“Ciëluta y patsata Kamaq” Diosnintsikqa pëman mañakunantsiktam munan (Salmus 115:15).

1, 2. (1) ¿Imanirtaq Diosman mañakïta puëdinqantsikqa juk jatun bendicion? (2) Jehovä wiyamänapaqqa, ¿imanötaq mañakunantsik?

CIËLUCHÖ ima tsikan estrëllakunapa tamäñunwan Patsata igualaratsishqaqa, Patsaqa alläpa ichikllëllam. Y nunakunaqa, millonyëpayan karpis Jehoväpa rikënimpaqqa juk göta yakunöllam kantsik (Salmus 115:15; Isaïas 40:15). Tsënö kaptimpis, Bibliaqa kënömi nimantsik: “Palabranta respetarnin pëman llapan qayakoqkunapa lädunchömi Jehoväqa këkan. Respetaqninkuna munayanqantam ruranqa, y qayakuyanqantam wiyanqa, y salvanqam” (Salmus 145:18, 19). Kë textu rikätsikunqannöpis, Llapanta Puëdeq Dios këkarpis, y llapanta kamashqa këkarpis, pëman mañakunantsikta y amïgun kanantsiktam Jehoväqa munan. Tsëmi pëman mañakunantsikta permitimanqantsikqa juk alläpa jatun bendicion.

2 Peru tsënö kaptimpis, Jehoväqa pë munanqannö mañakushqallam wiyamäshun. ¿Y imanö mañakunantsiktataq munan? Rikärishun tsëpaq Biblia imata yachatsikunqanta.

JEHOVÄQA MAÑAKUNANTSIKTAM MUNAN

3. ¿Imanirtaq Jehoväqa parlapänëkita munan?

3 Jehoväqa parlapänëkitam munan. ¿Imanötaq tsëta musyantsik? Filipensis 4:6, 7 (leyi) textuchö kikin Jehovä ima ninqanman pensari. Kë textu  rikätsikunqannöpis, llapan imëkata kamaq Diosnintsikqa alläpam kuyashunki, tsëmi imanö sientikunqëkita y imakunapa pasëkanqëkita willanëkita munan.

4. ¿Imanirtaq Jehoväman mas seguïdu mañakushwan?

4 Jehoväman seguïdu mañakurqa mas amïgum pëwan tikrashun. Por ejemplu, sitsun ishkaq amïgukuna seguïdu parlayan y willanakuyan imata pensayanqanta, imanö sientikuyanqanta y imakunapaq yarpachakuyanqanta, tsëqa mas amïgum tikrayanqa. Tsënöllam Jehoväwampis pasakun. Pëqa Bibliachömi willamantsik imata pensanqanta, imanö sientikunqanta y imakunata ruramunampaq kaqta. Y noqantsikqa pëman mañakurmi willëta puëdintsik imanö sientikunqantsikta. Y seguïdu mañakurninqa mas amïgum pëwan tikrashun (Santiägu 4:8).

MAÑAKÏNINTSIKTA DIOSNINTSIK WIYAMÄNAPAQQA, ¿IMATATAQ RURANANTSIK?

5. ¿Imataq rikätsikun Jehoväqa llapan nunakunapa mañakïninkunata mana wiyanqanta?

5 ¿Llapan nunakunapa mañakïnintaku Jehoväqa wiyan? Manam. Unë witsan israelïtakunatam kënö nirqan: “Kutin kutin mañakayämuptikipis manam wiyayaqtsu; porqui yawar ramëpitam culpayoq kayanki” (Isaïas 1:15). Kë textu rikätsikunqannöpis, mana allikunata rurashqaqa Jehoväqa amïguntsik këtam dejarinqa, y manam mañakunqantsikta wiyanqanatsu.

6. (1) ¿Imanirtaq Diosman markäkunantsikqa alläpa precisan? (2) ¿Imanötaq rikätsikuntsik Diosman markäkunqantsikta?

6 Mañakunqantsikta Jehovä wiyamänantsikta munarqa, pëmanmi llapan shonquntsikwan markäkunantsik o yärakunantsik (Marcus 11:24). Tsëmi apostol  Pabluqa kënö nirqan: “Mana markäkïyoq karqa manam ni imanöpapis Diospa shonqumpaqnö pipis këta puëdintsu, porqui pipis Diosman witeq kaqqa, pë rasumpa kawanqanta y shonqupita patsë asheqninkunata premiunkuna qonqantam creinan” (Hebrëus 11:6). Tsëmi Diosman markäkunantsikqa alläpa precisan. Peru manam, “noqaqa Diosmanmi markäkü” ninantsikllatsu, porqui pëman rasumpa markäkunqantsiktaqa rikätsikuntsik, mandamanqantsikkunata cäsukurmi (leyi Santiägu 2:26).

