JESUSPA qateqninkunash kayan kë nunakunaqa. Jerusalenchöshi këkäyan Jesús ninqannö. Wayi rurinmanshi bunrurur huntarinaq llapan qateqninkuna ëllukashqa shuyarëkäyaptin. Tsëpitanash atska vientonö raslla pasarinaq. Y llapampa peqankunachöshi rakikashqa nina rawrëkaqnö yuririnaq. ¿Qateqninkunapa peqankunachö rikankiku ninata? ¿Imaraq tsëqa?

¡Huk milagrosh! Ciëlochöshi Jesús yapë papäninwan këkan, y tsëshi llapan qateqninkunaman Teyta Diospa espíritu santonta ramëkämun. ¿Imata rurayänampaqraq yanaparqan tsë espíritu, musyankiku? Llapan qateqninkunatash hukläyayan parlaratsinaq.

‘¡Imaraq pasëkun!,’ nishpash Jerusalenpita atskaq nunakuna shamïkuyänaq, fuertepa vientonö bururoqta wiyar. Pentecostés nishqan israelita fiestamanshi wakin markakunapitapis shayämushqa kayänaq nunakuna. ¡Wamayëpaqshi espantëkuyan kë watukakoq shamoqkunaqa! Llapan Dios ruranqampitash tsë nunakunapa parlankunachö Jesuspa qateqninkunaqa yachatsir qallëkuyänaq.

‘Kë llapan nunakunaqa Galilea markallapitam kayan,’ ‘tsëpenqa, ¿imanötaq tsë tukïläya markachö parlanqantsiknöqa parlayan?,’ nishpash niyänaq tsë fiestaman shamoq nunakuna.

Tsëshi tsë tapukoqkunata käyitsinampaq shäkurinaq Pëdroqa. Imanöpis Jesusta wanutsiyanqanta y tsëpita Jehová kawaritsenqantash llapan nunata willar qallëkunaq. ‘Kananqa Teyta Diospa lädonchömi këkan Jesusqa.’ ‘Y pëmi änikonqan espíritu santota ramaramushqa, tsëmi pasëkan kë rikëkäyanqëki milagroqa,’ nishpash nikan Pëdroqa.

Tsëshi imanö Jesusta wanutsiyanqanta Pedro willariptin llakishqa tikrariyänaq tsë nunakuna. ‘¿Imataraq rurayäman?,’ nishpash tapukuyänaq Pëdrota. Tsënash, ‘mana alli rurënikikunatam haqiyänëki y bautizakuyänëkim,’ nishpa ninaq Pedro. Tsëshi tsë hunaqlla 3.000 bautizakuriyänaq y Jesuspa qateqnin tikrariyänaq.