Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Bibliapita willakïkuna willakoq librömi

 85 kaq willakï

Animalkuna llawiränanchö Jesús yuririn

Animalkuna llawiränanchö Jesús yuririn

¿PIRAQ kë llullïtuqa, musyankiku? Awmi, Jesusmi. Huk establochöshi yuririshqa këkan. Animalkuna llawiräyänan wayish establoqa. Huk pesebre nishqanmanmi këchö María Jesusta punïkätsin, tsë pesebreqa ashnukunapa y wakin animalkunapa mikïninkuna churayäpunanshi. Pero ¿imanir-raq animalkunawan këkäyan Josëwan María? ¿Huk llullu yurinampaqnötsuraq kë wayiqa?

Manam, manam tsëpaqnötsu. Pero këchö pëkunaqa këkäyänaq: ‘Llapan nunakuna yuriyanqan markankunaman kutïkur shutinkunata huk libroman churayätsun,’ nishpa huk leyta César Augusto Römapa gobernaqnin horqashqa kaptinshi. Y kë Belén markachöshi Josëqa yurishqa kanaq. Pero manash posädata tariyashqatsu kayänaq pëkunaqa tsë markaman chärir. Tsëshi, animalkuna llawirëkäyanqan wayillaman ewkayämushqa kayänaq. ¡Y tsë hunaqllanash Marïapa wawan Jesús yuririnaq! Pero pëqa allim këkan këchö rikëkanqëkinöpis.

¿Jesús rikaq shamïkaq mitsikoqkunata rikankiku? Ampipa jayaqchö täpakïkäyaptinshi, huk aktsi chillapyarkunaq hiruroq pëkunaman. ¡Huk angelshi kanaq! Alläpash mantsakëkuyänaq mitsikoqkunaqa. Pero ‘¡ama mantsakäyëtsu! Alli willakïkunatam apamü. Kananmi Cristo yuririshqa Belenchö. ¡Pëmi nunakunata salvanqa! Y animalkuna mikuyänanchömi ayushqa iskarëkan,’ nishpash ninaq kë angelqa. Tsëllanash, Teyta Diosta alabar qallëkuyänaq atska angelkuna yurirkur. Tsë hörallanash Jesús asheq shamïkuyänaq mitsikoqkuna, y taririyashqash.

¿Imanir-raq Jesusqa alläpa especial, musyankiku? ¿Rasumpëpaqa piraq? Yarpë, Teyta Diospa punta Tsurimpitam parlarqantsik qallanan willakïkunachö. Pëshi Patsatapis ciëlotapis y llapan imëkatapis rurar uryayänaq papäninwan. ¡Kaq këqa karqa Jesusmi!

Ashi, ciëlopita tsurimpa kawënintash Jehoväqa Marïapa pachanman churanaq. Tsënash, wakin wambrakunanö winar qallëkunaq mamampa pachanchö. Pero Teyta Diospa tsurinshi kanaq kë wambraqa. Tsënöpash Belenchö animalkuna llawiyänan wayichö yuririnaq. ¿Kananqa käyinkiku imanir Jesús yurenqanta willakur angelkuna kushiyanqanta?