanutsiyänampaq kaqtam pëkunata willarqan. Tsëta wiyëkarpis qateqninkunaqa manam Jesus ima nita munëkanqanta entiendiyarqantsu. Itsachi pëkunaqa Israelchö gobiernu yapë patsakänampaq kaqman y Cristuwan juntu Patsachö gobernayänampaq kaqman masqa yarpachakïkäyarqan.

Salomëpis pëkunawanmi ëwëkarqan, itsachi pëqa Santiägupawan Juanpa maman karqan. Tsë ishkan apostolninkuna imatapis raslla rurareq  kayaptinmi, Jesusqa “Boanerges” nir jutinkuna churashqa karqan, tsëqa, “Räyupa Tsurinkuna” ninanmi (Marcus 3:17; Lücas 9:54). Unëpitanam pëkunaqa Cristupa Gobiernunchö precisaq sitiuchö täkïta munashqa kayarqan, y tsëtaqa mamampis musyarqanmi. Tsëmi Salomëqa, juk favorta mañakunampaq Jesus kaqman witïkur puntanman qonqurikurqan. Tsënam Jesusqa, “¿imatataq munanki?” nirqan. Pënam, “ishkan wamräkuna Gobiernïkichö juknin derëcha kaq lädïkiman y jukninna itsoq kaq lädïkiman täkuyänampaq änïkallämë” nirqan (Mateu 20:20, 21).

Rasumpa kaqchöqa, Santiäguwan Juanmi tsëtaqa munëkäyarqan. Jesusqa tsëllaran nirishqa karqan alläpa penqakatsirnin wanutsiyänampaq kaqta, tsëmi pëkunata kënö nirqan: “Qamkunaqa manam musyayankitsu imata mañakïkäyanqëkita. ¿Puëdiyankiku noqa upunäpaq kaq cöpapita upïta?”. Pëkunanam, “puëdiyämi” niyarqan (Mateu 20:22). Pëkunaqa manachi imata nita munëkanqantaqa entiendiyarqantsu.

Imanö kaptimpis, Jesusqa kënömi nirqan: “Änirpis cöpäpitaqa upuyankim, peru derëcha kaq lädüman o itsoq kaq lädüman pï täkunampaq kaqqa, manam noqapitatsu, sinöqa, Teytä akranqan kaqkunallapaqmi” (Mateu 20:23).

Santiäguwan Juan mañakïkäyanqanta chunka apostolkuna musyarirqa, alläpam piñakuyarqan. Itsachi Santiäguwan Juanqa tsë asuntupaq llapankuna pleytuyanqanchö precisaq këta munayanqanta mana penqakushpa rikätsikushqa kayarqan (Lücas 9:46-48). Imanö kashqa kaptimpis, 12 apostolkunaqa clärum rikätsikuyarqan mana precisaqnölla portakïpaq Jesus consejakunqantaqa, ni mëqampis mana cäsukuyanqanta. Precisaq këtaqa munëkäyarqanllaran.

Tsëta rikarmi, Jesusqa 12 apostolninkunata qayarirnin, kuyëpa kënö consejarqan: “Qamkunaqa musyayankim nacionkunata gobernaqnö reqishqa kaqkunaqa puëdeq këninkunata rikätsikuyanqanta, y precisaqnin kaqkunaqa nunakunata mandädunkunachö katsiyanqanta. Peru qamkunachöqa manam tsënötsu kanan; tsëpa rantinqa, qamkunachö pipis precisaq këta munaqqa, qamkunapa sirweqnikikunam kanan, y qamkunachö pipis puntachö këta munaqqa, llapëkikunapa sirweqnikikunam kanan” (Marcus 10:42-44).

Tsëpitanam, kikin ruranqannölla rurayänampaq parlarnin qateqninkunata Jesus kënö nirqan: “Nunapa Tsurimpis manam sirwishqa kanampaqtsu shamushqa, sinöqa sirwikoq kanampaq y kawëninwan chaninta pagakur mëtsikaqta libranampaqmi” (Mateu 20:28). Jesusqa kima watanönam wakinkunata sirwirnin këkarqan, y tsëtaqa nunakunarëkur wanunqanyaqmi rurarnin sïguirqan. Tsëmi qateqninkunapis Jesusnölla kayänan karqan. Sirwishqa këta y precisaq këta munayänampa rantinmi, wakinkunata sirwiyänampaq y mana precisaqnölla portakuyänampaq listu këkäyänan karqan.