Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Bibliapita willakïkuna willakoq librömi

 27 kaq willakï

Egiptochö huk mana alli rey mandakun

Egiptochö huk mana alli rey mandakun

KËCHÖ uryëkaqkunatash obliguëkäyan kë rikëkanqëki nunakuna. ¡Rikë lätigowan uryaq nunata maqëkaqta! Israelïtakuna niyanshi kë uryaqkunata Jacobpa familiampeq kayaptin. Egipciokunash kayan tsë obligado uryëkätseqkuna. Pëkunapa esclävonkunash kayan israelïtakunaqa. ¿Imanöraq pasashqa këqa?

Alli unëshi Jacobpa familiankuna Egiptochö kushishqa täkuyänaq. Pëkunataqa cuidanaq Josëshi alläpa importante nuna Egiptochö kashqa karnin, Faraonllash pëpita más puëdeqqa kashqa kanaq. Pero tsëpitanash alli Faraonpis y Josëpis wanuriyänaq. Tsënash israelïtakuna chikeq huk Faraonna tikrarinaq rey Egiptochö.

Tsënöpanash israelïtakunaqa kë mana alli Faraonpa esclävon tikrariyänaq. Tsënash mana ankupäkoq y mana alli nunakunata churanaq pëkunata uryatsiyänampaq. Faraonpaq markankuna ruratsirshi kë mana alli nunakunaqa alläpa obligayänaq israelïtakunata. Pero masshi mirakurkuyänaq israelïtakunaqa. Tsëshi alläpa atskaqyäkuriyaptin egipciokunaqa mantsakakurkuyänaq.

Tsëpenqa, ¿imataraq rurarqan Faraón, musyankiku? ‘Llapan ollqu wambra yureqta wanïkatsiyanki,’ nishpash ninaq Faraón llapan israelita warmikuna yanapaq partërakunata. Pero alläpa allish kayaq tsë warmikunaqa, tsëshi mana wanutsiyaqtsu wambrakunata.

Tsëshi, ‘llapan israelita ollqu wambrakunata wanïkatsiyë. Warmi wambrakunallata haqiriyë,’ nishpa Faraón mandakunaq. ¿Manaku alläpa mana alli karqan tsë ruratsenqan? Rikärishun mä imanöshi salvakunaq huk ollqu wambra.

Éxodo 1:6-22.