Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Bibliapita willakïkuna willakoq librömi

 20 kaq willakï

Mana alliman ishkirin Dina

Mana alliman ishkirin Dina

¿PIKUNATARAQ watukaq Dina? Canaán markachö täraq shipashkunatash watukaq. ¿Papänin Jacob kushintsuraq këta ruraptin? Canaán markachö täraq warmikunapita Abrahán y tsurin Isaac pensayanqan yarpëmi, yanapamäshun kë tapukïta contestanapaq.

¿Huk Canaán warmiwan Isaac casakunanta munarqatsuraq Abrahán? Manam. ¿Huk cananea warmiwan Jacob casakunanta munayarqatsuraq Isaacwan Rebeca? Manam. ¿Imanir-raq munayarqantsu?

Uli dioskunata tsë Canaán markachö täraqkuna adorayaptinshi. Manash tsë nunakuna allitsu kayaq ni amïgopaq ni casakuyänampaqpis. Tsënöpam musyantsik, tsë cananëakunawan Dina yanasa kananta mana Jacob gustanqanta.

Mana allimanshi Dina ishkirinaq. ¿Dïnata rikarëkaq cananeo nunata dibüjochö rikankiku? Siquem, ninmi shutinta. Kë nunash, Dina cananea shipashkuna watukaq ëwashqanchö malas pëwan punukïkunaq. Casakurninraqshi huk warmiwan huk ollquqa punuyanman junto, tsëshi alläpa mana alli kanaq këqa. Hina alläpa desgraciamanshi heqatsinaq kë mana alli Siquem Dïnata ruranqan.

Y Dïnapa turinkunaqa alläpash piñëkuyänaq kë llapanta wiyarir. Simeonwan Levïshi alläpa piñëkuyänaq, tsëshi espädankuna apakurkur tsë markaman yëkuriyänaq mana mäkuyanqanyaq. Pëkunash wawqinkunawan, llapan wakin nunakunata y Siquemta wanïkatsiyänaq. Dïnapa turinkuna kë llapan mana alli rurayanqanshi papänin Jacobta alläpa piñëkatsinaq.

¿Kë llapan desgracia imanöraq qallarqan? Mana Jehoväpa leynin wiyakoq nunakunawan Dina juntakonqanchömi llapan pasarqan. Tsëmi mana juntakushwantsu mana Teyta Dios kuyaq nunakunawanqa, ¿manaku tsënö parecipushunki?

Génesis 34:1-31.