Diosnintsikqa munan amigon kanatam. ¿Qam musyankiku mas hätun Kamakoqpa amigon keman chänekita? Abrahán shutiyoq nunam üne kawarqan, petam niyarqan, Diospa amigon (Santiago 2:23). Bibliachoqa parlanmi üne nunakunash, Diospa amigon kayänaq, atska hatun bendicionkunatash chaskiyanaq. Kanan tiempochöpis hinantin Patsachomi, atska nunakuna Diospa amigon keman chäyashqa. Qampis Diospa amigon keman chankimanmi.

Diospa amigon keqa mas allim pi nunapeqpis. Diosnintsikqa llapan nenqantam ruran amigonkunapaqqa (Salmo 18:25). Diospa amigon keqa mas allim imeka kapamanqantsikpitapis. Ricokuna wanuriyaptenqa wakin nunakunam tsarikurkuyan qellëninkunata. Tsemi Diospa amigon keqa alli tesoroyoqno kemi, manam ni pi qochimäshuntsu (Mateo 6:19).

Kayanqam Diospita mana yachakunëkita munaqkuna. Michayäshunkimanmi wakin castekikunapis, amigokunapis (Mateo 10:36, 37). Pipis qampita asikuptenqa, tükita nishurniki mantsakätsishuptikeqa, kikikita tapuki: “¿Pitataq kushitsita muna, nunakunataku, Diostaku?”. Yarpakache: pipis ama mikitsu nishuptikeqa, ¿mananatsuraq mikunkiman? Manachi tsetaqa rurashwantsu. Kawanapaqqa mikunantsikmi. Diosnintsikqa wiñeypaq kawatsishunkimanmi. Tsemi, yachakita tïre Diospa amigon kanekipaq, ama pipis tsaräshitsu (Juan 17:3).