MATEU 4:23-25 MARCUS 1:35-39 LÜCAS 4:42, 43

  • CHUSKU QATEQNINKUNAWAN GALILËA PROVINCIAPA JESUS PURIN

  • JESUSPITA WILLAKUYANQAN MË TSËMAN CHÄRIN

Jesusqa chusku qateqninkunawanmi Capernaumchö entëru junaq alläpa ocupädu kayarqan. Ampïrëkaptinnam, nunakunaqa qeshyëkaqkunata jampinampaq apayäpurqan, tsëmi tiempumpis karqantsu japallan karinampaq.

Waränin qoyanam, manaraq atsikyaptin shärikurirqan. Y Teytanman mañakunampaqmi tsunyaq sitiuta ëwarqan. Peru manaraq atska tiempu pasaptinmi, Pëdru y pëwan këkaqkunaqa cuentata qokuriyarqan Jesus tsëchö mana këkanqanta, tsëmi asheq ëwayarqan. Itsachi asheq ëwayänampaqqa Pëdru nirqan, porqui Jesusqa pëpa wayinchömi quedakushqa karqan (Marcus 1:36; Lücas 4:38).

Taririyaptinnam Pëdruqa “llapankunam ashiyäshunki” nirqan (Marcus 1:37). Capernaumchö täraq nunakunaqa Jesusta alläpam agradecikuyarqan pëkunapaq ruranqankunapita, tsëmi ëwakunantaqa munayarqantsu (Lücas 4:42). Peru ¿kachakätsikur milagrukunata rurananllapaqtsuraq Jesusqa kë Patsaman shamurqan? Jinamampis, ¿sagrädu rurënintaqa tsë markallachötsuraq ruranan karqan? Kikinmi qateqninkunata kënö nirqan:

“Juk läduta ëwashun, amänuchö këkaq markakunaman, tsëchöpis willakunäpaq, porqui tsëta ruraqmi shamurqö”. Y tsëchö quedakunampaq niyaqnin nunakunatapis kënömi nirqan: “Jina Diospa Gobiernumpita alli willakïkunataqa juk markakunachöpis willakunämi, porqui tsëpaqmi kachamushqa karqö” (Marcus 1:38; Lücas 4:43).

Jesusqa kë Patsaman shamurqan Diospa Gobiernumpita mas precisaq willakïta willakoqmi. Tsë Gobiernum Teytampa jutinta santuyätsinqa, y imëka mana allikunatapis chipyëpa ushakätsinqa. Peru tsëqa, ¿imanirtaq milagrukunata rurarnin qeshyëkaqkunata kachakätsirqan? Tsëtaqa rurarqan, Dios kachamushqa kanqanta rikätsikunampaqmi. Unë tiempuchöpis, espantëpaq milagrukunatam Moises rurarqan Dios kachëkanqanta rikätsikunampaq (Exodu 4:1-9, 30, 31).

Jesusqa, Pëdruwan, Andreswan, Juanwan y Santiäguwanmi Capernaumpita juk markakunata yachatsikoq ewkurqan. Juk semänallaran pasarishqa karqan viäjinkunachö yanaqäyänampaq Jesus pëkunata akranqampitaqa.

Galilëa provinciachö Jesus y chusku qateqninkuna yachatsikuyanqantaqa nunakuna alleqmi wiyakuyarqan. Pëpita willakuyanqanqa Siriaman, Decäpolis nir reqiyanqan chunka markankunaman y Jordan mayupa wak tsimpan markakunamampis chärirqanmi (Mateu 4:24, 25). Tsë sitiukunapita y Judëa markapitam Jesusta y qateqninkunata mëtsikaq nunakuna qatiyarqan. Nunakunaqa qeshyëkaqkunatam apayarqan, y pëqa llapantam kachakätsirqan, jina supëyoq nunakunapitam supëkunata qarqurqan.