MATEU 9:1-8 MARCUS 2:1-12 LÜCAS 5:17-26

  • KUYUKÏTA MANA PUËDEQ NUNATA JUTSANKUNAPITA JESUS PERDONAN Y KACHAKÄTSIN

Jesus ruranqampaqqa pï më nunakunam parlëkäyarqan. Mëtsikaqmi Jesus këkanqan tsunyaq sitiukunamampis ëwayarqan yachatsikunqanta wiyayänampaq y ruranqan milagrukunata rikäyänampaq. Peru tsëpita juk ishkë junaqkunallatam Jesusqa Capernaumman kutikurqan, tsëchömi sagrädu rurëninta rurar mas tiempu karqan, y tsëchö këkanqantaqa llapankunam willanakuriyarqan. Tsëmi këkanqan wayiman mëtsikaq nunakuna ëwayarqan. Galilëapita, Judëapita y Jerusalenpita fariseukuna y Ley yachatsikoqkunapis tsëchömi këkäyarqan.

Wayi juntam kayarqan y punkuchöpis chipyëpa kichkim këkäyarqan. Y Jesusqa “Diospa willakïninta willakur[mi] qallëkurqan” (Marcus 2:2). Rätunllatanam alläpa precisaq milagruta rikäyänan karqan. Y tsëqa rikätsimantsik sufritsikoq jutsata ushakätsinampaq y nunakunata kachakätsinampaq Jesus poderyoq kanqantam.

Nunakunata Jesus yachëkätsiptinmi kuyukïta mana puëdeq nunata chuskoq nunakuna kirmawan pë kaqman apayarqan. Peru mëtsikaq nunakuna tsëchö kayaptinmi Jesus kaqman yëkatsita puëdiyarqantsu (Marcus 2:4). ¡Alläpachi llakikuyarqan! Tsënö kaptimpis, manam tsëllachötsu jaqiriyarqan. Jesus këkanqan wayi jananman lloqarkurmi wayipa qataraqninta kicharir kuyukïta mana puëdeq nunata kirmantawan shumaqlla bajaratsiyarqan.

¿Tsënö rurayanqampita Jesusqa piñakurqanku? Manam. Tsëpa rantinqa, markäkïninkunata rikarmi, kuyukïta mana puëdeq nunata kënö nirqan: “Jutsëkikunapita perdonashqanam kanki” (Mateu 9:2). Peru ¿Jesusqa jutsankunapita nunakunata perdonëta puëdirqanku? Ley qellqaqkuna y fariseukunaqa tsëta rurëta mana puëdinqantam creiyaq. Tsëmi “¿imanirtaq kë nunaqa tsënö parlan? Diostam ofendikan. ¿Pillataq jutsakunapita perdonakïta puëdin? ¿Manaku Dioslla?” nir pensayarqan (Marcus 2:7).

Imata pensayanqanta musyarmi Jesusqa kënö nirqan: “¿Imanirtaq shonqïkikunachö tsëkunata pensayanki? ¿Imataq mas fäcil?, ¿kuyukïta mana puëdeq nunata, ‘jutsëkikunapita perdonashqanam kanki’ niku, o, ‘sharkï y kirmëkita iñurkur puri’ niku?” (Marcus 2:8, 9). Awmi, Jesusqa nunakunapa jutsankunarëkur wanunan kaptinmi, nunakunataqa jutsankunapita perdonëta puëdirqan.

Tsëmi nunakunapa jutsankunata perdonanampaq autoridäyoq kanqanta rikätsikur, kuyukïta mana puëdeq nunata kënö mandarqan: “Sharkï, kirmëkita iñurkur wayikita ëwakï”. Tsë nunaqa jinan höram kirmanta iñurkur llapankuna rikarëkäyaptin purikarna yarqurirqan. Tsëmi llapankuna alläpa espantakuyarqan. Y jinan höram Diosta alabayarqan y kënö niyarqan: “Manam ni imëpis këtanöqa rikarquntsiktsu” (Marcus 2:11, 12).

Jesusqa pipis jutsarëkur qeshyanqanta, y jutsapita perdonashqa karqa sänu tikrarinqantam rikätsikurqan. Bibliaqa yachatsikun, Adan jutsallakunqanrëkur qeshyanqantsikta y wanunqantsiktam. Peru Diospa Gobiernunchö Jesus mandakamuptinqa, Diosta kuyaq y sirweqnin nunakunatam jutsankunapita perdonanqa. Y tsëchöqa llapan qeshyakunam chipyëpa ushakärinqa (Romänus 5:12, 18, 19).