Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

“Dios Yayapa kuyakïninchö imëpis kawakuyë”

 APÉNDICE

¿Ima nintaq Biblia divorciakïpita y rakikëpita?

¿Ima nintaq Biblia divorciakïpita y rakikëpita?

Casakuyanqan hunaq qamllapaqnam kashaq ninakuyanqanta cumpliyänantam Jehová Dios shuyaran. Adantawan Ëvata casatsirninmi Jehová nerqan: “Ollquqa haqirenqa mamanta yayantam warminwan juntakänampaq. Y ishkankunapis  huknöllanam kayanqa”. Y kë Patsachö Jesus këkarnam Teytan Jehová nenqanta yapë nirerqan, tsëpitam kënö yaparerqan: “Dios juntashqantaqa mana pipis raquinmantsu” nishpa (Génesis 2:24; Mateo 19:3-6). Rikanqantsiknöpis casado kawakïtaqa Jehová Dioswan Jesusqa rikäyan imëpis mana ushakaqpaqmi y wanïraq rakirinantam (1 Corintios 7:39). Casado kawakïtaqa manam nunakunatsu patsätsiyashqa, sinöqa kikin Diosnintsikmi, tsëmi sagrado kanqanta rikashwan. Y imallapitapis piñatsinakurir divorciakoqtaqa Jehová Dios pasëpam chikïkun (Malaquías 2:15, 16).

Biblia nenqannö, ¿ima hutsallataq divorcioman chätsinman? Casado këkarnin hukwan punukïqa alläpa hutsam, tsëtam Jehová Diosqa alläpa chikïkun (Génesis 39:9; 2 Samuel 11:26, 27; Salmo 51:4). Tsëmi casädokuna divorciakuyänanta permitin tsë hutsata rurayashqa kaptinlla. (Capítulo 9, párrafo 7, nishqanchömi tarintsik fornicación ima kanqantapis.) Pero tsënö karpis, Jehová Diosqa permitishqa hutsaman mana ishkishqa kaqtam, majampita rakikänampaq o mana rakikänampaqpis kikin akranampaq (Mateo 19:9). Y divorciakorqa manam hutsatatsu rurëkan. Pero manam mëqan cristiano mayimpis animanmantsu divorciakunampaq. Itsa hutsannaq kaq alleq pensëkurnin y majan rasumpëpa arrepentikuptenqa divorciakunmantsu. Hutsannaq kaqmi divorciakunampaq o mana divorciakunampaqpis akranan, pero tsë llapampitaqa kikinmi cuentata qonqa alli kaptin o mana alli kaptimpis Teyta Diosta (Gálatas 6:5).

Pero kanmi huk cäsokunapis huk cristiano o huk cristiana majampita rakikänampaq o divorciakunampaq majan hukwan mana punukïkushqa kaptimpis. Tsënö kaptenqa Biblia nin: “Sitsun malas raquicacurenqa, mana yapapäcushpa japallan tärätsun o mana tseqa amishtacuyätsun qowanwan” (1 Corintios 7:11). Tsëmi rakikashqa këkarpis, manam libretsu këkan hukwan casakunampaq (Mateo 5:32). ¿Imarëkurllataq rakikëman chäyanman casädokuna? Rikärishun.

Familianta mana mantenita munaptin. Wakin qowakuna manam familianta mantenita munayantsu, tsënöpam familian hipakïkunapa pasan. ¿Imataq Biblia nin tsënö nunapaq? “Diosman marcäconqanpis manam imapaqpis sirwintsu, y Diosman mana creyicoqcunapitapis mas mana alli ruraqmi cayan” ninmi  (1 Timoteu 5:8.) Tsënö huk nuna familianta mana mantenita munaptenqa, majanmi alleq rikänan y akranan wambrakunapaq y kikimpaqpis divorciakonqan alli kanqanta o mana alli kanqantapis. Tsënö divorciakïta munar warmi demandaptenqa congregacionchö anciänokunam alleq rikäyänan, rasumpa y mana rasumpa kanqantapis y tsë cristiano familianta rasumpa mana mantenikaptenqa congregacionpitam qarqushqa kanman.

Alläpa maqarnin saludninta peligroman churaptin. Wakinqa majanta alläpa maqarninmi saludninta o hasta kawënintapis peligroman churayan. Kë maqakoq huk cristiano kaptenqa, anciänokunam alleq rikäyänan, y taritukuptenqa congregacionpitam qarqushqa kanman, tsënö maqakoqkunataqa Diosnintsik alläpam chikin (Gálatas 5:19-21).

Alläpa chikikurnin, imanöpapis Jehoväta adorananta mana munaptin. Wakin majakunaqa tukïtam rurayan majankuna Jehová Diosta mana serviyänampaq, y mana munëkaptinmi Biblia michanqan hutsakunaman ishkitsita munayan. Tsënö kaptenqa cristiano kaq majam rikänan, “nunacunata cäsuyanqäpitaqa, presisanmi puntata Diosta cäsucuyänä” nishqan mandatota wiyakurnin rakikänampaq o mana rakikänampaqpis (Hechos 5:29).

Kënö mana allikunapa casädokuna pasaptenqa manam cristiano mayinkuna animayanmantsu rakikäyänampaq o mana rakikäyänampaqpis. Anciänokuna y wakin poqu cristiänokunaqa Bibliawan shumaq willaparnimpis, yarpäyänanmi casado kawakïninkunachö imanö pasëkäyanqantapis Jehová Dioslla alleq musyanqanta. Pero huk cristiano (o huk cristiana) ichik problëmallata rakikananrëkur atskaman miratserqa, manam Teyta Diosta ni casado kawakïta respetëkantsu. Hinamampis Jehová Diosqa musyëkanmi ardëlla rakikänanrëkur ulikïkanqanta o llullakïkanqantapis. Tsëmi Palabran kënö nin: “Llapan camashqancunapis riquenincho kaptinmi, llapan rurenintsictapis riquecan. Pepaqqa ima rurenintsicpis manam pacarantsu. Y ima ruranqantsictapis parlanqantsictapis jusgamäshunmi” (Hebreus 4:13). Y rasumpa imapis mana alli kaptin rakikëman chaptenqa manam pipis rimanmantsu. Imanö kaptimpis “Diosta[m] quiquintsic llapan rurashqantsicpita cuentata qoshun” (Romanos 14:10-12).