MATEU 19:1-15 MARCUS 10:1-16 LÜCAS 18:15-17

  • DIVORCIAKÏTA DIOS IMANÖ RIKANQANTA JESUS ENTIENDITSIKUN

  • SOLTËRULLA KAKÏQA JUK QARËMI

  • WAMRAKUNANÖMI KANANTSIK

Jesuswan qateqninkunaqa Galilëapita yarqurirmi, Jordan mayuta tsimparir Perëapa ëwëkäyarqan. Perëachö yachatsikunqan witsannam, divorciu asuntuta Dios imanö rikanqampaq Jesusqa fariseukunata entienditsishqa karqan (Lücas 16:18). Peru yapëmi pruëbaman churëta munar divorciu asuntupaq tapuyarqan.

Juk nuna warminchö “ima mana allitapis” tarirqa divorciakïta puëdinqantam Moisesqa qellqashqa karqan (Deuteronomiu 24:1). Imakunarëkur divorciakïta puëdiyanqampaqqa tukïtam niyaq. Wakinqa mana precisaq asuntukunarëkurpis divorciakïta puëdiyanqantam niyaq. Tsëmi fariseukunaqa, “¿alliku kanman juk nuna ima asuntullapitapis warmimpita divorciakurinan?” nir tapuyarqan (Mateu 19:3).

Jesusqa manam nunakuna niyanqanmannötsu pëkunata contestarqan. Casädu kawakïta Dios imanir patsätsinqantam kënö nir entienditsirqan: “¿Manaku leyiyarqunki qallananchö nunakunata kamaqqa ollquta y warmita ruranqanta, y kënö ninqanta: ‘Tsëmi ollquqa teytanta y mamanta jaqirinqa y warminman laqakanqa, y ishkankunam juk ëtsallana kayanqa’? Tsëmi, ishkaqnatsu kayan, sinöqa juk ëtsallanam. Tsënö këkaptinqa, juk yüguman Dios juntanqantaqa, ama ni pipis rakitsuntsu” (Mateu 19:4-6). Tsënöpam Adantawan Ëvata casatsirqa, pipis mana rakinampaq kaqta Diosqa cläru rikätsikurqan.

Peru fariseukunaqa manam Jesus ninqanwan acuerdutsu kayarqan, tsëmi kënö tapuyarqan: “Tsëqa, ¿imanirtaq Moisesqa nirqan divorciu papelnin qoykurnin pipis warmimpita rakikäkurinampaq?” (Mateu 19:7). Tsënam Jesus kënö nirqan: “Chukru shonqu kayaptikim Moisesqa permitirqan warmikikunapita divorciakuyänëkita, peru qallananchöqa manam tsënötsu karqan” (Mateu 19:8). ‘Qallananchö’ nirqa, manam Moisespa tiempumpaqtsu parlëkarqan, sinöqa Eden huertachö casädu kawakïta Dios patsätsinqan tiempupaqmi.

Tsëpitanam juk alläpa precisaq asuntupaq kënö nirqan: “Noqam niyaq, pipis majan rakcha rurëman [griëgu idiömachöqa pornëia ninmi] mana ishkishqa këkaptin warmimpita divorciakurir jukwan casakoq kaqqa, mana majanwan oqllanakïmanmi ishkishqa” (Mateu 19:9). Clärum këkan, pipis divorciakïtaqa puëdin majan rakcha rurëman ishkishqa kaptinllam.

Tsëmi qateqninkunaqa kënö niyarqan: “Ollquwan warmi tsënö kayänan këkaptinqa, manam conviënintsu casakï” (Mateu 19:10). Tsëmi, pipis casakïman pensëkarqa, casädu kawakïqa imëyaqpis kanampaq kaqman pensanan.

Tsëpitanam Jesusqa soltëru këpaq parlarqan. Wakinqa tsënö yurikushqa karshi japallankuna kakuyan, juk parlakïchöqa, piwampis oqllanakïta puëdiyantsu, wakinnash, nunakuna kapashqa kayaptin japallankuna kakuyan, y wakinnash, Diosta mas sirwita munar oqllanakï munëninkunata dominayan. Tsëpitanam kënö nirqan: “Pipis japallan këta puëdeq kaqqa, japallan kakutsun” (Mateu 19:12).

Tsënö parlëkaptinmi, nunakunaqa Jesus kaqman wamrankunata apar qallëkuyarqan. Peru qateqninkunaqa itsachi Jesusta fastidiayänanta mana munar pëkunata piñaparnin qallëkuyarqan. Tsëta rikëkurnam qateqninkunata Jesus kënö nirqan: “Wamrakuna noqaman shayämunanta jaqiyë, y ama michëta tïrayëtsu, porqui Diospa Gobiernunqa pëkunanö kaq nunakunapaqmi. Rasuntam niyaq, pipis Diospa Gobiernunta juk wamranö mana chaskeq kaqqa, manam ni imanöpapis tsëman yëkunqatsu” (Marcus 10:14, 15; Lücas 18:15).

¡Tsëqa alläpa precisaq yachatsikïmi karqan!  Diospa Gobiernunchö bendicionkunata chaskita munarqa, wamrakunanö humildim kanantsik y yachakunapaqmi listu këkänantsik. Tsëpitanam, wamrakunata alläpa kuyanqanta rikätsikur pëkunata mellqarkur bendicirqan. Tsënöllam Jesusqa wamrakunanö kaq nunakunata y Diospa Gobiernunta chaskikoqkunataqa alläpa kuyan (Lücas 18:17).