Llapan kanqanman ëwari

Qallananchö tïtulukunaman ëwë

Jehoväpa testïgunkuna

Idiömata akrë Quechua (Ancash)

 APÉNDICE

¿Imëtaq cristiänakuna peqankunata tsapäkuyanman, y imanirtaq tsë rurëqa alli?

¿Imëtaq cristiänakuna peqankunata tsapäkuyanman, y imanirtaq tsë rurëqa alli?

Teyta Dios mandaptinmi apóstol Pablu qellqarqan cristiänakuna peqankunata tsapäkuyänampaq. ¿Imëtaq tsapäkunman y imanir? 1 Corintios 11:3-16 nishqanchö Pablu nenqanta rikärishun, tsënöpa cristiänakuna tanteayänampaq. Kë versïculokunachöqa rikätsimantsik kima rurëkunachö tsapäkuyänampaqmi: 1) Jehoväpaq rurayanqankunachö; 2) imë peqanta tsapäkunanta, y 3) imanir peqanta tsapäkunantapis.

Jehoväpaq rurayanqankunachö. Pabluqa ishkëtam rikätsikun: “Diosta mañacuyänan öra”, y “willapäcuyänan öra” nishpa (4 y 5 versïculokuna). Musyantsikmi, Jehová Diosman mañakïqa adoración kanqanta y Reinompita willapäkïpis adoracionlla kanqanta. Tsëpenqa, ¿mañakïkarnin y Bibliapita imë hörapis yachatsikïkarnintsuraq cristiänakunaqa peqankunata tsapäkuyanman? Manam. Qateqninchö rikärishun.

¿Imëtaq peqanta tsapäkunman? Congregacionchö y familiachö rurayanqan höram. Apóstol Pablum kënö willakorqan: “Jina quetam willapäriyeniquita munarqö: [...] ollqu caqcunapa mandaduncunachonam warmicuna cayänan”, “peru warmeqa Diosta mañaconqan örapis y willapäconqan örapis shucupacunanmi [tsapäkunanmi]. Mana shucupacorqa, mandaqnin qowantam desunrecan, y imeca aqtsantapis rutuquicushqa cuentam  quecan” (3 y 5 versïculokuna). Familiata diriginampaqqa Jehová churashqa ollqutam, tsëpenqa ¿ollqu rurananta huk warmi rurarqa peqanta tsapäkunmantsuraq? Awmi, tsënö mana rurarqa dirigeqnintam penqakïkätsin. Más tanteanapaq rikärishun këkunata. Huk cristiana Bibliapita yachatsikïkanman qowan o nunan lädonchö këkaptin. Tsëqa nunanta respetarninmi peqanta tsapäkunan. Tsëtaqa rurananmi nunam bautizakushqa o mana bautizakushqa kaptimpis. * ¿Y huk cristiana yachatsikunmantsuraq o mañakunmantsuraq peqanta mana tsapäkushpa pishillaraq huk ollqu wambran bautizashqa këkaptin? Kë wambra familian mana dirigeq këkaptimpis peqantaqa tsapäkunmanllam. ¿Imanir? Congregacionta pushayänampaq ollqukunata Jehová churashqanta respetarninmi peqanta tsapakunan.

Tsëpitam apóstol Pablu nin: “Peru sitsun pipis que cosascunawan acuerdutsu canqa alfin quiquinnachi. Jesucristuman creyicoqcunaqa manam que costumbripita mas juclaya costumbricunataqa musyayätsu” (versículo 16). Congregacionta dirigiyänampaqqa Jehová churashqa bautizashqa ollqukunallatam (1 Timoteu 2:11-14; Hebreus 13:17). Tsëmi markanta rikäyänampaq, ollqukunallata akran anciano y siervo ministerial kayänampaq (Hechos 20:28). Pero höraqa huk cristiano ruranantam huk cristiana ruran. Itsa willapäkoq ëwayänampaq diriginman, huk ollqu mana kaptin. Tsë willapäkoq ëwanapaq reunionqa congregacionchö reunionnöllam, tsëmi huk ollquraq diriginan, y huk warmi rurarqa peqantam tsapäkunan, ollqu kaqkunata respetarnin. Y tsënöllam ruranman huk bautizado ollqu * lädonchö estudiota dirigirnimpis.

