Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Diospa alli willakïninkuna

 5 kaq yachatsikï

¿Patsa imanö kanantataq Dios munan?

¿Patsa imanö kanantataq Dios munan?

1. ¿Imapaqtaq Patsata kamarqan?

Tsëchö kawanapaqmi. Adantawan Ëvataqa manam ciëlochö kawayänampaqtsu kamarqan. Porque tsëchö kawayänampaqqa angelkunatanam kamashqa karqan (Job 38:4, 7). Jehoväqa punta nunata o runata churarqan Edén jutiyoq shumaq huertamanmi (Génesis 2:15-17). Jina llapan tsurinkunawan mana wanushpa Patsachö shumaq kawayänampaqmi nirqan.Lei Salmo 37:29 y 115:16.

Qallananchöqa, Patsapa juk kuchunllachömi Edén huerta karqan. Y Adanwan Ëvaqa entero Patsaman juntayänampaqmi mirayänan karqan y ichikllapa ichikllapam shumaq huertaman tikratsiyänan karqan (Génesis 1:28). Patsaqa imëpis kawanapaqmi kanqa, manam pipis ushakätsinqatsu.Lei Salmo 104:5.

2. ¿Imanirtaq kananqa Patsa shumaq huertatsu?

Adanwan Eva mana wiyakushqa kayaptin, y Edén huertapita Dios qarqamushqa kaptinmi. Tsënöpam punta Shumaq Huerta oqrakärirqan y manam pipis altsëta puëdeshqatsu. Tsëmi Bibliapis kënö nin: “Mana alli ruraqkunapa makinchömi kë patsataqa dejarishqa” (Job 9:24).Lei Génesis 3:23, 24.

Tsëqa, ¿manatsuraq Jehová Dios ni ima rurëtapis puëdenna? Manam, pëqa Llapanta Puëdeqmi y manam ni imapis vencintsu (Isaías 45:18). Shamoq tiempochöqa, puntata Dios munanqannömi nunakuna kawayanqa.Lei Salmo 37:11, 34.

3. ¿Imanöraq altsakanqa tsë Shumaq Huerta?

Jesus Patsata gobernamurmi shumaq huertaman tikratsinqa. Diosta llapan chikeqkunatam angelkunawan  Armagedonchö ushakätsinqa. Tsëpitanam waranqa watapa Satanasta wichqarinqa. Pero Diosta sirweqkunaqa tsë ushakëchö salvakuyanqam, Jesusmi pushanqa y cuidanqa, y tsëpitanam Shumaq Huertachö imëyaqpis kawayanqa.Lei Apocalipsis 20:1-3 y 21:3, 4.

4. ¿Imëraq sufrimientokuna ushakanqa?

¿Imëraq Diosqa mana allikunata ushakätsinqa? Tsë tiempo chëkämunqanta musyanapaqmi Jesusqa ‘señalkuna’ kanampaq willakurqan. Kanan witsan imëka mana allikuna pasëkanqanmi rikätsikun, “më tsëchö imëkapis imanö këkanqampa ushënin witsanna kanqanta”.Lei Mateo 24:[3, NM], 7-14, 21, 22.

Waranqa wata ciëlopita Jesus Patsata gobernamurmi ichikllapa ichikllapa ushakätsinqa tukï sufrimientokunata (Isaías 9:6, 7; 11:9). Rey karpis, sacerdotekunapa mandaqninmi kanqa, tsënöpam Diosta kuyaqkunapa jutsankunata ushakätsinqa. Y Diosqa Jesuswanmi ushakätsinqa qeshyakunata, edäyëta y wanïtapis.Lei Isaías 25:8 y 33:24.

5. ¿Pikunataq Shumaq Huertachö täräyanqa?

Yachatsikuyänan Wayichöqa reqinki Diosta kuyaqkunata y pëpa munëninta ruraqkunatam

Diosta wiyakoqkunallam (1 Juan 2:17). Jesusqa qateqninkunata mandarqan alli shonquyoq nunakunata Diospita yachatsiyänampaqmi. Y kanan witsampis atska millón nunakunatam Jehoväqa yachëkätsin juk Shumaq Huertachö täräyänampaq (Sofonías 2:3). Jehoväpa Testïgonkuna Yachatsikuyänan Wayiman ëwaq familiakunaqa yachakuyan alli nuna këta, alli teyta këta y alli willakïpis pëkunapaq alläpa precisanqantam.Lei Miqueas 4:1-4.