1. ¿Nunakuna imanö kawakuyänantataq Diosnintsik munan?

ADANTAWAN ËVATAQA alläpa shumaq kawakuyänampaqmi Diosnintsik kamarqan. Tsëmi pëkunapaq juk shumaq huertata rurarqan. Y wamrankuna kayäpunantam munarqan, jina entëru Patsata juk shumaq huertaman tikratsiyänanta y animalkunata cuidayänantam munarqan. Y kananyaqpis tsëtam munan. Pëqa llapan nunakuna shumaq kawakuyänantam munan (Genesis 1:28; 2:8, 9, 15; rikäri 6 kaq nötata).

2. (1) ¿Imanötaq musyantsik Diosnintsik munanqan cumplikänampaq kaqta? (2) ¿Imanö kaq nunakunataq Patsachö kawayanqa, y ëka tiempupataq kawayanqa?

2 Kë Patsaqa, ¿imëllapis juk shumaq huertaman tikranqatsuraq? ¡Tikranqam! Porqui kikin Diosnintsik Jehovämi, “parlarqömi, y cumplishaqmi” nin (Isaïas 46:9-11; 55:11). Diosnintsik munanqanqa imëpis cumplikanmi, porqui manam imapis michëta puëdintsu. Jinamampis Diosnintsikqa manam envänutsu kë Patsata kamarqan (Isaïas 45:18). Diosnintsikqa munan entëru Patsachö nunakuna junta kayänantam. Peru ¿imanö kaq nunakuna Patsachö kawayänantataq munan? Y, ¿ëka tiempu kawayänantataq munan? Bibliachömi kënö nin: “Patsachöqa alli kaqta ruraq nunakunallam täräyanqa,  y tsëchömi imëkamayaqpis kawayanqa” (Salmus 37:29; Revelacion [Apocalipsis] 21:3, 4).

3. Pï më qeshyaptin y wanuptin, ¿ima tapukïkunataq pensënintsikman chämun?

3 Peru kanan tiempuqa pï mëmi qeshyan y wanun. Y wakin markakunachönäqa pasëpam wanutsinakuyan. Peru Diosnintsikqa manam tsëtatsu nunakunapaq munarqan. Tsëqa, ¿imanirtaq tsëkuna pasakun? ¿Imanirtaq Diosnintsikpa munënin cumplikashqatsu? Biblia ima ninqanta rikärishun.

JUK ANGELMI DIOSPA ENEMÏGUN TIKRARQAN

4, 5. (1) ¿Pitaq culebrata parlatsirnin Ëvata engañarqan? (2) ¿Imanötaq juk alli nuna ladron tikrarinman?

4 Diospaqa juk enemïgunmi kan, pëtam Bibliaqa “Diablu y Satanas” nishpa qayan. Eden huertachömi Satanasqa juk culebrata parlatsirnin Ëvata engañarqan (Revelacion 12:9; Genesis 3:1). Kikin culebra parlapëkanqantam Ëvaqa pensarqan (rikäri 7 kaq nötata).

5 Tsëqa, ¿Diosnintsikku Satanasta kamarqan? Manam. Diosnintsikqa Patsata manaraq kamarmi mëtsika angelkunataraq puntata kamarqan, peru juk angelmi Diabluman tikrarirqan (Job 38:4, 7). ¿Imanötaq tsëqa pasakurqan? Këman pensarishun: ¿imanötaq juk alli nuna ladron tikrarinman? Manam pipis ladron këkartsu yurikun. Peru pipis nunapa imantapis munaparqa, y tsëllaman yarparäkurqa, tsë munënin dominaptinmi imë karpis suwakïman chärinqa. Tsënömi juk nunaqa alli nuna  këkarpis ladron tikrarinman (leyi Santiägu 1:13-15; rikäri 8 kaq nötata).

6. ¿Imanötaq juk angel Diospa enemïgun tikrarirqan?

6 Tsënömi tsë angelwampis pasakurqan. Jehoväqa Adantawan Ëvata kamarirmi wamrayoq kayänampaq y Patsaman juntayänampaq nirqan (Genesis 1:27, 28). Itsachi tsë angelqa kënö pensarqan: “Shumaqchi kanman Jehoväta adorayänampa rantin noqata adorayämaptinqa”, y itsa tsëllamanchi yarparäkurqan. Y adorayänampaq Jehovälla derëchuyoq këkaptimpis, pëta adorayänantam alläpa munarqan. Tsëmi uliparnin (llullaparnin) Ëvata engañarirqan (leyi Genesis 3:1-5). Tsënömi tsë angelqa Satanas Diablu këman chärirqan, y Diospa enemïgun tikrarirqan.

