Sinaí hirkayaqshi israelïtakunata Moisés apanaq Egiptochö esclavo kayanqampita horqarïkur, y tsë hirkachöshi leyninkunata Teyta Dios qonaq. Tsëpitanash, Canaán markaman kachanaq chunka ishkë musyapakoqkunata. Pero chunkash mana alli willakïwan kutirayämunaq. Egipto kutikïtash israelïtakunatapis munaratsiyänaq. Tsënö fëninkuna pishipash, israelïtakunata Teyta Dios castiguëkunaq chusku chunka wata desiertochö purikuyänampaq.

Tsëpitanash Canaanman israelïtakuna pushaq akrariyänaq Josué nishqan nunata. Y kikin Jehoväshi milagrokunata rurar yanapanaq Canaanman yëkuriyänampaq. Jordán mayutapis tsakiratsinaqshi, Jericöpa perqankunatapis huchuratsinaqshi y huk hunaq entërosh Intitapis päraratsinaq. Tsënöshi hoqta watachö cananëokunata qochiriyänaq llapanninkunata.

Josuëpita qallëkurshi 356 wata juezkuna gobernayänaq Israelta. Barac, Gedeón, Jefté, Sansón y Samuel, pëkunapitam yachakuntsik. Hina warmikunapis kayänaqshi, Rahab, Débora, Jael, Rut, Noemí y Dalila. Kë KIMA kaq Parte nishqan willakïkunachöqa total pasanaq 396 watash.