Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Bibliapita willakïkuna willakoq librömi

 78 kaq willakï

Perqachö qellqashqa

Perqachö qellqashqa

¿IMATAQ këchöqa pasëkan? Fiestachöshi këkäyan. Alläpa reqishqa nunakunatash waranqëpayan qayëkatsimushqa kë Babiloniapa reynin. Jehoväpa Jerusalén templopeq apakuyanqan öropita y qellëpita cöpankunata y tazonninkunatash inshikäyan. Tsënö këkäyaptinnash, perqachö huk maki yurirkur dëdonkunawan qellqar qallëkunaq. Tsënash alläpa mantsakëkuyänaq.

Nabucodonosorpa willkan Belsasar nishqan nunash kananqa rey këkan. Tsënash yachaqninkunata apëkayäpunampaq qayakïkunaq. ‘Alläpa reqishqa gobernaqmi kanqa y atska qarëkunatam chaskenqa kë perqachö qellqarëkaqpa ima significädon kanqanta willëkamaqqa,’ nishpash ninaq rey. Pero tsë perqachö qellqarëkaq nenqantaqa, manash ni pï yachaqnin leita yachanaqtsu ni ima significanqantapis musyanaqtsu.

Tsënash, mikïkäyanqanman büllata wiyar reypa maman yëkurinaq. ‘Aksëqa këtsu, ama alläpaqa mantsakëtsu. Huk santo Dios reqeq nunam kë markachö kan. Llapan yachaqkunapa mandaqninmi churarqa abuelïtïki Nabucodonosor rey këkar. Daniel ninmi shutin. Qayaratsimï, y ima significanqantapis pëmi nishunki,’ nishpash ninaq mamänin rey Belsasarta.

Tsëshi Danieltaqa tsë hora qayarayämunaq. Qarëninkunata mana chaskita munarirnash, Belsasarpa abuëlonta imanir rey këpita Jehová horqarenqanta willar qallëkunaq Daniel. ‘Alläpa orgullösom abuelïtïkeqa karqa, tsëmi Jehová castiguëkorqa,’ ninshi Daniel rey Belsasarta.

‘Pero llapan pëta pasanqantapis qamqa musyëkarqonkim, pero Nabucodonosornö orgullösoran këkanki. Jehoväpa templompita cöpankunata y tazonninkunata apëkamurmi tsëkunachö uporqonki. Manam Kamakoq Teyta Diosnintsikta respetarqonkitsu, tsëpa rantinqa rumipita, qerupita rurashqa dioskunatam alabarqonki. Tsëmi kë willakïkunata perqachö qellqamunampaq kachamushqa kë makita Teyta Dios,’ nishpash ninaq Daniel.

‘MENÉ, MENÉ, TEKEL y PARSÍN,’ ‘ninmi perqachö qellqarëkaqqa,’ ninshi Daniel.

‘Teyta Diosmi yupashqa gobernanëki hunaqta y ushakätsishqa ninanmi MENÉ nishpa qellqarëkaqqa. Y balanzachömi pesashqa karqonki y mana alli kanqëkitam tarishqa ninanmi TEKEL nishpa qellqarëkaqqa. Hina medos y persaskunapaqmi kanqa gobernacionnikipis ninanmi PARSÍN,’ nishpash ninaq Daniel rey Belsasarta.

Manaraqpis Daniel parlar ushaptinshi, Babiloniaman yëkur qallëkuyänaq tsë medos y persaskuna. Belsasartapis wanïkatsiyanshi y llapan markachöshi këkäyänaq. ¡Tsë ampillash cumplikärinaq perqachö qellqarëkaqqa! Pero ¿imanöraq israelïtakuna kanan kayanqa? Tsëpitanam yachakushun, pero kananqa rikärishun Danielta imapis pasanqantaran.

Daniel 5:1-31.