Wanonqampita kima hunaqllatash Jesús kawariramunaq. Pitsqa kutish tsë hunaqqa yuripunaq qateqninkunata. Tsënöshi 40 hunaq yuripushqa kanaq. Tsëpitanash ciëlota ewkunaq wakin qateqninkunapis rikarëkäyaptin. Y chunka hunaq pasarishqanchönash, Jerusalenchö Jesuspa qateqninkuna shuyarëkäyaptin Teyta Dios espíritu santonta ramaramunaq.

Tsë unëllatanash apostolkunata llawiratsiyänaq chikeqninkuna, pero huk angelshi punkuta kicharapunaq ewkuyänampaq. Hina chikeqninkunash tsampipa wanutsiyänaq Jesuspa qateqnin Esteban nishqantapis. Pero pëkunapita apóstol Pablo nishqanta especialtanö Jesús akranqantapis yachakuntsikmi. Hina Jesús wanonqampita kima wata pullan pasanqanchönash, mana judío Cornelio nuna yachatseq Pëdrota Teyta Dios kachanaq.

Tsëpita 13 wata pasariptinnash willapäkoq ëwar qallëkunaq Pablo. Yapë kutiptinnash Timoteo yanaqänaq. Y tsënö Teyta Diosta servir puriyanqanchöqa allita mana allitapis pasayänaqshi Pablo yanaqinkunawan. Tsëpitanash Roma markachö llawiränaq Pablo. Y yarqunaq ishkë watachöraqshi llawiranqampita, pero yapëshi llawiriyänaq y wanïkatsiyänaq. Y tsënöshi kë QANCHIS kaq Parte willakïchöqa 32 wata pasanaq.