Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Bibliapita willakïkuna willakoq librömi

 61 kaq willakï

David rey tikrarin

David rey tikrarin

YAPËSHI Davidta tsarita tïran Saulqa. Tsëshi ashiyänampaq llapampitapis más allin kaq 3.000 soldädonkunata apakurkur ëwanaq Saulqa. Tsëta David musyarirshi, tsë ampi mëchö Saúl soldädonkunawan acampëkäyanqantapis musyanampaq kachanaq musyapakoqkunata. Tsënash ishkë nunankunata, ‘¿mëqëkitaq noqawan Saulpa campamentonman ëwëta munayanki?,’ nishpa tapurinaq.

Tsënash, ‘noqawan ëwashun,’ nin Abisai. Abisaïqa Davidpa panin Seruya nishqan warmipa wawanshi. Saúl nunankunawan punuyanqanyaqshi, Davidwan Abisaïqa campamentoman yëkuriyan. Y Saulpa peqan lädonchö churarëkaq yaku winana järrantawan lanzantash apakuyan. Llapan punukashqa karshi mana ni rikäyantsu ni wiyayantsu.

Kanan rikë Davidtawan Abisaïta. Safarirshi hirka puntanchö këkäyan. Tsëpita patsënash Israel soldädokunapa mandaqninta: ‘Abner, ¿imanirtaq reynikita alleq täpëkankitsu? ¡Rikë! ¿Mëchötaq yaku winakuna järranwan lanzan këkan?,’ nishpash qaparillapa qayakïkunaq.

Tsënash riwarkamur Saulqa David kanqanta reqirinaq, y ‘¿Davidku kanki?,’ nishpa tapurinaq. ¿Rikankiku tsë ura dibüjochö Saultawan Abnerta?

Tsëpitanash Davidqa, ‘awmi, noqallämi kallä tëtallë rey,’ nishpa yaskirinaq. Hina, ‘¿imanirtaq tsarimëta munanki? ¿Ima mana allitataq rurarqoq? Këchömi lanzallëki këkan tëtallë rey. Pï karpis asheq shamutsun,’ nishpash ninaq David Saulta.

‘Mana allitam’ y ‘upa rurëtam rurarqö,’ ninshi Saulqa. Tsënash David ewkun y Saulpis wayintash kutikunaq. Pero ‘imë karpis wanïkatsimanqam Saulqa. Filistëokunapa nacionninmanmi safakunä,’ ninshi Davidqa. Y tsënöshi ruran. Tsëshi filistëokunata uliparnin kananqa pëkunallapaqna kanqanta David creiratsin.

Tsëpita unëllatanash Israelwan peleaq ëwayan filistëokuna. Tsë peleachönash wanuriyan Saulwan Jonatán. Tsënash alläpa llakishqa këkar huk shumaq cancionta qellqanaq: ‘Jonatán, kuyashqa wawqi, imanömi llakïkü qamrëkur. ¡Alläpam kuyarqaq!,’ nishpa.

Tsëpitanash Israelta kutikunaq Davidqa, Hebrón markaman. Tsëchöshi Saulpa tsurin Isbóset nishqan nunata rey kanampaq akrayanqan nunakunawan, y David rey kananta munaq nunakuna peleayänaq. Pero Davidpa nunankunash ëwatsiyänaq. Rey tikranaq 30 watayoq këkarshi David. Y Hebronchöshi qanchis wata y pullan gobernanaq. Tsë markachö Davidpa tsurinkuna yureqqa Amnón, Absalón y Adonías nishqanshi kayan.

Hina tiempowannash tsë selläma shumaq Jerusalén markaman yëkuyanqa David soldädonkunawan. Y tsë peleataqa pushan Davidpa panin Serüyapa wawan Joabshi. Y tsërëkurshi soldädonkunapa mandaqnin churan David. Y Jerusalén markachöshi gobernarnin qallëkun David.

1 Samuel 26:1-25; 27:1-7; 31:1-6; 2 Samuel 1:26; 3:1-21; 5:1-10; 1 Crónicas 11:1-9.