7. (1) ¿Imanirtaq Adanwan Ëva wanuyarqan? (2) ¿Imanirtaq llapantsikpis edäyëman chantsik y wanuntsik?

7 Diosnintsikqa juk plantapa frütanta mana mikuyänampaqmi Adantawan Ëvata nirqan. Y mikurqa wanuyänampaq kaqtam nirqan. Peru pëkunaqa mana cäsukurmi mikuriyarqan (Genesis 2:17; 3:6). Y Jehovä ninqannöllam tsë jutsata rurayanqampita tiempuwanqa wanuriyarqan (Genesis 3:17-19). Y wamrankunapis jutsayoqllana yurishqa karmi wanoqlla kayarqan (leyi Romänus 5:12). ¿Y imanirtaq Adanpawan Ëvapa wamrankunaqa jutsayoqllana yuriyarqan? Këman pensarishun: juk wiksu adobëruwan adöbita ruraptikiqa, llapan adöbim tsënö wiksu yarqunqa. Tsënöllam noqantsikpis jutsa ruraq Adanpa wamran karnin, llapantsikpis jutsayoqllana  yurikuntsik. Tsëmi edäyëman chantsik y wanuntsik (Romänus 3:23; rikäri 9 kaq nötata).

8, 9. (1) ¿Imatataq Adantawan Ëvata Satanas creitsirqan? (2) ¿Imanirtaq contran churakaqkunataqa tsë höratsu Jehovä ushakäratsirqan?

8 Satanasqa llapan nunakuna Diospa contran kayänanta munarmi Diosta mana wiyakuyänampaq Adantawan Ëvata engañarqan. Jinamampis, Diosnintsik ulikunqanta (llullakunqanta) y gobernëta mana yachanqantam creitsirqan. Jina nunakunata Diosnintsik gobernanan mana precisanqantam creitsirqan. Y ima alli o mana alli kanqanta kikinkunalla decidita puëdiyänampaq kaqtam Adantawan Ëvata creitsirqan. ¿Y imatataq Jehovä rurarqan? ¿Imanirtaq Adanta, Ëvata y Satanasta tsë höra ushakäratsirqantsu? Buënu, tsë höra ushakäratsirqa manachi rikätsikunmantsu karqan Satanas ulikoq kanqanta.

9 Contran churakaqkunataqa manam tsë höratsu Jehoväqa ushakäratsirqan, sinöqa juk tiempupam permitishqa nunakuna kikinkunapura gobernanakuyänanta. ¿Y imanirtaq tsëta permitishqa? Satanas ulikoq kanqanta cuentata qokunapaq y imanö kawakunantsikpaq kaqtaqa Jehovälla decidita puëdinqanta cuentata qokunapaqmi. Tsëtaqa 11 kaq capïtuluchömi maslla yachakushun. Y qamqa, ¿ima ninkitaq Adanwan Ëva mana wiyakoq kayanqampaq? ¿Allitaku rurayarqan Satanas munanqanta rurarnin? Jehoväqa shumaq kawakuyänantam munarqan, tsërëkurmi pëkunapaq juk shumaq  huertata rurarqan. Peru Satanasqa manam ni imatapis pëkunapaq rurashqatsu karqan. Qam, Adan karqa o Ëva karqa, ¿imataraq rurankiman karqan?

10. ¿Ima precisaq asuntutataq decidinantsik?

10 Noqantsikpis Adanwan Ëvanömi vïdantsikrëkur juk precisaq asuntuta decidinantsik. Jehovä gobernamänata o Satanas gobernamänata munanqantsiktam decidinantsik. Jehoväta cäsukunapaq decidirqa, Satanas ulikoq kanqan musyakänampaqmi yanapakushun (Salmus 73:28; leyi Proverbius 27:11). Peru Jehovä Diostaqa wallkaq nunakunallam cäsukuyan. Jinamampis kë Patsataqa manam Diostsu gobernëkan. Tsëqa, ¿pitaq gobernëkan?

¿PITAQ KË PATSATA GOBERNËKAN?

Gobiernukuna y riquëzankuna Satanaspa mana kaptinqa, ¿“qoykushqëki” ninmantsuraq karqan Jesucristuta?

11, 12. (1) ¿Imanirtaq Satanasqa gobiernukunata y riquëzankunata “qoykushqëki” nirqan Jesucristuta? (2) ¿Ima textukunataq rikätsikun kë Patsata Satanas gobernëkanqanta?

