Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

¿Imapitataq Biblia willakun?

 8 KAQ YACHATSIKÏ

Canaán markaman yëkuyan

Canaán markaman yëkuyan

Josue israelïtakunata Canaán markaman yëkatsin. Chikeqninkunapita salvanampaq Jehová juezkunata churan

ISRAELÏTAKUNA Canaanman manaraq yëkuyaptinmi, Abrahanta Jehová awnirqan tsë markata tsurinkunata qonampaq. Y tiempo pasariptinnam, Josuëpa mandädonchö israelïtakuna Dios Awnikunqan Patsaman yëkuyänampaq listo këkäyarqan.

Canaanchö nunakuna chikikoq, wanutsikoq, maqakoq y tukï mana allita ruraqta rikarmi, tsë nunakunata ushakätsiyänampaq israelïtakunata Dios mandarqan.

Pero Josuëqa tsë nacionman manaraq yëkurmi ishkaq musyapakoqkunata kacharqan, y Rahabpa wayinchömi posadakuyarqan. Israelita kayanqanta musyëkarpis, tsë warmiqa wayinchömi pakarätsirqan. ¿Imanir? Jehová markanta salvananrëkur imëka ruranqantam wiyashqa karqan, y Diosman creirmi qallëkurqan. Tsëmi musyapakoqkunata mañarqan tsë markata ushakätsirpis pëtawan familiantaqa salvayänampaq.

Tiempowannam israelïtakuna Canaanman yëkuyarqan y Jericó markatapis ushakätsiyarqan. Jehovämi perqankunata juchuratsirqan, y israelita soldädokunanam tsëchö llapan täraqkunata ushakätsiyarqan. Kënö guërrakunaqa joqta watam karqan, y Dios Awnikunqan Patsamanmi Josuëwan tröpankuna yëkuyarqan. Tsëpitaqa, ganayanqan markachö chakrakunatam rakinakuriyarqan.

Wanukunampaq ichikllana pishikaptinmi Josué israelïtakunawan ëllukarqan o gorikargan. Awilunkunapaq Jehová ruranqantam yarpätsirqan, y imëpis Jehovällata sirwiyänampaqmi parlaparqan. Pero Josuëwan wakin yanapaqninkuna wanuriyanqanchöqa, Jehoväta jaqirïkurmi israelïtakuna juk dioskunata adorar qallëkuyarqan. 300 watam Jehová mandakunqan leykunata wiyakuyarqantsu. Tsënam Jehová jaqireq filistëokunapa y wakin chikeqninkunapa makinkunachö. Pero Jehová yanapëkunanta mañakuyaptinqa, juk yanapaqninkunam churareq. Y 12 juezkunam yanapayarqan.

Bibliachöqa willakur qallëkun Otniel juezpaqmi, y kallpasapa juez Sansonpaq parlarmi usharin. Jueces libroqa yachatsimantsik Jehoväta wiyakur alli kawakunapaq kaqta, y mana wiyakurqa mana allikunaman chänapaq kaqtam.

(Josué, Jueces y Levítico 18:24, 25 textokunapita jorqashqam.)