JESUSPA cuerpon panteonchö kanqampita Pëdrowan Juan yarqarayämuptinshi, hapallanlla quedakunaq María, y tsëchöshi waqar qallëkunaq. ¡Tsëpitanash ishkë angelkunata rikärinaq panteón rurinman qawëkur! Tsënash, ‘¿imanirtaq waqanki?,’ nishpa tapuriyänaq tsë angelkuna.

‘Señornïtam apakuyashqa, y manam mëman churayanqantapis musyätsu,’ nishpash María yaskirinaq. Tsënash huk nunata tumëkur rikärinaq. Tsëshi, ‘¿pitataq ashinki?,’ nishpa tapurinaq tsë nunaqa.

‘Huerta rikaqchi kë nunaqa y Jesuspa ayantaqa itsapis pëchi apakushqa,’ ninaqshi Marïaqa. Tsëshi, ‘qam apakushqa karqa mëman churanqëkitapis willëkamë,’ nishpa ninaq. Pero kë nunaqa Jesusshi kanaq. Hukläya cuerpoyoqshi Jesusqa, tsëshi Marïaqa reqintsu. Y shutimpa qayariptinnash Jesús kanqanta reqirinaq. Tsënash, ‘¡Señortam rikärerqö!,’ nishpa qateqninkuna willakoq ewkunaq.

Tsë hunaqllanash, Emaus markaman qateqninkuna ëwëkäyaptin huk nuna taripäriyänaq. Jesús wanushqa kaptinshi qateqninkunaqa alläpa llakishqa ewkïkäyänaq. Tsënash tsë nunaqa Bibliapita selläma willapäyänaq, y tsënöpash pëkunapis alliyäriyänaq. Mikuyänampaq hamarirnash, Jesús kanqanta reqiriyänaq tsë ishkan qateqninkuna. Tsëllanash tsinkarinaq, y tsë hörash apostolninkuna willaq kutikuyänaq Jerusalenta.

Tsëyaqnash Pëdrotapis yuripurinaq Jesusqa. Kë llapanta wiyarirnash wakinkunaqa kushïkuyänaq. Tsënash Jerusalenman chärir taririyänaq apostolninkunata. Y, ‘nänichömi Jesusqa yuripïkayämashqa,’ niyanshi. ¿Imaraq pasan kë llapanta willakïkäyaptin, musyankiku?

Dibüjota rikärïki. Punku wichqarëkaptinshi cuarto rurinchö yuririnaq Jesusqa. ¡Imanö kushikïpaqraq tsë hunaqqa karqa llapan qateqninkunapaq! ¿Ëka kutiraq Jesusqa yuriporqa qateqninkunata? ¿Pitsqa kutitsuraq?

Jesús yuripuriyaptenqa manash pëkunawantsu këkänaq apóstol Tomás. Tsëshi, ‘¡Señortam rikäyashqa kayä!,’ niyan. Tsënash, ‘kikïpa nawïwanran rikëta munä creinäpaqqa,’ ninaq Tomás. Tsëpitanash, huk punkun wichqashqa cuartochö këkäyan puwaq hunaq pasashqanchö, y kananqa tsëchöshi këkänaq Tomaspis. Tsëmannash yurirkunaq Jesús. Kananqa Tomaspis creirinaqshi.