Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

¿Imapitataq Biblia willakun?

 1 KAQ YACHATSIKÏ

Dios shumaq huertata nunakunata qaran

Dios shumaq huertata nunakunata qaran

Diosqa ciëlota y Patsachö llapan kawaqkunatam kaman; jutsannaq ollquta, warmita kaman y juk shumaq huertamanmi churan

“QALLANANCHÖMI Dios rurarqan ciëlokunata y patsatapis.” (Génesis 1:1.) Kë qallanan palabrakuna imëpis alläpa reqishqa kanqantam nunakuna niyan. Kë shumaq willakïwanmi Bibliaqa rikätsikun Jehová Dios alläpa puëdeq këninwan ciëlochö y Patsachö llapanta kamanqanta. Nïkurnam Patsata, shumaq plantakunata y animalkunata kamarqan, y atska tiempochö Dios kamanqantaqa junaqkuna nirmi Bibliaqa willakun.

Kë Patsachö más precisaq kaqta Jehová ruranqanqa, nunata kamanqanmi karqan. Punta nunataqa Dios rurarqan allpapitam. Y kikin rikoqtam rurarqan, tsëmi Diosnö kuyakoq këta, yachaq këta y maskunachöpis qatita puëderqan. Adan nishpam jutitsirqan y alläpa shumaq huertamanmi churarqan, tsë huertapa jutinmi Edén karqan. Tsëchömi kikin Dios tukïläya frütayoq plantakunata kamarqan.

Juk junaqnam Dios rikarqan ollqupa yanaqin pishinqanta. Tsënam Adanpa costïllanta jorqarir Ëvata kamarqan, y warmimpaqmi Adanta qorqan. Tsënam Adanqa alläpa kushikïwan kënö nirqan: “Këmi sïqa tullüpa tullun y ëtsäpa ëtsan”. Y qateqnin versiculopis kënömi nin: “Tsërëkurmi ollquqa jaqirinqa mamanta teytanta warminwan juntakänampaq. Y ishkankunapis juk ëtsallanam kayanqa” (Génesis 2:22-24; 3:20).

Adantawan Ëvataqa këkunatam Dios mandarqan: puntataqa, Patsata cuidayänampaq, murupakuyänampaq y atska wamrayoq kayänampaq. Nïkurnam mandarqan juk plantapa frütanta mana mikuyänampaq, tsë plantaqa karqan “alli kaqta y mana alli kaqta musyatsikoq planta[m]” (Génesis 2:17). Y mana wiyakuyaptinqa, ¿imaraq pasanman karqan? Wanuyänanmi karqan. Diosta cäsokurqa rikätsikuyanmanmi karqan pëpa autoridadninta respetayanqanta, kuyayanqanta y alläpa agradecikuyanqanta. Pëkunapaqa llapanninkunam kayäpoq Diosta alli sirwiyänampaq. Jutsannaqmi kayarqan, y manam ni imatapis yarparäyaqtsu, tsëmi Bibliapis pëkunapaq kënö nin: “Diosmi llapan kamanqanta rikarqan, y ¡rikë!, allim karqan” (Génesis 1:31).

(Génesis 1 y 2 capïtulokunapita jorqashqam.)