11 Jesucristuqa musyarqanmi kë Patsata pï gobernëkanqanta. Juk kutim, Jesucristuta Satanas rikäratsirqan “patsachö llapan gobiernukunata y riquëzankunata”. Nïkurmi, “qonqurïkur juk kutilla adorëkamaptikiqa, kë llapantam qoykushqëki” nirqan (Mateu 4:8, 9; Lücas 4:5, 6). Këman pensarishun: tsë gobiernukuna y riquëzankuna Satanaspa mana kaptinqa, ¿“qoykushqëki” ninmantsuraq karqan Jesucristuta? Tsëmi rikätsikun kë Patsata Satanas gobernëkanqanta.

12 Itsachi kënö pensanki: “Llapanta puëdeq Jehovä Dios Patsata y Ciëluta kamashqa këkaptinqa, ¿imanirtaq Satanas Patsata gobernëkan?” (Revelacion  4:11). Awmi, Jehovämi llapanta kamashqa. Peru Jesucristuqa alleq clärum nirqan ‘nunakunapa gobernaqninqa’ Satanas kanqanta (Juan 12:31; 14:30; 16:11). Y apostol Pablunam nirqan, “kanan imëkapis imanö këkanqampa diosninqa” Diablu kanqanta (2 Corintius 4:3, 4). Y apostol Juannam kënö nishpa escribirqan: “Mana cäsukoq nunakunaqa Satanaspa makinchömi këkäyan” (1 Juan 5:19).

SATANASPA GOBIERNUNQA USHAKÄRINQANAM

13. ¿Imanirtaq llapan mana allikunata Diosnintsik ushakätsimunqa?

13 Kanan tiempuqa më tsëchömi guërrakuna y mana alli rurëkuna kan, y alläpam chikinakuyan y engañakuyan. Nunakunaqa manam imëkata rurarpis tsë problëmakunata ushakätsita puëdiyantsu. Tsëmi Diosnintsikqa Armagedon nishqan guërrachö llapan mana allikunata ushakäratsimunqa, y alli kaq nunakunallanam quedayanqa (Revelacion 16:14-16; rikäri 10 kaq nötata).

14. (1) ¿Pitataq Diosnintsik akrashqa Gobiernunchö Mandakoq kanampaq? (2) ¿Imatataq Bibliaqa Jesucristupaq unëna willakurqan?

14 Jehoväqa patsätsinqan Gobiernunwanmi alli kawakïta Patsaman apamunqa. Tsë gobiernutam Diospa Gobiernun nishpa reqintsik. Diosnintsikqa Jesucristutam akrashqa tsë Gobiernunchö Mandakoq kanampaq. Bibliaqa unënam willakurqan Jesucristupa gobiernunqa yamë kawakïta apamunampaq kaqta y ni imëpis mana ushakänampaq kaqta (Isaïas 9:6, 7). Tsëmi Jesucristuqa kënö nishpa mañakunapaq yachatsikurqan: “Gobiernïki shamutsun.  Ciëluchö y patsachö munëniki rurakätsun” (Mateu 6:10). Diospa Gobiernunqa llapan gobiernukunatam ushakätsimunqa, y tsëtaqa kë librupa 8 kaq capïtulunchömi maslla yachakushun (leyi Daniel 2:44). Nïkurmi kë Patsata juk shumaq huertaman tikratsimunqa (rikäri 11 kaq nötata).

KË PATSAQA MUSHOQMI TIKRARINQA

15. ¿Pikunataq ‘mushoq patsachö’ kawayanqa?

15 Bibliaqa kënömi nimantsik: “Änimanqantsik mushoq ciëlukunata y juk mushoq patsatam shuyarëkantsik”, y “tsëkunachöqa alli kaq rurëkunallam imëpis kanqa” (2 Pëdru 3:13; Isaïas 65:17). Bibliachö “patsa” nirqa, höraqa Patsachö täraq nunakunapaqmi parlan (Genesis 11:1). Tsëmi, ‘mushoq patsachöqa’ Diosta wiyakoq kaq y pë chaskinqan kaq nunakunallana täräyanqa. Juk shumaq huertaman tikrashqa Patsachömi kawayanqa.

16. (1) Mushoq patsachöqa, ¿ëka tiemputaq nunakuna kawayanqa? (2) ¿Imatataq ruranantsik “imëyaqpis kawëyoq” kanapaq?

