Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Bibliapita willakïkuna willakoq librömi

 5 kaq willakï

Qallëkun sasa kawë

Qallëkun sasa kawë

TSE selläma shumaq Edén huertapita Jehová Adán y Ëvata qarqaramuptinshi sasa kawëninkuna qallarinaq. Mikuyänampaqpis alleqraqshi uryayänan kanaq. Manash alli frütayoq montikuna kanaqnatsu, masqa kashakunallanash kanaq. Teyta Diosta mana wiyakuyanqanchöshi kë llapan pasanaq y pëpa amïgonnatsu manash kayänaq.

Tsënö karshi Adán y Eva wanur qallëkuyänaq. ¿Yarpankiku pëkunata Teyta Dios nenqanta? ‘Kë montipa frütanta mikurnenqa wanuyankim,’ nerqanmi. Tsë frütata mikuyanqanrëkurmi Teyta Dios nenqannö wanuyarqan. ¡Imanö uparaq kayarqan mana Diosta wiyakuyänampaq!

Tsë selläma shumaq huertapita Jehová qarqushqanchönash Adán y Ëvapa wambrankuna yurir qallëkunaq. Tsënöllash hina wambrankunapis awkinyarnin wanuyänan kanaq.

Adán y Eva Jehoväta wiyakurnenqa, kushi kushim kayanman karqan llapan wambrankunawan. Wiñeypaqmi kawayanman karqan kushi kushi kë Patsachö. Manam ni pï, awkinyanmantsu ni qeshyanmantsu ni wanunmantsu karqan.

Pero Teyta Diosqa munan llapan nunakuna wiñeypaq kushishqa kawayänantam y imë karpis kënö kanampaqmi änimantsik. Manam Patsallatsu alläpa shumaq kanqa, nunakunapis manam qeshyayanqanatsu. Llapankunam alläpa kuyanakuyanqa y Teyta Diospa amïgonllanam kayanqa.

Pero Ëvaqa manash Teyta Diospa amïgannatsu kanaq. Tsëshi wambrankuna yurinampaqpis alläpa sasa kanaq. Alläpash nanatsikunaq. Awmi, Jehoväta mana wiyakonqanchömi tsënö hiparqan alläpa nanatsikïwan, ¿manaku tsënö parecipushunki?

Adán y Ëvapa wambrankunaqa warmipis ollqupis atskash kayänaq. Mayor wambran yuririptinshi Caín nishpa shutin churayänaq. Qateqninpanash Abel kanaq. ¿Musyankiku, imaraq kë ishkanta pasarqan?

Génesis 3:16-23; 4:1, 2; Revelación 21:3, 4.