Llapan kanqanman ëwari

Qallananchö tïtulukunaman ëwë

Jehoväpa testïgunkuna

Idiömata akrë Quechua (Ancash)

 6 KAQ YACHATSIKÏ

Job alli tsarakun

Job alli tsarakun

Diosta kuyanqampitam Satanasqa Jobpaq mana allita parlan, pero pëqa manam Jehoväta jaqintsu

¿DIOSTA sirweqkunaqa tukïta sufrirnin tsarakïta puëdeyanmantsuraq? Job nunam këta rikätsikunan karqan. Ima pasanqantapis rikärishun.

Jobqa Abrahanpa kastanmi karqan, Egiptochö israelïtakuna täräyanqan witsanmi kawarqan, y täranqan markatam kananqa Arabia nación nir reqiyan. Ciëlochö Jehová llapan angelninkunawan junto këkäyaptinmi Satanasqa chärirqan. Y tsëchömi llapan jananchö Job alli ruranqampita Jehová alabarirqan, tsënöpam rikätsikurqan pëman paqwë markäkunqanta o yärakunganta. Pero Satanasqa nirqan Dioslla imëkampis qoptin y tsapaptinlla pëta sirwinqantam. Y tsë llapanta oqrarirqa Jehoväta manana kuyanampaq kaqtam nirqan.

Diosqa jaqirqanmi Jobpa cösasninkunata Diablu ushakätsinanta, wamrankunata wanutsinanta y qeshyatsinantapis. Jobqa manam musyarqantsu Satanás tsë llapanta rurëkanqanta y imanir tsë llapanta pasanampaq Dios permitinqantapis. Tsënö kaptimpis Jehoväta sirwikarqanllam.

Tsënam kima amïgontukoqkuna Jobta watukaq ëwarnin jutsallakurqunkim niyarqan. Y casi llapan Job librochömi tarintsik tsënö tumpayanqampita. ¡Parlayanqantapis manam mäkuyaqtsu! Jina Diosqa manam sirweqninkunapaq yarparantsu y manam pëkunaman ichikllapis markäkuntsu niyarqanmi. Pero Jobqa manam pëkunata creirqantsu y wanunqanyaq alli tsarakunampaq kaqtam nirqan.

Pero mana jutsayoq kanqanta Job tsapäkunqanchömi mana allita parlarirqan. Tsëmi, Jehoväpa jutinta y autoridadninta yarpänampa rantin, kikimpa jutinllaman yarparanqampita Jobta joven Elihú willaparqan. Jina piñaparqanmi Jobpa mana alli amïgonkunatapis.

Tsëpitanam kikin Jehová Jobta shumaq willaparqan. Llapan kamanqampita parlaparninmi, Diospa jatun këninwan nuna ichikllanlla kanqanta rikätsirqan. Job alli nuna karmi Dios ninqanta wiyakurqan. Jehová ‘ancupacoq’ o llakipäkog karninmi, saludninta y kapunqampita masta kutitsirqan, jina chunkaran tsurinkunapis kapurqan (Santiagu 5:11). Tukï jipakïkunapa pasanqanchö Job tsarakurqa, rikätsikurqan Satanás ulikoq kanqanta y llapan nunakunapis Diosta sirwita puëdeyanqantam.

(Job libropita jorqashqam.)