7. (1) ¿Imanirtaq Jehoväman mañakurqa humildi y respetakoq kanqantsikta rikätsikushwan? (2) ¿Imanötaq rikätsikuntsik shonqupita patsë mañakunqantsikta?

7 Jehovä Diosmanqa alläpa respëtuwanmi mañakunantsik. Y, ¿imanirtaq tsënö ruranantsik precisan? Këman pensarishun, juk presidentita o juk autoridäta parlaparqa, ¿manatsuraq respëtuwan parlapashwan? Tsëmi Jehoväman mañakushqanäqa masraq precisan  humildi y respetakoq kanantsik, porqui Jehoväqa llapanta puëdeq Diosmi (Genesis 17:1; Salmus 138:6). Jinamampis shonqupita patsëmi mañakunantsik, y manam imëpis utilizanqantsik palabrakunallawanqa kutin kutin mañakushwantsu (Mateu 6:7, 8).

8. ¿Imatataq ruranantsik imatapis Jehoväta mañakurqa?

8 Jinamampis, imatapis qomänapaq o imachöpis yanapamänapaq Diosnintsikman mañakurqa, kikintsikpis kallpachakunantsikmi. Por ejemplu, pishipakurnin Jehoväta mañakurqa, ima trabäjullachöpis trabajanantsikpaqmi kallpachakunantsik y llapan puëdinqantsikmannömi trabajanantsik (Mateu 6:11; 2 Tesalonicensis 3:10). Jina tsënöllam ima viciutapis dejanantsikpaq Jehoväman mañakushqa karqa, tsë viciuman chätsikoq cösaskunapita cuidakunantsik (Colosensis 3:5). Kananqa rikärishun Diosman mañakïpaq nunakuna imakunata tapukuyanqanta.

MAÑAKÏPAQ TAPUKUYANQANKUNA

9. (1) ¿Pimantaq mañakunantsik? (2) ¿Imatataq Juan 14:6 textu yachatsimantsik?

9 ¿Pimantaq mañakunantsik? “Ciëluchö këkaq Teytalläkuna” nishpa mañakuyänampaqmi Jesusqa qateqninkunata yachatsirqan (Mateu 6:9). Tsëmi noqantsikpis Jehoväman mañakunantsik. Jinamampis Jesusqa kënömi nirqan: “Noqam näni, rasumpa kaq y kawë kä. Mana noqawanqa, manam ni pipis Teytaman shamïta puëdintsu” nishpa (Juan 14:6). Tsëmi Jesuspa jutinchö mañakunantsik. Porqui pëpa jutinchö mañakurqa, jutsapita y wanïpita salvamänantsikpaq Jehovä kachamunqanta valoranqantsiktam rikätsikuntsik, y tsëran Jehoväqa mañakunqantsikta wiyamäshun  (Juan 3:16; Romänus 5:12). Jinamampis, Jehoväqa Jesustam churashqa Mandakoq Kaq Sacerdöti y Juez kanampaq (Juan 5:22; Hebrëus 6:20).

Imëkapaqmi Jehoväman mañakïta puëdintsik.

10. ¿Qonqurïkurllaku Diosman mañakushwan?

10 ¿Qonqurïkurllaku mañakushwan? Manam. Porqui Jehoväqa manam “qonqurïkur, tëkur o shärëkar noqaman mañakayämi” nimantsiktsu. Antis Bibliachöqa respëtuwan mañakunantsikpaqmi nin (1 Crönicas 17:16; Nehemïas 8:6; Daniel 6:10; Marcus 11:25). Jehoväqa shonqupita patsë mañakunantsiktam munan, y tsëtam mas precisaqpaqqa churan. Shonquntsikllachö karpis, mëchö këkarpis, imata rurëkarpis, paqaspa junaqpapis, pëman mañakushqaqa wiyamäshunmi (Nehemïas 2:1-6).

11. ¿Imakunapaqtaq mañakïta puëdintsik?