Pero huk rurëkunachöqa manam peqanta tsapäkunanraqtsu. Reunionkunachö parlanampaq, wayin wayin willapäkoq ëwarnin (nunanwan o huk bautizado cristiänowan ëwarnimpis) y mana bautizado wambrankunawan mañakurnin y estudiarnimpis manam tsapäkunanraqtsu. Pero imata rurëkarnimpis mana alleqlla  tantiarnenqa, ¿imatataq ruranman peqanta tsapänampaq o mana tsapänampaqpis? Puntataqa Biblia yachatsikonqanmanmi alleq pensanan. * Y tsënö kaptimpis mana tantear peqanta tsapäkonqanqa allillam kanqa, kë fötochö këkaqnö.

¿Imanirtaq peqanta tsapäkunman? Versículo 10 nenqanchömi rikätsimantsik ishkë willakïta imanir peqankunata tsapäkuyänampaqpis, kënömi nin: “Tserecur qowayoq caq llapan panicuna peqancunata shucupacuyätsun [tsapakuyatsun] qowancunapa mandaduncunacho cayanqanta nunacuna musyayänanpaq. Tseno rurayätsun anjelcunarecur”. ‘Peqancunataqa shucupacuyän’ Jehová Diospa autoridadninta respetarninmi, y congregacionchö Pë churashqan bautizashqa ollqukunata respetarninmi. Tsëchömi rikätsikun Teyta Diosta kuyanqanta y respetanqanta. Hina tsëpitapis angelkunata respetarninmi peqankunata tsapäkuyänan. ¿Warmikuna kënö peqankunata tsapäkuyaptin imaraq niyan angelkuna?

Angelkunaqa rikarëkäyanmi Teyta Diospa llapan sirveqninkunata kë Patsachö kaqta y ciëlochö kaqtapis, y Jehová mandakoq kanqanta respetakuyanqanta o mana respetakuyanqantapis rikëkäyanmi. Pëkunaqa hutsasapa nunakuna Teyta Diosta wiyakuyanqampitam yachakuyan. Qallananllachöqa manam llapan angelkunatsu wiyakoq ni respetakoq kayarqan, tsëmi pëkunapis Teyta Diosta respetakuyanqantaqa rikätsikuyänan (Judas 6). Tsëmi, alli yachaq y unëna Jehová Diosta servikarpis, shonqunkunapita patsë cristiänakuna peqankunata tsapäkur, ollqukunata wiyakur respetakuyaptenqa, angelkunapis alläpa yachakuyan. Y más kushishqaran rikäyan ciëlota ëwanampaq kaq warmi peqanta tsaparnin respetakuptinnäqa. ¿Imanirtaq  tsënö rikäyan? Shamoq tiempochöqa tsë cristiänaqa Jesuswan juntom gobernayämonqa, y angelkunapitapis más puëdeqran kayanqa. Rikanqantsiknöpis, warmikunapaqqa peqankunata tsapäkur respetakïqa alläpa kushikïpaqmi. Atska waranqa angelkuna rikarëkäyamuptinmi, humilde y wiyakoq kayanqanta rikätsikuyan.

^ par. 3 Huk cristiana warmiqa manam sinchipaqa Teyta Diosman mañakïta puëdentsu, lädonchö nunan këkaptenqa, tsëtaqa ruranman nunan parlëta mana puëdeptinllam.

^ par. 1 Manaraq bautisakur yachatsikoq mana qowan kaptin y janancho patsätsishqana estudiuta juk pani qorqa, manam peqanta tsapäkunantsu.

^ par. 2 Más musyanëkipaqqa rikë, La Atalaya 15 de febrëru 2015 watapa, 30 kaq päginanta; 15 de julio 2002 watapa, 26 y 27 päginankunachö, y 15 de julio 1977 watapa, 445-448 päginankunachö.