Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Bibliapita willakïkuna willakoq librömi

 113 kaq willakï

Römachö Pablo

Römachö Pablo

PABLOPA makinchö cadënakunata, y täpëkaq soldädota rikë. Roma markachöshi Pabloqa llawirëkan. Römapa gobernaqnin César juzganantash shuyarëkänaq tsëchö. Watukayänanta haqiyaqshi carcelchö llawirëkaptinqa.

Römaman kima hunaq chärirnash, judïokunapa pushaqninkuna pëman shayämunampaq mañakunaq Pablo. Tsëshi, Römapita atska judïokuna shayämunaq. Tsëchönash, Teyta Diospa reinompita y Jesuspita Pabloqa yachatsinaq. Wakinqa cristiänosh tikrayänaq creikurnin, pero wakinqa manash wiyakuyänaqtsu.

Täpaq soldädokunatapis Pabloqa willapänaqshi. Llapan puëdenqantash Pablo willapänaq tsëchö ishkë watampi llawirëkar. Tsënöpash kë Teyta Diospa Reinompita alli willakïtaqa Cësarpa wayinchö täraqkunapis wiyayänaq, y wakinqa cristiänosh tikrayänaq.

Pero ¿piraq mësaman tëkur qellqëkaq watukakoqqa, musyankiku? Ashi, Timotëosh. Teyta Diospa Reinompita willapäkonqanchöshi pëpis llawirashqa kanaq, pero kananqa yarqurishqanash. Pablo yanapaqnash shamushqa. ¿Imataraq qellqan, musyankiku? Mä rikärishun.

¿Tsë 110 willakïchö Filipos y Éfeso markakunapita yachakonqantsikta yarpankiku? Tsë markakunachö congregacionkunata kicharqa Pablosh yanapakunaq. Kananqa tsë cristiänokunamanshi cartakun, llawiranqan carcelpita patsë. Y Bibliachömi këkäyan Efesios y Filipenses nishqan cartakunaqa. Tsënöllash hina Filipos cristiänokunaman ima qellqanantapis ninaq Pablo Timotëota.

Alläpa kuyakoq y ankupäkoqshi kayashqa filipenseskunaqa Pablowan. Llawirëkaptinshi huk qarënin apatsiyashqa tsëshi agradecikïkan. Tsë qarënin apamoqqa kanaq Epafrodito shutiyoq cristiänosh. Pero cäsish qeshyar wanushqa kanaq. Kananqa kachakärishqanash, tsëshi markan Filïposta kutikur apakonqa Pablopawan Timotëopa cartanta.

Hina tsënö llawirëkarnash, Bibliantsikchö këkaq ishkë cartakunatawan qellqanaq Pabloqa. Colosas markakunachö täraq cristiänokunapaqshi hukta qellqanaq. ¿Imaraq shutin tsë cartapaqa, musyankiku? Colosenses ninshi. Hukninnash Colosas markachö Filemón shutiyoq amïgompaq. Tsë Filemonman cartaqa tsë nunapa sirvienten Onésimo shutiyoq nunapaqshi parlanaq.

Kë Onësimoqa Römatash ewkamushqa kanaq Filemonpita safarnin. Kë markachö Pablo llawirëkanqantash musyarinaq Onësimoqa. Tsëshi Pablo watukaq shamunaq, tsëchönash Pabloqa willapänaq. Tsënöllanash cristiano tikrarinaq Onësimoqa. Tsënash kananqa safëpa shamonqampita yarpakachar qallëkunaq. Tsëpenqa, ¿ima nishparaq Filemonman cartakorqa Pablo?

‘Onësimota perdonëki’ ninshi Pablo Filemonta. Tsëshi, ‘kananqa huk cristiano alli wawqinam, mananam sirvientekillanatsu, tsëmi kutikätsimü,’ nishpa ninaq. Tsënash Colosas markata kutikorqa ishkë cartakunata apanaq Onésimo, huktash Filemonpaq, y huknintanash colosensekunapaq. ¡Imanöraq sirvienten Onésimo pënö cristiano kanqanta musyarïkur Filemón kushïkorqa!

Tsë qellqanqan cartakunachöshi filipenses cristiänokunata, ‘Timotëotam qamkunaman kachëkämü. Hina noqapis watukayashqëkinam,’ nishpa ninaq. Y Filemonpaqnash, ‘tsëchö posadakunäpaq alistapakurëkë,’ nishpa Pablo qellqapunaq.

Tsënönash carcelpita yarqurir, hinantin markakunachö cristiano mayinkunata watukanaq. Tsëpitanash Römachö yapë Pablota llawiratsiyänaq. Kananqa wanutsiyänanta musyarishqanash. Tsënash, ‘shamïki raslla,’ nishpa Timotëoman cartakïkunaq. Hina ‘Teyta Diosman fielmi kashqa kä y bendecimanqam,’ ninaqshi. Pablo wanurishqampita ichik unëllatanash Jerusalén markata yapë ushakäratsiyänaq, kananqa romänokunanash kayänaq.

Pero Bibliachöqa masran kan. Ushanan librokunataqa apóstol Juan nishqanwanshi Jehová qellqatsinaq, Revelacionshi kanaq hukqa. Shamoq tiempokunapaqmi kë libroqa parlan. Mä rikärishun imash pasanqa shamoq tiempokunachöqa.