11 ¿Imakunapaqtaq mañakïta puëdintsik? Imëkapaqmi mañakïta puëdintsik. Peru imam sïqa, Jehoväpa munënintam cuentaman churanantsik. Tsëmi Bibliachö kënö nin: “Munëninmannö kaqta imatapis mañakushqaqa, pëqa wiyamantsikmi” (1 Juan 5:14). ¿Y kikintsikpaqqa mañakïta puëdintsikku? Awmi, porqui Jehoväman mañakïqa juk alli amïguwan parlënömi. Tsëmi llapan pensanqantsikta y imanö sientikunqantsikta willëta puëdintsik (Salmus 62:8). Jina alli kaqta ruranapaq santu espïritunwan yanapamänantsikpaqpis mañakïta puëdintsikmi (Lücas 11:13). Jina alli pensëkur alli kaqta decidinapaq y problëmakunachö alli tsarakunapaqpis mañakïta puëdintsikmi (Santiägu 1:5). Jina tsënöllam jutsantsikkunapita perdonamänapaqpis rogakïta puëdintsik (Efesius 1:3, 7). Jina nuna mayintsikkunapaq, familiantsikkunapaq y  creikoq mayintsikkunapaqpis mañakïta puëdintsikmi (Hëchus 12:5; Colosensis 4:12).

12. Mañakïnintsikchöqa, ¿imatataq mas precisaqpaq churashwan?

12 Mañakïnintsikchöqa, ¿imatataq mas precisaqpaq churashwan? Jehovä Diosta y pëpa munënintam. Noqantsikpaq llapan ruramunqampitam agradecikushwan (1 Crönicas 29:10-13). Juk kutim imanö mañakuyänampaq kaqta Jesusqa qateqninkunata yachatsirqan, y tsëchömi rikätsikurqan puntataqa imakunapaq mañakunantsik precisanqanta (leyi Mateu 6:9-13). Puntataqa, Jehoväpa jutin respetashqa kanampaq mañakunantsikpaqmi nirqan. Tsëpitanam, Diospa Gobiernun shamunampaq y entëru Patsachö pëpa munënin rurakänampaq kaqta mañakunantsikpaq nirqan. Tsë asuntukunapaq mañakurir-raq kikintsikpaqqa imatapis mañakunantsikpaqmi nirqan. Jehoväpa jutin respetashqa kanampaq y munënin rurakänampaq puntata mañakurqa, tsë cösaskunata mas precisaqpaq churanqantsiktam rikätsikuntsik.

13. ¿Ëka tiemputaq Diosnintsikman mañakushwan?

13 ¿Ëka tiemputaq mañakushwan? Bibliaqa manam nimantsiktsu ëka tiempu mañakunantsikpaq kaqtaqa. Cada cäsuchömi unëpa o rasllapis precisanqanmannö mañakurita puëdintsik. Por ejemplu, itsachi mikunantsikpaqqa raslla mañakurishwan, peru imapitapis Jehoväta agradecikunapaq o ima problëmapapis pasëkanqantsikta willanapaqqa, itsa atska tiempuraq mañakurishwan (1 Samuel 1:12, 15). Tsënö kaptimpis, Jesus kawanqan witsanchö wakin nunakuna rurayanqannöqa manam rurashwantsu, manam nunakuna alabamänantsikllapaqqa atska tiempupa mañakur  kakushwantsu (Lücas 20:46, 47). Tsënö mañakuyanqantaqa mana allipam Jehoväqa rikarqan, porqui shonqupita patsë mañakunantsiktam pëqa munan.

14. (1) ¿Ëka kutitaq Diosnintsikman mañakushwan? (2) ¿Y imanirtaq seguïdu mañakushwan?

14 ¿Ëka kutitaq mañakushwan? Jehoväqa seguïdu mañakunantsikpaqmi nimantsik. Bibliachöqa nin, “mañakur këkäyë”, “mana jaqita Diosman mañakuyë” y “Diosman imëpis mañakuyë” nishpam (Mateu 26:41; Romänus 12:12; 1 Tesalonicensis 5:17).  Jehoväqa imë hörapis listum këkan mañakunqantsikta wiyamänantsikpaq. Tsëmi llapan junaqkuna agradecikushwan kuyakoq kanqampita y imëkata qomanqantsikpita. Jina imëpis alli kaqta ruranantsikpaq, kallpata qomänantsikpaq y shoqamänantsikpaqpis seguïdum mañakushwan. Jinamampis, Diosman mañakïta puëdinqantsikta juk bendiciontanö rikarqa, imë hörapis mañakurmi këkäshun.

15. ¿Imanirtaq mañakurirqa o pipis mañakaramuptinqa “amen” nishwan?

