Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Bibliapita willakïkuna willakoq librömi

 46 kaq willakï

Jericó markapa perqankuna

Jericó markapa perqankuna

¿IMARAQ kë Jericó markapa perqankunata huchïkatsin? Hananman huk bomba ratëkushqanömi. Pero manash bombakuna ni cañonkuna tsë tiempochöqa kanaqtsu. ¡Jehoväpa huk milagronshi këpis! Mä rikärishun imanöshi kë pasanaq.

Wiyë Josuëta Jehová nenqanta: ‘Kë markapa hiruroq tumë soldädïkikunawan. Hoqta hunaq tumayë huk kutiyan cada hunaqchö arca del pacto nishqanta aparkur. Waqrankuna pükallapa arca del pacto nishqan nöpanta qanchis sacerdötekuna ëwayanqa.’

Hina, ‘qanchis kuti tsë markapa hiruroq tumayanki qanchis hunaqchöqa. Tsëpitana, alli unë pükayanki waqrakunata, hina guërrapaqnö llapëki qapariyanki. ¡Y limpum huchuriyanqa perqakunapis!,’ nishpash ninaq.

Jehová nenqannöllash rurayänaq Josué y llapan nunakunapis. Upällallash kayänaq hiruroq tumarnenqa. Puriyanqanlla y waqra pükayanqanllash wiyakunaq. Mantsakäyarqachi Jericó markachö nunakunaqa. ¿Ventänachö puka waska warkurëkaqta rikankiku? ¿Piparaq tsë ventana? Awmi, ishkan musyapakoqkuna niyanqannöshi Rahabqa waskata warkushqa. Wayin ruripitash llapan familianwan rikarëkäyan ima pasanantapis.

Y qanchis kutish hiruroq tumayänaq tsë markapa qanchis kaq hunaqchö, tsëpitanash waqrata pükayan y soldädokuna qapariyan, tsënash perqakunapis limpu ishkiriyänaq. Tsënash: ‘Llapan nunakunata wanutsiyë y kayayë llapan markata llapannintin, pero hiërrota, cobreta, örota y plätataqa ama ushakätsiyëtsu, tabernäculopaqmi kayan tsë llapan,’ nishpa ninaq Josué.

‘Rahabta llapan familiantawan horqayämi wayimpita,’ nishpash Josué mandanaq ishkan musyapakoqkunata. Kë llapanshi salvakuyänaq musyapakoqkuna niyanqannö.

Josué 6:1-25.