JUEVES ampinash. Kananqa Pascua cënata mikuyänampaqshi hatun cuartoman shayämushqa Jesús 12 apostolninkunawan. Y Judas Iscariötesh tsë yarqurëkaqqa. Imanöpis Jesusta tsariyänampaqshi sacerdötekunata willanqa.

Huk hunaq pishikaptinshi, ‘¿Jesusta tsarir yanapayapteqqa, imäraq qoyämanki?,’ nishpa nishqa kanaq Judas sacerdötekunata. Tsënash, ‘kima chunka qellëtam’ qoyashqëki niyänaq. Tsëshi Jesús kaqta sacerdötekunata pushanampaq Jüdasqa ëllukänaq pëkunawan. ¡Imanö mana allim! ¿Manaku tsënö parecipushunki?

Tsënöshi usharinaq Pascua mikï. Pero huk especial cënatanash Jesús qallëkunaq. Tsëchöshi, ‘këmi cuerpo ninan, mikurkuyë,’ nishpa qonaq huk tantata tsarirkur apostolninkunata. Tsënöllash hina, ‘këmi yawarnï ninan, qamkunarëkurmi ramakanqa, upurkuyë;’ nishpa vïnoyoq väsonkuna qonaq. Këtam, ‘cena del Señor,’ nishpa nin Bibliachöqa.

Egiptochö israelïtakuna këkäyaptin wayinkuna hanampa Teyta Diospa angelnin ‘pasarir,’ pero egipciokunapa wayinkunachöqa llapan mayor tsurinkunata wanïkatsenqan yarpëchöshi, tsë Pascua mikïtaqa israelïtakuna mikuyaq. Pero kananqa pëkunarëkur wanonqanta qateqninkuna yarpäyänantash munan Jesús. Tsëpaqshi cada wata kë cënaqa.

Mikurirnash, ‘chachaq fënikikuna kanqa y alleq tsarakuyanki,’ nishpa apostolninkunata Jesús ninaq. Ushariyänampaqnash Teyta Diospaq cantarir yarquriyänaq. Itsapis kananqa ichik pullampaqas masllanachi. ¿Mëtaraq ëwayan?