15 ¿Imanirtaq mañakïta usharirqa “amen” nishwan? Amen nishqan palabraqa “tsënö katsun” o “rasumpëpam” ninanmi. Tsëmi amen nirqa, mañakïnintsik shonqupita patsë kanqanta rikätsikuntsik (Salmus 41:13). Jinamampis, Bibliachöqa yachatsimantsik pipis  llapantsikpaq mañakur usharir “amen” nimuptinqa, noqantsikpis “amen” ninantsikpaqmi, y tsëtaqa shimintsik rurinllachöpis nirita puëdintsikmi. Tsënöpam rikätsikuntsik mañakayämunqanwan acuerdu kanqantsikta (1 Crönicas 16:36; 1 Corintius 14:16).

DIOSNINTSIKQA MAÑAKÏNINTSIKTA WIYANMI

16. ¿Imanirtaq nintsik Diosnintsikqa mañakïnintsikta wiyanqanta?

16 Diosnintsikqa mañakïnintsikta wiyanmi, tsëmi Bibliachöqa nimantsik pëqa “mañakïkunata wiyaq” Dios kanqanta (Salmus 65:2; Isaïas 30:19). Jehoväqa tukï formapam rikätsikun millonyëpayan nunakunapa mañakïninkunata wiyanqanta.

17. ¿Imanötaq Jehoväqa rikätsimantsik mañakïnintsikta wiyamanqantsikta?

17 Jehoväqa angelninkunawan y sirweqninkunawanmi mañakïnintsikta wiyamanqantsikta rikätsimantsik (Hebrëus 1:13, 14). Mëtsikaq nunakunam niyan, Bibliapita yachakïta munar Jehovä Diosman mañakuyanqampita pöcu tiempullachö, Jehoväpa testïgunkuna wayinkunaman chäriyanqanta. Tsëmi rikätsikun entëru Patsachö ‘alli willakïkunata’ willakurnin pureq Jehoväpa testïgunkunataqa angelkuna dirigikäyanqanta (leyi Revelacion 14:6). Jinamampis, problëmakunapa pasar o imatapis wanar Jehoväman mañakushqaqa, höraqa juk sirweqninwanmi yanaparamäshun (Proverbius 12:25; Santiägu 2:16).

Creikoq mayintsikkunawanmi Jehoväqa mañakïnintsikta wiyamanqantsikta rikätsimantsik.

18. ¿Imanötaq Jehoväqa santu espïritunwan y Bibliawan rikätsimantsik mañakïnintsikta wiyanqanta?

18 Jina santu espïritunta utilizarmi Jehoväqa rikätsimantsik mañakïnintsikta wiyamanqantsikta. Por ejemplu, juk problëmapa pasarnin mañakushqaqa, santu  espïritunwanmi allita decidinapaq yanapamäshun, y kallpantam qomäshun (2 Corintius 4:7). Jina Jehoväqa Bibliawanmi mañakïnintsikta wiyamanqantsikta rikätsimantsik. Tsëmi höraqa Bibliata leyikarnin yanapakoq textukunata taririntsik. Y höraqa juk creikoq mayintsik reunionkunachö shumaq comentaramunqanmi yanaparamantsik, y tsëpis mañakïnintsikta Jehovä wiyamanqantsiktam rikätsimantsik. Jina höraqa juk anciänutam dirigirin Bibliawan imallatapis shumaq entiendiratsimänantsikpaq (Gälatas 6:1).

19. ¿Imanirtaq höraqa pensashwan mañakïnintsikta Jehovä mana wiyanqanta?

19 Itsachi höraqa pensankiman mañakunqëkita Jehovä mana wiyashunqëkita. Tsëqa këtam yarpänëki: pëqa musyanmi imakunata rasumpa wananqëkita, tsëmi musyan imë y imanö yanapashunëkipaq kaqta. Jinamampis, imatapis rasumpa necesitar mañakunqantsiktaqa y Jehoväman rasumpa markäkunqantsiktaqa (yärakunqantsiktaqa) itsa kutin kutin mañakur-raq rikätsikushun (Lücas 11:5-10). Y höraqa itsachi noqantsik pensanqantsiknötsu Jehoväqa yanapamäshun. Por ejemplu, jatun problëmakunapa pasarnin Jehoväman mañakushqaqa, itsapis tsë problëmakunataqa ushakäratsimunqatsu, sinöqa aguantanantsikpaq kallpanta qomäshun (leyi Filipensis 4:13).

20. ¿Imanirtaq seguïdu mañakushwan?

20 Kë llapan yachakunqantsikmi cläru rikätsimantsik Jehoväman mañakïqa juk jatun bendicion kanqanta. Y segürum këkantsik Jehoväqa mañakunqantsikta wiyamanqantsikta (Salmus 145:18). Jinamampis, shonqupita patsë y seguïdu mañakurqa mas amïgum Jehoväwan kashun.