Bibliataqa wakin librokunapitapis masmi jinantin markachö nunakuna katsiyan. ¿Imëllaqa tsë alläpa shumaq yachatsikoq librota leishqankiku? Unëpita patsëmi tukï markapita nunakuna Bibliata leirnin yamë këta tariyashqa, shamoq tiempoman markäkuyashqa o yärakuyashga y yachakuyanqannö rurarnin alli kawakuyashqa. Tsënö kaptimpis atskaq nunakunam Bibliata leiyashqaraqtsu, pero Diosman creir o mana creirpis leïtaqa munayanmi. Tsënö kaptikiqa, kë follëtom Bibliata reqir qallanëkipaq yanapashunki.

BIBLIA leita manaraq qallar, allichi leinëkipaq kaqta maslla musyarinkiman. Bibliachö o Santas Escritüraschöqa 66 librokunam kan. Qallanan kaqqa Genesismi y ushanannam kaqnam Apocalipsis.

¿Pipa pensënintaq Bibliachöqa këkan? Kënö tapukïqa alläpa allim. Bibliataqa 1.600 watakunanömi qellqayarqan, chusku chunkanömi qellqaq nunakuna kayarqan, y 66 librokunam Bibliachöqa kan. Tsënö karpis, manam kikinkunapa pensëninkunatatsu qellqayarqan. Juk qellqaqmi kënö nirqan: “Teyta Diospa palabranqa quiquinpitam shamun” (2 Timoteu 3:16). Y juknam kënö nirqan: “Jehoväpa espïritunmi parlanäpaq yanapamarqan, pëmi palabranta shimïman churamurqan” (2 Samuel 23:2). Rikanqantsiknöpis, Biblia qellqaq nunakunaqa, Llapanta Kamaq Jehová Diospa pensëninta qellqayanqantam willakuyarqan. Y kikin Bibliachömi rikätsimantsik pëta reqinantsikrëkur Bibliata qellqatsimunqanta.

Jina precisanmi Bibliapa más precisaq yachatsikïninta musyanantsikpis, y tsë yachatsikïqa, ciëlochö juk Gobiernota Dios patsätsinqanmi, tsënöpa Pëlla Llapan Autoridadyoq kanqanta nunakuna musyayänampaq. Qateqnin kaq yachatsikïchömi rikanki Genesispita hasta Apocalipsisyaq tsëpaq Biblia parlanqanta.

Bibliapita más yachakunëkipaqqa, këkunaman pensar leir qallanëkipaqmi niriyaq.

^ par. 9 Tukïnöpam fëchakunataqa reqiyan. Kë follëtochöqa manaraq Jesus shamuptin (m.J.sh.) o Jesus shamunqanchöna (J.sh.) nishunmi. Cada päginapa jawanchömi kë abreviatürakunata tarinki.