Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Bibliapita willakïkuna willakoq librömi

 33 kaq willakï

Puka lamarta tsimpayan

Puka lamarta tsimpayan

¡KËCHÖ pasëkanqanta rikë! Puka lamar yakuman shukshunwan makyarëkaqqa Moisesmi. Israelïtakunash kayan pëwan yamë këkaqkunaqa. Tsë yakuchö wanïkaqkunaqa kayan Faraón y llapan soldädonkunash. Mä rikärishun imanöshi kë pasanaq.

Egiptopita israelïtakuna ewkuyänampaqshi Faraón ninaq chunka kaq castigo pasariptin, pasaqchö yachakonqantsiknö. Tsëshi tsëpita ewkur kayänaq 600.000 ollqukunalla, más warmikuna y wambrakunapis. Hina Jehoväman creikoq mana israelïtakunapis kayänaqshi. Y cabrankunatapis, üshankunatapis, tukïläya animalninkunatapis apakurkurshi Egiptopita ewkuyänaq.

Tsënöllash hina, egipciokunata israelïtakuna mañakuyänaq röpata, qellëpita y öropita imëka rurashqatapis tsëpita yarqukurnin. Chunka kaq castïgota rikashqa karshi, egipciokunaqa alläpa mantsakashqa kayänaq. Tsëshi israelïtakuna llapan mañakuyanqanta qoykuyänaq.

Tsënöllanash Puka lamarman chäriyänaq y tsëchöshi hamakuriyänaq. Tsëyaqnash llapan sirveqninkunawan Faraonqa pësar qallëkuyänaq, israelïtakuna ewkuyänampaq haqiriyanqanta. ‘¡Esclävontsikkuna ewkuyänanta haqirerqontsik!,’ nishpash niyaq.

Tsënöshi Faraonqa yapë hukläya pensakurkunaq. Tsë hörash soldädonkunata y guërrapaq cärronkunata alistapakurir, israelïtakuna qepanta ëwar qallëkunaq, 600 especial cärronkunawan y Egiptochö wakin cärrokunawampis.

Alläpash mantsakëkuyänaq israelïtakuna Faraón soldädonkunawan shamoqta rikarnin. Manash ni mëpa safakïta puëdeyänaqtsu. Qepankunapash ëwayänaq egipciokuna y puntankunachönash Puka lamarlla kanaq. Pero egipciokuna y israelïtakuna chöpinmanshi Jehová churanaq pukutëta. Tsënöpash egipciokuna israelïtakunata rikëta puëdeyänaqtsu wanutsiyänampaq.

Tsënash Puka lamarman Moisés shukshunta kamärinampaq mandanaq Jehová. Tsënö rurariptinnash, Inti yarqamunan lädopita Jehová wamayëpaq vientïkatsinaq. Tsënöpash ishkëman kichakärinaq tsë lamar yaku.

Y tsë tsaki patsa kicharëkaqpanash tsimpar qallëkuyänaq israelïtakuna. Y alli unëraqshi demorëkuyänaq tsëtsika nunakuna llapan animalninkunawan huknin lädoman tsimpayänampaq. Por finnash yapë egipciokuna israelïtakunata rikäriyänaq, tsënash qepankunata qatiparnin heqakïkuyänaq lamarman.

Tsëta rikarnash, cärronkunapa ruëdankunatapis Teyta Diosqa limpu horqakäratsinaq. Tsënash mantsakëwan qaparikachar qallëkuyänaq egipciokuna: ‘Israelïtakunarëkurmi Jehová peleëkan noqantsikwan. ¡Ëwakushun këpita!,’ nishpa. Pero alläpa tardenash kanaq.

Kë dibüjochö rikëkanqëkinöshi, kë Puka lamarman shukshunta kamärinampaq, ninaq Jehová Moisesta. Tsënash egipciokunata cärrollantin limpu tsapar qallëkunaq punta kanqanman kutir. Llapan soldädontinshi Faraón yëkushqa kanaq lamarman. ¡Manash ni hukllëllapis kawëkar yarqamunaqtsu!

¡Imanöshi salvakushqa karnin israelïtakuna kushïkuyänaq! Tsëshi Jehoväta agradecikurnin nunakuna cantariyänaq: ‘Jehovämi ganashqa pelëata. Lamarchömi soldädokunata cabällonkunatawan ushakätsishqa,’ nishpa. Moisespa panin Miriamnash, panderëtanta horqaramunaq, tsënash wakin warmikunapis kikinkunapawan qatiyänaq Miriamta. ‘Jehovämi ganashqa pelëata. Lamarchömi soldädokunata cabällonkunatawan ushakätsishqa,’ nishpash pëkunapis cantayänaq tushullapa.

Éxodo, capítulos 12 a 15.