Abrahan Dios ninqanta wiyakun. Markäkïnin o yärakuynimpita atska mirënin kanampaq Jehová awnin

DILUVIO kanqampitaqa pasarishqa 350 watakunanam. Kanan Irak marka këkanqanchömi, unë Ur alli markachö Abrahan tärarqan. Pëqa alläpam Diosman markäkoq, pero tsëtam tukï pasanqanchö rikätsikunan karqan. Ima pasakunqantapis rikärishun.

Jehoväqa Abrahanta nirqanmi täkunqan markata jaqirïkur Canaán markaman täkoq ëwakunampaq. Alläpa mana yarpachakushpam Abrahanqa wiyakurqan. Warmin Särawan, sobrinon Lotwan y wayinchö llapan täraqkunawanmi karupa ëwakuyarqan. Canaanman chärirnam carpa wayikunallachö täräyarqan. Tsënam Jehová Abrahanta awnirqan Patsachö llapan familiakuna pëpa kastanrëkur bendecishqa kayänampaq, y jatun nacionman tikrayänampaq y Canaán marka pëkunapaq kanampaq kaqtapis.

Abrahanpawan Lotpaqa üshankuna, töronkuna y wäkankunapis mirarqanmi. Y Abrahanqa alläpa alli nunam karqan, tsëmi sobrinon Lotta nirqan animalninkunapaq más alli chakrata akranampaq. Lotqa, Jordan mayu kinrë tukïta wayoq chakrakunatam akrarqan, y Sodoma markachömi tärar qallëkurqan. Pero tsëchö täraq nunakunaqa, tukï rakcha o ganra rurëkunawanmi Jehoväta piñatsiyaq.

Abrahan Lotpita rakikanqanchömi, ciëlochö qoyllurkunanöraq mirënin kanampaq Jehová awnirqan. Abrahanqa Jehoväman markäkoqmi, pero kuyë warmin Säraqa qolloqmi karqan. Tsënam Abrahan 99 watayoq y Sara 90 watayoqnö këkaptin, wamrankuna kanampaq Dios willarqan. Y ninqannömi Särapa wamran yuririrqan, y Isaac nishpam jutitsiyarqan. Abrahanpa juk tsurinkuna kashqa kaptimpis, Edén huertachö Dios awnikunqan Salvadorqa, Isaacpa kastampitam yurinan karqan.

Tsëyaqnam Lotqa familianwan Sodömachö tëkäyarqan. Pero pëqa Diosta kuyarmi tsë nunakunapa rakcha rurëninkunata qatirqantsu. Mana alli rurëninkunarëkurmi Sodoma markata ushakätsinampaq Jehová nirqan, pero puntataqa angelninkunawanmi Lotta willatsirqan. Tsë angelkunam Lotta mandayarqan familianwan raslla yarquyänampaq y qepaman mana rikäyänampaq. Tsënam, Sodömachö y Gomörrachö mana alli nunakunata ushakätsinampaq Diosnintsikqa ninawan azufreta tamyatsirqan. Lotwan ishkan warmi tsurinkunaqa salvakuyarqanmi. Pero Lotpa warminqa, itsa imëkanta jaqinqampaq llakir qepaman tumëkurqan. Mana wiyakunqanrëkurmi wanurqan.

(Génesis 11:10–19:38 textokunapita jorqashqam.)