Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Bibliapita willakïkuna willakoq librömi

 10 kaq willakï

Wamayëpaq Tamya

Wamayëpaq Tamya

MANA arcaman yëkoq nunakunaqa punta kawayanqannöllash kakïkäyänaq. Tsë wamayëpaq tamya kananta manash creiyänaqraqtsu. Mana imëpis asikushqanöshi asikïkuyänaq. Pero manash alläpa unëtsu asikuyänaq.

Tsëllanash mantsakëpaq tamya qallakïkunaq. Baldewan yaku hichëpanöshi tamyar qallëkunaq. ¡Rasumpa kaqllatam Noëqa willakorqan! Pero manash ni pï arcaman yëkïta puëdenaqnatsu. Kikin Jehoväshi arcapa punkunta alleq llawirkunaq.

Tsëllanash hinantin pampan pampanta limpu yaku tsapärinaq. Hatusaq mayukunanöshi yakupis ëwar qallëkunaq. Montikunata y hatusaq rumikunatapis bunrururshi limpu qalirnin apakunaq. Tsënash nunakuna limpu mantsakëkuyänaq. Hatusaq hirkakunapa puntanyaqshi lloqakurkuyänaq safarnin. ¡Tsëraqshi cuentata qokuyänaq Noé rasumpa kaqllata parlanqanta, y imanöshi lamentëkuyänaq arca kicharëkaptin mana yëkuyanqanta! Pero alläpa tardenash kanaq.

Y yakuqa más y masshi lloqar qallëkunaq. Y 40 hunaq y 40 ampish wamayëpaq tamyëkunaq. Llapan hatusaq hirkakunatapis limpush yaku tsapärinaq. Arcaman mana yëkoqkunaqa animalpis y nunakunapis limpush Teyta Dios nenqannö ushakäyänaq. Pero arca rurinchö kaqkunaqa llapanshi salvakuyänaq.

Noé tsurinkunawan arcata rurar uryayanqanshi alläpa alli kanaq. Yaku pallarkamuptinnash arca kaskäramunaq. Pero tamya pärariptinnash, Inti atsikyäramunaq. Hinantinchöpis yakullanash kanaq. Arcallash rikakunaq kaskëkar tsë llapan yaku hananchö.

Y mananash ni pï nunakuna hipatseq kanaqnatsu kë Patsachö. Tsë hatusaq mantsëpaq nunakunapis ushakashqanash kayänaq. Llapan mana alli nunakunawanshi mamankunapis limpu ushakäyänaq. Pero ¿imaraq pasarqan papäninkunataqa?

Manam noqantsiknö rasumpa nunatsu kayarqan, tsë mantsakëpaq hatusaq nunakunapa papäninkunaqa. Sinöqa kë Patsachö nunanö kawayänampaqmi angelkuna ciëlopita shamushqa kayarqan. Tsëmi, wakin nunakunanötsu wanuyarqan pëkunaqa Diluvio shamuptin. Kutikuyarqan ciëlotam yapë angelman tikrarïkur nunanö kayanqan cuerponkunata haqirïkur. Pero Teyta Diosqa mananam angelninkunapaq chaskerqanatsu. Satanaspa mana alli angelninkunanash tikrariyänaq. Kë angelkunatam demonio nin Bibliachöqa.

Tsëpitanash Jehoväqa vientïkatsinaq llapan yakuta bajaratsinampaq. Y pitsqa killa pasariptinnash arcaqa huk hirka hananchö quedarinaq. Atska hunaqnash pasarinaq y arca rurinchö këkaqkunapis rikachakurnin rikäriyaq hirkakunapa puntankunallatash. Tsëpeqnash ichikllapayan yaku tsakir qallëkunaq.

Tsënash huk yana pishquta Noé kacharinaq arcapita. Kë pishquqa mana mëchöpis täkïta puëderninshi raslla kutirinaq. Tsënöllash cada ëwarpis volarïkur kutireq arcallaman.

Tsëpitanash, huk palömata kachanaq arcapita patsachö yaku tsakenqanta o mana tsakenqanta musyëta munar. Kë palömapis kutirinaqshi mana mëmampis ratëta puëder. Pero Noëqa yapëshi kë palömata kachanaq, y tsë palömanash kutirinaq pïconchö huk montipa rapranwan. Yakuqa limpush bajashqa kanaq. Kima kuti kachanqanchönash palömaqa kutinaqnatsu tsaki patsata kawanampaq tarishqa karnin.

Tsëpeqnam Noëta Teyta Dios kënö nerqan. Llapan familiëkiwan y animalkunawan ‘arcapita yarqï,’ nishpa. Huk watapitapis masshi kayänaq arcachö. ¡Pensakurki, imanö kushishqaraq tikrariyarqan kawëkar arcapita yarqaramurnin!

Génesis 7:10-24; 8:1-17; 1 Pedro 3:19, 20.