Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Bibliapita willakïkuna willakoq librömi

 52 kaq willakï

Gedeón 300 soldädonkunawan

Gedeón 300 soldädonkunawan

¿KËCHÖ pasëkanqanta rikankiku? Israelpa soldädonkunash kayan. Tsëchö kukurëkaqkunaqa yakutash upïkäyan. Lädonkunachö shëkaqqa juez Gedeonshi. Imanöpis yaku upuyanqantash rikarëkan.

Alleq rikaptikeqa llapan nunakunapis hukläyam yakuta upïkäyan. Yakuyaq lätëkurmi wakinqa upïkäyan. Pero makinwanmi shiminyaq yakuta apëkan huk soldädoqa, mäkoq mäkoqlla rikachakunampaq. Këqa alläpa importantesh, tsënö mäkoq mäkoqlla yaku upoqllata akranki, nishqash Jehová Gedeonta. Wayinkunatash wakinqa kutikuyanman. Mä rikärishun imanirshi.

Mana Jehoväta wiyakuyanqanchöshi yapë israelïtakuna alläpa sasa kawëman chäkuriyashqa. Alläpash hipëkatsiyan y llakitsiyan madianïtakuna alläpa puëdeq tikrakurirnin. Tsënash Jehoväpa yanapëninta mañakuyan israelïtakuna, y tsë mañakïninkunataqa Jehová wiyanaqshi.

Tsëshi Jehová soldädonkuna ashinampaq ninaq Gedeonta, y tsënash 32.000 soldädokunata ëllurinaq. Pero Israelpa contran soldädokunaqa kayänaq 135.000. Tsënö kaptimpis, ‘alläpa atskam soldädïkikuna,’ ninshi Jehová Gedeonta. ¿Imanir-raq tsënö nin?

Tsëtaqa nin, peleata ganarirnin kikinkunallapita Jehoväpa yanapëninta mana necesitashpa ganayanqanta mana pensayänampaqshi. Tsëshi, ‘llapan mantsaq nunakunaqa wayinkunata kutikuyätsun,’ nitsin Gedeonta Jehová. Tsënö Gedeón niptinshi 22.000 soldädokuna ewkuyan. Tsënash 135.000 soldädonkunawan peleayänampaq 10.000 soldädonkunalla Gedeonpa quedariyänaq.

Pero ¡wiyë!: ‘Alläparan soldädïkikuna kan,’ ninshi Jehová. Tsënash ninaq Gedeonta tsë yakupita soldädokuna upuyänampaq y llapan mana rikachakushpa lätëkur upoqkunata wayinkunata kutïkatsinampaq. Y ‘llapan rikachakur rikachakur yaku upoq 300 soldädokunallawanmi ganatsishqëki peleata,’ nishpash Jehová äninaq.

Peleayänan tiemponash chärinaq. Tsë 300 soldädonkunatash Gedeón kimaman rakinaq. Jarra rurinchö huk antorchatawan huk waqratash qonaq cada soldädota. Pullan ampinönash, chikeqninkunapa campamentonkuna hiruroqchö ëllukäriyänaq. Tsënash, waqrankunata pükayan, järrankunata pakiyan y ‘¡Jehoväpa y Gedeonpa espädan!,’ nishpa llapan qapariyan. Y limpu pantakashqa, mantsakashqash chikeqnin soldädokuna riyarkayämunaq y llapanshi safakuyänaq, tsënöpash israelïtakuna ganariyänaq.

Jueces, capítulos 6 a 8.