Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Bibliapita willakïkuna willakoq librömi

 109 kaq willakï

Cornelio nunata Pedro watukan

Cornelio nunata Pedro watukan

KËCHÖ shëkaqqa apóstol Pëdrom, y qepanchö shëkaqkunaqa amïgonkunash kayan. Pero ¿imanir-raq Pedro nöpanmanqa qonqurikïkan kë nuna? ¿Tsënö allitsuraq ruranman? ¿Piraq kë nunaqa, musyankiku?

Cornelio ninshi kë nunapa shutenqa. Roma soldädokunapa huk mandakoqninshi. Manash kë nunaqa Pëdrota reqintsu, pero wayinman invitanampaqshi niyashqa. Mä rikärishun imanöshi kë llapan pasanaq.

Judïosh kayänaq Jesuspa punta qateqninkunaqa, pero Cornelioqa manash judïotsu. Mana judío këkarpis Teyta Diostash kuyan mañakumpis pëmanshi, y llapan nuna mayimpaqshi imëka allikunatapis ruran. Tsënash huk tarde: ‘Teyta Diospa favornintam tarishqa kanki, y llapan mañakïnikikunatam yaskishunki. Y Jope lamar lädonchö Simón nishqan nunapa wayinchö täraq Pedro nishqan nunata ashimï,’ nishpash yuripurir huk ángel ninaq.

Tsëtash Cornelio tsë hora ruranaq. Simonpa wayin hananchönash Pëdroqa waränin qoya këkänaq. Tsëchönash, ciëlopita patsë tukïläya animalyoq huk tela urëkämoqta rikëkanqanta Pedro pensanampaq Teyta Dios rurëkänaq. Pero Teyta Diospa leynin yachatsikonqannöqa mana mikuna animalkunash kayänaq, tsënö këkaptimpis: ‘Pedro, sharkï, mikï wanuratsir,’ neqtash wiyarinaq.

Tsënash Pëdroqa, ‘¡manam!’ ‘Mana limpio animalkunataqa manam ni imëpis mikushqatsu kä,’ nishpa yaskirinaq. Pero ‘Teyta Dios limpiom nenqanta ama rakcham nikïkënatsu,’ neqtash yapë wiyarinaq. Kima kutish kënö pasanaq. Tsënash ima ninanraq këqa nishpa yarpakachëkaptin, Cornelio kachakonqan nunakuna chäriyänaq Pedro asheq.

Tsë hörallanash, ‘noqam ashiyanqëki nunaqa kä, ¿imanirtaq shayämorqonki?,’ nishpa yarparamunaq. Tsënash, ‘Corneliota wayinman invitashunëkipaq huk ángel nishqa kaptinmi shayämorqö,’ nishpa käyiratsiyaptinnash, ‘qamkunawanmi ëwä,’ ninaq Pedro. Waräninllanash Cesarea markata Cornelio watukaq Pedro amïgonkunawan heqariyänaq.

Más reqishqa amïgonkunata y llapan kastankunatash Cornelio wayinman qayëkatsimushqa kanaq. Y këchö rikëkanqëkinöshi Cornelioqa Pedro chäriptin qonqurikïkunaq nöpanman. Tsënash, ‘noqaqa nunallam kä, sharkï,’ ninaq Pedro. Ashi, nunakuna nöpanman qonqurikïqa manash allitsu ninmi Bibliaqa. Jehová Diosllatash adorashwan.

Tsënöshi tsëchö llapan këkaqkunata Bibliapita willapar qallëkunaq Pëdroqa. Hina ‘llapan servi munaqkunatam Teyta Diosqa chaskin,’ nishpash ninaq Pedro. Y tsënö parlëkaptinnash espíritu santonta Teyta Dios kacharamunaq, y tsënash hukläyayan parlar qallëkuyänaq llapan nunakuna. Tsënash judïokunallata Teyta Dios favorecenqanta pensayaq Pëdrowan shamoqkunaqa espantëkuyänaq. Këqa mana ni pita o ni ima räzata Dios más allitanö mana rikanqantash yachatsiyänaq. ¿Manaku llapantsikpaq kënö yarpëqa alläpa alli?