16 Jesucristuqa nirqan mushoq patsachö kawaqkunaqa “imëyaqpis kawëyoq kayänampaq” kaqtam (Marcus 10:30). ¿Imatataq ruranantsik tsënö kawakunapaq? Juan 3:16 y 17:3 (leyiri) textuchö ninqantam ruranantsik. Kananqa rikärishun Shumaq Patsachö imanö kawakunapaq kaqta.

17, 18. ¿Imanötaq musyantsik imatapis mana mantsashpa y yamë kawakunapaq kaqta?

17 Mana alli rurëkuna, guërrakuna, wanutsinakïkuna y chikinakïkunam ushakanqa. Patsachöqa  mananam mana allita ruraq nunakuna kanqanatsu (Salmus 37:10, 11). Diosta kuyaq y cäsukoq nunakunallanam Patsachö kawayanqa. Manam yamë kawakï ushakanqanatsu (Salmus 72:7). Mananam guërrakunapis kanqanatsu (Salmus 46:9; Isaïas 2:4).

18 Manam imatapis mantsashunnatsu. Unë witsanqa wiyakoq kayaptinmi Jehoväqa israelïtakunata imëkapita tsapaq, tsëmi imatapis mantsayaqtsu (Levïticu 25:18, 19). Noqantsikpis Shumaq Patsachöqa manam ni pita, ni imata mantsashunnatsu. Imatapis mana mantsashpam kawakushun (leyi Isaïas 32:18 y Miquëas 4:4).

19. ¿Imanötaq musyantsik Shumaq Patsachöqa atska mikï kanampaq kaqta?

19 Llapantsikpaqmi atska mikï kanqa. Bibliam kënö nin: “Chakrakunachöqa mëtsika gränu mikïmi kanqa, hasta jirkakuna jananchömi alläpa atska kanqa” (Salmus 72:16). ‘Diosnintsik bendicimashqam’ chakrakunachö imëka mikïkuna wayunqa (Salmus 67:6).

20. ¿Imanötaq musyantsik entëru Patsa juk shumaq huertaman tikranampaq kaqta?

20 Entëru Patsam juk shumaq huertaman tikranqa. Llapantsikpam shumaq wayintsik y huertantsikkuna kapamäshun (leyi Isaïas 65:21-24 y Revelacion 11:18). Entëru Patsam unë Eden huertanö shumaq tikranqa. Llapan wananqantsiktam Jehovä Dios qomäshun. Bibliam Diospaq kënö nin: “Makikita kicharmi llapan kawaqta munanqanwan bendicinki” (Salmus 145:16).

21. ¿Imanötaq musyantsik chukaru animalkuna nunakunata mana imanäyänampaq kaqta?

 21 Chukaru animalkunam manshu tikrayanqa. Chukaru animalkunaqa manam nunakunata imananqanatsu. Wamrakunapis mananam mantsayanqanatsu kanan witsan mantsëpaq animalkunata (leyi Isaïas 11:6-9 y 65:25).

22. ¿Imatataq Jesucristu ruranqa qeshyëkaqkunapaq?

22 Manam pipis qeshyanqanatsu. Kë Patsachö Jesucristu kawanqan witsanqa atskaq nunakunatam kachakätsirqan (Mateu 9:35; Marcus 1:40-42; Juan 5:5-9). Peru Diospa Gobiernunchö mandakurqa llapan qeshyëkaqkunatam kachakätsinqa. Manam pipis “qeshyämi” ninqanatsu (Isaïas 33:24; 35:5, 6).

23. ¿Imatataq wanushqakunapaq Diosnintsik ruramunqa?

23 Wanushqakunam kawariyämunqa. Mëtsika wanushqa nunakunatam Diosnintsikqa kawaritsimunqa. ‘Alli kaqta ruraqkunata y mana allita ruraqkunatam’ kawaritsimunqa (leyi Juan 5:28, 29; Hëchus 24:15).

24. ¿Ima ninkitaq Mushoq Patsachö imanö kawakunapaq kaqpita?

24 Cada ünum Jehoväta cäsukïta o kikintsikpa munënintsikta rurakïta decidinantsik. Jehoväta maslla reqinapaq y cäsukunapaq decidirqa, shamoq tiempuchömi shumaq bendicionkunata chaskishun. Jesucristuta wanutsiyanqan junaqmi, lädunchö wanoq nunata kënö nirqan: “Noqawanmi Shumaq Patsachö kanki” nishpa (Lücas 23:43). Tsëqa, Jesucristupita y Diosnintsik änikunqankuna imanö cumplikänampaq kaqpita masllata yachakurishun.