Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

“Dios Yayapa kuyakïninchö imëpis kawakuyë”

 APÉNDICE

¿Imanötaq rikashwan Jehoväpa markampita qarqushqakunata?

¿Imanötaq rikashwan Jehoväpa markampita qarqushqakunata?

Kastantsikkunata o familiantsikkunata congregacionpita qarquriyaptenqa alläpam llakikuntsik. Pero këkuna pasaptin Biblia nenqannö qarqushqakunata rikanqantsikmi, rikätsikonqa Diosnintsikta rasumpëpa kuyanqantsikta o mana kuyanqantsiktapis. * Tsëmi rikärishun tsënö pasaptin imata ruranapaqpis.

¿Imanötaq rikashwan Jehoväpa markampita qarqushqakunata? Bibliam kënö nimantsik: “Sinoqa niyaq Teyta Jesucristuman creyiquicarna, jucwan jucwanraq pununacoqcunawan, qellepaq erayaqcunawan, imajincuna adoraqcunawan, wasa rimacunawan, borrachucunawan y suwacunawan mana juntacuyänequipaqmi. Ama pecunawanqa juntupis micuyëtsu.” (1 Corintios 5:11.) Hina kënöpis nimantsikmi: “Pipis allapa yachaqtucushqa queninwan Jesucristupa yachatsiquininta mana sïguirqa, manam Dioswantsu quecan” tsëtanöqa “wayiquicunamanpis chasquiyëtsu; ni saludayepistsu. Peru saludaqnin y wayinman chasqueq caqqa peno mana alli nunam ticrarin” (2 Juan 9-11). La Atalaya 15 de noviembre 1981 watapa, 19 päginanchömi kënö nishpa willakun: “Saludariqa itsa más parlapëman, y hasta amigo këman chäratsimashwan. ¿Tsë rurëtatsuraq munashwan Jehoväpa markampita qarqushqakunawan?” manam. Tsëmi congregacionpita qarqushqakunawanqa pasëpa rakikärishwan, y manam pëkunawanqa Jehoväpitapis parlanantsiktsu.

¿Imanirtaq tsënö rikashwan Jehoväpa markampita qarqushqakunata? Tsëtaqa rurantsik Teyta Diosta y Palabran Bibliata kuyanqantsikta y respetanqantsikta rikätsikurninmi. Awmi, Jehová Diosnintsiktaqa shonquntsikpita patsëmi kuyantsik, tsëmi llapan mandamanqantsikta rurantsik, cumplinan mana fácil këkaptimpis. Hinamampis alleqmi musyantsik,  ima ruranqampis noqantsikpaq alli kanqanta (Isaías 48:17; 1 Juan 5:3). Hinamampis tsë rurëninwanqa wakintapis mana alli rurëkunamanmi ishkitsinman. Tsëmi mana arrepentikoq nunapita chipyëpa rakikarnenqa, mana allikunaman ishkinantsikpita witikïkantsik y Jehová Dioswan alli kënintsik y congregacionpis limpiom këkanqa (1 Corintios 5:6, 7). Hina congregacionpita qarquyanqanqa hutsa rurashqa nunatam yanapan. ¿Imanötaq yanapanman? Biblia nenqanta wiyakurnin y anciänokuna tsë hutsa ruraq nunata congregacionpita qarquyänampaq decidiyanqanta wiyakonqantsikmi yanapanqa, itsa tsënöpa hutsa ruranqan alläpa mana alli kanqanta cuentata qokurnin arrepentikunman. Y kastankuna puntatanöna mana rikäyaptinmi “cuentata qocurir” Teyta Diospa markanman kutinampaq sinchikonqa (Lucas 15:17).

¿Y huk kastantsik Jehoväpa markampita qarqushqa kaptenqa? Jehová Diosta kuyanqantsikmi pruëbaman churakanqa. Tsënö kaptenqa, ¿imanötaq rikashwan congregacionpita qarqushqa kastantsikta? Tsëpaqqa atska yanapakïkunam kan, pero ishkëllata rikärishun.

Itsa Jehoväpa markampita qarqushqa nunaqa kastankunawan täranman. Y qarqushqa kanqanrëkurqa manam kastan kanqanqa ushakärintsu, ni wayichö ima ruranqantapis manam michayantsu. Pero Jehoväpaq rurëkunachöqa manam igualnatsu kanqa, Jehoväwan alli këninta oqranqanrëkur y mana wiyakonqanrëkur. Familiachö Diospita yachakuyaptin tsëchö këtaqa itsa puëdenman, pero manam parlanmantsu. Y wambrallaraq këkar Jehoväpa markampita qarqushqa kaptenqa, teytankuna Bibliapita yachatsita puëdeyanmi, makinllachöraq tsë wambra kaptin (Proverbios 6:20-22; 29:17). *

Y Jehoväpa markampita qarqushqa nuna kastanwan manana täraptenqa, ¿imanötaq rikäyan kastankuna? Tsënö kaptenqa llapan puëdeyanqanchömi rakikäriyan, y imapis familia asunto alläpa precisaptinraqmi qayayan. Y manam imatapis rurayantsu  juntakäyananrëkorqa. Jehoväta y markanta respetarnin y kuyarninmi tsëtaqa rurayan. Tsënö mana juntakarninmi kastankunata kuyayanqanta rikätsiyan, tsënöpa Jehoväpa markanman kutinampaq (Hebreus 12:11). *

^ par. 1 Manam Jehoväpa testïgon këta munänatsu nishpa yarqukureqkunata imanö rikänapaqpis, congregacionpita qarqushqakunapaq Biblia willakonqanllam yanapamantsik.

^ par. 2 Wambrallaraq këkar Jehoväpa markampita qarqushqa kaptenqa, y teytankunallawanraq wayichö täraptenqa, yanapakïkunata tarinki, La Atalaya 1 de octubre 2001 watapa, 16 y 17 päginankunachö, y 15 de noviembre 1988 watapa, 20 päginanchö.

^ par. 3 Congregacionpita qarqushqa kastantsikkunata imanöpis rikänapaq más willakïkunataqa tarintsik, La Atalaya 15 de abril 1988 watapa, 26-31 päginankunachö, y 15 de noviembre 1981 watapa, 20-25 päginankunachö.