Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Bibliapita willakïkuna willakoq librömi

 6 kaq willakï

Huk alli y huk mana alli Adanpa tsurinkuna

Huk alli y huk mana alli Adanpa tsurinkuna

CAÍN y Abelta kanan rikärïki. Ishkampis winariyashqanam. Cainqa murupakoqshi tikrarishqa. Pëqa frütakunata, gränokunata y imëka verdürakunatapis murupakunaqshi.

Abelnash wätan üshakunata. Pëtaqa alläpash gustëkun achkaskuna cuidë. Këkunanash más winarnin hatusaq üshakuna tikrariyänaq, tsënöpash Abelpa üshan selläma mirëkunaq.

Huk hunaqnash Cainwan Abel Teyta Diospaq huk qarënin apayänaq. Llapan murupakonqampitash Cainqa apanaq. Y Abelnash más allin kaq üshanta apapunaq. Abel y qarëninqa Jehoväta alläpash gustanaq. Pero Caín y qarëninqa manash Jehoväta gustanaqtsu. ¿Musyankiku imanir-raq?

Manash Abelpa qarënin Cainpa qarënimpeq más alli kaptinllatsu. Sinöqa Abel alli nuna kaptinshi. Jehoväta y wawqintapis pëqa kuyaqshi. Pero Cainqa alläpa mana allish kanaq, manash wawqinta kuyaqtsu.

Tsëshi Teyta Diosqa Cainta ninaq mana alli këninta haqinampaq. Jehová tsënö nikaptimpis manash pëqa wiyakunaqtsu. Jehová Abelta más kuyaptinshi alläpa piñashqa këkänaq. Tsëpeqnash Caín Abelta ninaq: ‘Aku washa pampata,’ nishpa. Y pampachö ishkanlla këkäyaptinnash, Cainqa wawqinta maqëkunaq wanoqpaq. ¿Manaku kë Caín ruranqan espantëpaq mana alli?

Abel wanushqa kaptimpis, Teyta Diosqa yarparëkanshi. Abelqa alli nunash kanaq, tsëshi Jehoväqa qonqantsu pënö alli nunakunataqa. Tsëshi imë karpis Jehoväqa Abelta kawaritsimonqa. Tsë tiempochöqa manash Abel wanonqanatsu. Wiñeypash kawanqa kë Patsachö. ¿Munankimanku Abelnö alli nunakuna reqita?

Pero Cainnö nunakunaqa manam Teyta Diosta gustantsu. Tsëshi wawqinta wanuratsiptin Diosqa familiampeq qarqurinaq karupa ewkunampaq, tsëshi castïgon kanaq. Tsënash karupa ewkurnin Cainqa huk paninta apakurkur ewkunaq, pënash warmin kanaq.

Tsënöpanash Cainpa warminchö tsurinkuna yurir qallëkunaq. Wakin Adán y Ëvapa wambrankunapis casakuyänaqshi y atskash wambrankunapis yurinaq. Tsënöpash nunakuna kë Patsachö atska mirariyänaq. Mä reqirishun wakinkunata.