Abrahanpa kastankuna mirariyan. Josëta Dios Egiptochö yanapan

JEHOVÄQA musyarqanmi kuyashqa Tsurin wanunampaq kaqta. Génesis 3:15 textochö jutimpa mana willakurpis, pëpaqmi parlëkarqan. Abrahantam Jehová mañarqan tsurin Isaacta wanutsinampaq, y tsëtaqa Bibliachö qellqatsirqan Tsurin wanuptin alläpa llakikïpaq kanqanta nunakuna musyayänampaqmi.

Ama qonqashuntsu, Diosqa willakurqanmi Isaacpa kastampita tsë salvamaqnintsik yurinampaq kaqta. Abrahanqa Dios awninqanta y wamranta kawaritsimunantapis markäkoqmi o yärakogmi. Tsëmi wanutsinampaqpis listo këkarqan. Pero wanutsinampaq këkaptinmi angelninwan Jehová michätsirqan. Tsënö Abrahan ruranqampitam Jehová kushikurqan, y parlanqanta cumplinampaqmi awnirqan.

Más watakuna pasariptinnam Isaacpa ishkë tsurinkuna yurirqan, y jutinkunanam Esaü y Jacob karqan. Pero Jacobllam Diospa kaqtaqa kuyaq, tsëmi atska bendicionkunatapis chaskirqan. Pëtam Diosnintsikqa Israel nishpa jutitsirqan y 12 tsurinkunapitam 12 kastakuna Israelchö yurirqan. Pero ¿imanöpataq kë familia juk jatun nacionman tikrarqan?

Tsëqa qallëkurqan Josëta mayor wawqinkuna chikipar qallëkuyaptinmi. Alläpa chikirmi rantikïkuyarqan. Y Egiptomanmi apakuyarqan, tsëchönam tukï mana allikunapa pasarqan. Pero Diosnintsikqa kë alli jöventa yanaparqanmi, tsëpitanam Faraón juk alläpa precisaq cargoman churarqan. Tsënöpam mallaqë tiempochö familianta yanaparqan Jacob mikï asheq wamrankunata Egiptoman kachaptin. ¿Pitataq llapanchö cargoyoqta taririyarqan? ¡Josëtam! Tsëchö wawqinkunawan tarinakuyanqanchö perdonta mañakuyaptinmi Jose perdonëkurqan, y wakin familiankunatawan apayämunampaq kacharqan. Faraonqa más allin kaq chakrakunatam pëkunata qorqan, y tsëchömi más mirayarqan y tukïninkuna kayäpurqan. Josëqa musyarqanmi Jehová ninqankuna rurakänampaq kikin yanapëkanqanta.

Jacobqa wanunqanyaqmi llapan familianwan Egiptochö tärarqan. Wanunampaq ichikllana pishikaptinmi willakurqan Dios awnikunqan Salvakoq juk alläpa puëdeq rey kanampaq kaqta, y Juda tsurimpita yurinampaq kaqta. Tsëpitanam Jose willakurqan Egipto nacionpita Jacobpa familianta Dios jorqanampaq kaqta.

(Génesis 20–50 y Hebreus 11:17-22 textokunapita jorqashqam.)